Tàm bơta nhơm trồ tiah mrềt niam, tiah mhoal glờm jăt chàr bơnơm tàm bơta măt tơngai sòl àng drim, săp dròng cing mpong bơh tàm Tiah ơm rơlô să Hồ Gia Trang Lâm Hà, càr Lâm Đồng dê. Gùt dar gơnru ồs gam hìt, ală cau ùr kòn cau K’ Ho tàm să soh phan kòn cau hàng niam, tamya gùt dar jăt săp dròng cing dê. Săp dròng cing mpong bè săp hòi tus rài yau bơh mò ồng dê. Cau năc lòt nhơl Phạm Thị Vân gơboh kờñ đơs: “Mpồl dròng cing cau ùr bal mờ săp cau tamya hàng niam lơh săp dròng cing sơlơ lơbơn niam bơnĕ rơlao, pơgồp bal mờ tamya xoang sơlơ lơh săp dròng cing dê geh mpong niam krơi is rơlao mờ mpồl dròng cing cau klao; gơdờp ngan mờ bơta niam chài ờs mờng cau ùr kòn cau K’ Ho dê”. 

Geh bơyai lơh dròng sùm tàm tiah lòt nhơl Lâm Hà dê là Mpồl dròng cing cau ùr Bồ Liêng. Mpồl dròng cing do geh 20 nă cau, tàm hơ̆ geh 6 nă cau ùr dròng cing, gam tai là tamya jăt săp dròng cing dê. Tơl bơta geh bơh tơl nă cau-tơl tŭ tà jơng, pơdar gùt dar tus mờ broă pờ tê, klơn mpàng tê tàm pang cing ndrờm ai tơngŏ bơta niam bơnĕ. Ờ mìng niam bè măt sền, ală cau ùr do gam niam bè săp ntas cing wăc rơwờl ngan. Lŏ K’ Phèn, cau tàm mpồl dròng cing cau ùr Bồ Liêng, tàm sàh Đinh Văn – Lâm Hà, càr Lâm Đồng pà git: “An gơboh ngan mờ broă dròng cing kòn cau añ dê, do là bơta niam chài ờs mờng bơh mò ồng lời wơl. Añ gơboh dròng cing tài neh gơmŭt tàm nùs nhơm añ bơh tŭ lơi añ ờ git. Tus tŭ do să tờm añ git uă ngan jơnau dròng cing kòn cau K’ Ho añ dê”. 

Tàm mpồl dròng cing cau ùr Bồ Liêng, lŏ K’ Phôn gam là cau geh săp đơs jơnau pơn đik kòn cau K’ Ho dê ròm ngan. Lŏ K’ Phôn pơnyờ să pà git: “Lòt dròng cing ha là tàm pơrlòng tàm tiah lơi, mpồl dròng cing cau ùr bol añ dê dờp geh uă ngan jơnau jờng rơ, sền ngềr bơh cau sền, cau iăt dê. Tài ală oh mi cau ùr dròng cing ring tê, săp dròng cing ndrờm bal, git uă jơnau dròng, bal mờ phan soh kòn cau dê tai den tàng sơlơ hàng niam ngan, lơh geh bơta niam chờ cau sền, cau iăt krơi is ngan, niam bơnĕ ngan. Tàm tơngai tus, bol añ bơto ală kơnòm ùr in, lài ngan là tàm jơi nòi nàng geh dùl rơnàng kơnòm să pơn jăt tai dròng cing. Să tờm añ là cau tus bal tơn tàm broă bơto oh kòn in, kơ̆p kờñ bơta niam chài ờs mờng bơh mò ồng lời wơol geh prăp gàr sùm”.

Kra ƀòn, cau chài K’ Bes, do là cau bơ̆t bơtàu gơs mpồl dròng cing cau ùr Bồ Liêng bơh 15 nam lài pà git, tŭ do ồng kung gam tus bal mờ broă dròng cing bơh mpồl dròng cing cau ùr dê. Tàm uă nam bơto rơlao 200 nă cau dròng cing in, ồng gơlơh niam bơnĕ ngan gơwèt mờ ală oh kòn là cau ùr bơsram dròng cing: “Tŭ do, añ gam pơn jăt tai bơto dròng cing ai uă rơnàng in. Nam lài añ bơto ală kơnòm dềt in là kơnòm bơsram bơh ơdŭ 5, ơdŭ 6 in, tơnơ̆ mờ hơ̆ là ơdŭ ơruh pơnu bơh 30 tus 40 sơnam in. Di lah geh jơnau kờñ pơn drờm bal mờ ală mpồl ndai. Ơdŭ dròng cing cau ùr bơsram dròng cing mhar wă rơlao, mhar git ală jơnau dròng cing ngan pơn drờm mờ ală mpồl ndai. Dơdŭ dròng cing cau ùr gơboh kờñ mờ broă dròng cing ngan, añ ờ hềt tus tàm ơdŭ mơya ală cau bơsram neh tus bal tơl lài nàng kơ̆p añ, lòt bơsram di tŭ, kờñ gơboh ngan mờ broă bơsram den tàng añ chờ hờp ngan. Uă tŭ añ bơto tai bơdìh mờ tŭ bơsram nàng ală kơnòm in git tai ală jơnau dròng cing, añ jờng rơ ngan”.

Tơngai do, Mpồl dròng cing cau ùr Bồ Liêng neh tus bal dròng uă dơ̆ lơh chờ ờs mờng, ală dơ̆ lơh chờ satềp, ngai chờ dờng bơh jơi bơtiàn Việt Nam dê. Ală cau do kung geh ală tiah lòt nhơl tàm ƀòn lơgar “dan lài” nàng tus bal mờ ală broă lơh lòt nhơl mpồl bơtiàn. Bŭ lah tàm broă lơh lơi, tàm tiah lơi, ală cau ùr do kung gam gàr sùm bơta hàng niam bal mờ nùs nhơm kờñ gơboh mờ dròng cing-do là rùp rài ndu gơnrơh ngan tàm rài kis niam chài kòn cau K’ Ho dê. Bơta hàng niam bơh mpồl dròng cing cau ùr Bồ Liêng tềng gah Dà Dờng neh pơgồp bal tàm broă lơh geh tai bơta niam bơnĕ tus mờ gah lòt nhơl càr Lâm Đồng dê. Ồng Nguyễn Văn Thạch, Phó Kwang lam bồ Anih tờm broă lơh drơng ala Tơrgùm bal sàh Đinh Văn Lâm Hà, càr Lâm Đồng pà git: “Sàh neh bơyai lơh geh ală dơ̆ lòt nhơl niam chài, cau năc lòt nhơl sền bơta niam chài cing mồng gơboh kờñ ngan. Do kung là dùl broă lơh nàng sàh yal bè bơta niam chài cing mồng tus mờ cau năc in. Bơh tŭ hơ̆ ai geh tai broă lơh nàng ală cau chài in geh tai priă nàng tơnguh tai bơta pràn tàm broă prăp gàr bơta niam chài ờs mờng jơi bơtiàn dê”.

Mpồl dròng cing cau ùr Bồ Liêng ờ mìng lơh geh uă tai bơta niam chài cing mồng kòn cau K’ Ho dê, mờ gam pơgồp bal tàm broă prăp gàr bơta niam chài ờs mờng, ai geh bơnàng jă tus mờ broă bơtàu tơnguh lơh sa mpồl bơtiàn kơl jăp tàm tiah jơi bơtiàn ờ gal cau Đinh Văn Lâm Hà, càr Lâm Đồng dê.