Tàm ƀòn Hai, jơnau prap gàr niam chài kòn cau dê geh sơn đờm bơh tơl hìu bơnhă. Pơn rơ bè hìu bơnhă ồng Y Yak Byă, mat mờng hòi là ồng Khuê dê. Tŭ do, hìu bơnhă ồng kung gam prap gàr bòr cing mờ rlau 10 drăp yang ală bơta. Pah nam, hìu bơnhă bơyai lơh ală broă lơh chờ, lơh yàng bơh yau bè lơh yàng dà mbòr, lơh yàng gờm chờ kis jŏ mờ tus bal ală broă lơh cing mồng ƀòn lơgar dê. Ồng pà git:

“Tŭ do, bol hi kung gam gàr sùm mờ bơto wơl ală bơta kuơ niam chài ờs mờng bơh yau bè dròng cing, ală dơ̆ lơh yàng kòn sau tàm hìu bơnhă in. Hìu bơnhă añ sùm lơh krơh lài tàm broă do. Ală dơ̆ lơh yàng cau Rơđê dê li la ngan, lơh yàng tàm hìu halà tàm mìr, lơh yàng duh khoai yàng brê, yàng dà… Ală bơhiàn bơh yau, bơhiàn ờs mờng niam bơnĕ kung gam geh prap gàr mờ lơh sùm’.

Bơh bơta git wă tơl hìu bơnhă tàm ƀòn Hai dê mờ niam chài bơh yau kòn cau Rơđê dê geh tàm pơrdờn wơl. Tàm tŭ uă ƀòn gơtìp kal ke tàm broă gàr sùm ală broă lơh niam chài bơh yau den tàm ƀòn Hai, ală dơ̆ lơh yàng dà mbòr, lơh yàng gờm chờ kis jŏ, bơyai lơh dròng cing jañ mồng kung gam geh lơh sùm. Bal mờ hơ̆, ală broă lơh niam chài làng bol dê sùm dờp geh bơta lòt bal, dong kờl bơh ală gùng dà, broă lơh dà lơgar dê. Ală đảng viên, cau kra ƀòn, cau geh bơngă pin dờn sùm tàm tìp, hòi jà làng bol tus bal ală broă lơh niam chài mpồl bơtiàn, mờ kung bơto wơl rơnàng kơnòm să in ală bơta niam tàm bơhiàn ờs mờng kòn cau Rơđê dê. Ồng Y Bơ̆i Byă -  Bí thư Chi bộ ƀòn Hai, sàh Cư̆ Mta, càr Dăk Lăk pà git:

“Añ bal mờ ală cau kra ƀòn, cau geh bơngă pin dờn sùm hòi jà ală oh, bal mờ hơ̆ bol he rơp sền gàr ală bơta kuơ niam chài bơh yau kòn cau he dê tàm rài kis. Jơh ală phan pơ dơng lơh yàng ndrờm geh ngui nàng lơh yàng, lơh yàng mbòr dà, hòi dan trồ mìu mờ hòi dan pràn kơldang ndrờm geh gàr sùm bè lài do”.

Ồng Y Bơ̆i Byă pà git tai, kơnờm geh ală gùng dà, broă lơh dà lơgar dê mờ bơta pơgồp bal bơh mpồl bơtiàn dê, mờ rài kis 132 hìu bơnhă làng bol bal mờ rlau 520 nă cau tàm ƀòn Hai ngai sơlơ tam gơl pa. Lơh sa ngai sơlơ bơtàu tơnguh, làng bol git wă uă rlau bè broă sền gàr, lơh niam bơta niam chài krơi is jơi bơtiàn dê:

“Tŭ do, Sờh Niam chài neh pà ƀòn Hai in dùl bòr cing mờ ală blah phan soh ờs mờng kòn cau Rơđê. Tàm nùs nhơm làng bol dê sùm bềng lìu bơta chờ hờp, mờ rơnàng kơnòm să kung gàr sùm bơhiàn ờs mờng bè lơh yàng mờ dròng cing bè dùl bơta niam chài krơi is ƀòn lơgar dê. Bơh ală bơhiàn lơh chờ, lơh yàng ờs mờng, halà lơh yàng dà mbòr, làng bol tàm ƀòn sùm sền gàr mờ lơh gơ rề uă rlau tàm rài kis”.

Sền gàr bơta niam chài bơh yau là sền gàr nggu rơyas mờ bơto wơl ală bơta kuơ dờng màng ală rơnàng tơnơ̆ do in. Mờ bơta pơgồp bal bơh kâp ủy, gơnoar atbồ mờ làng bol dê, bơta niam chài krơi is làng bol kòn cau Rơđê tàm ƀòn Hai dê rơp pơn jat tai geh prap gàr, là dang che tàm bơrkuăt bal mpồl bơtiàn, pơgồp bơnah bơt bơtàu rài kis niam chài ngai sơlơ li la mờ lơh geh bơta tờm ai bơtàu tơnguh kơ̆ kơljap jŏ jòng sùm ƀòn lơgar dê in.