Tàm ngai chờ, càr Gia Lai yal tơnggit ală phan li la ngan, bơh lòt nhơl dà lềng Quy nhơn, bơnơm dờng Pleiku, niam chài cing mồng, lòt nhơl brê bơnơm, phan sa bơh jŏ tàm ƀòn lơgar, ơm rlô să mờ ală phan tơrbŏ bal ală tiah. Jơnau kờñ là lơh nền gơnoar broă Gia Lai dê gơ gơs là anih tus uă bơta sền git. Is ồn, broă lơh tàm tơrbŏ bal mờ ală mpồl lơh sa kă bro tus bơh Hàn Quốc, Nhật Bản, Lo, Ấn Độ, Nga, Australia… geh kơp kơnờm pờ geh tai drà mờ mpồl nac pa ai Gia Lai mờ ală anih tus Việt Nam dê in.

Ồng Hà Văn Siêu - Phó Lam bồ Cục Lòt nhơl Việt Nam đơs sùm, tàm tŭ tơngai jơnau kờñ mờ broă lơh nac lòt nhơl dê tam gơl mhar, bơta ƀuơn bè phan kuơ geh is là ờ hềt tơl. Gah lòt nhơl kờñ pal tam gơl bơh ngui phan kuơ geh is gơ gơs bơt bơtàu bơta kuơ; bơh broă drơng ala rah rài nă să is gơ gơs mpồl lòt sền git; bơh tàm pơrlòng mờ giă gơ gơs tàm pơrlòng mờ bơta niam bal mờ bơta krơi is:

“Bol hi sền gŏ Gia Lai geh tŭ niam dờng ngan, bơh nam lòt nhơl dà lơgar 2026 gơtùi tàm tơrbŏ mờ ală mpồl lơh sa kă bro nàng lơh bal kơnhoàl ù tiah mờ lơh niam bơta niam chài Gia Lai dê. Bol hi hòi jà ală mpồl lơh sa kă bro, ƀòn lơgar, mpồl lơh broă bal hơ pơrgon lơh broă: tơl ƀòn lơgar 1 phan niam krơi is, cèng bơta niam chài mờ bơta pràn krơi is bơh ù tiah, bơh ƀòn lơgar dê. Tơl mpồl lơh sa kă bro 1 jơnau bơceh lơh tam gơl pa, bơceh lơh, lơh gơlik bơta kuơ krơi is, tơnguh bơta pràn tàm pơrlòng, tơl anih tus là dùl jơnau yal niam chài krơi is mblàng wơl bơta gơ kờñ, tàm tơrbŏ bal nùs nhơm kơlôi sơnơng nac lòt nhơl dê”.

Ồng Phạm Anh Tuấn - Chủ tịch Anih duh broă Làng bol càr Gia Lai đơs nền, tơnơ̆ Nam lòt nhơl dà lơgar 2026, ală bơta lơh bal broă drơng ala lòt nhơl rơp geh lơh gơs, phan bơna rơp pơn jat tai geh lơh gơlik mờ ală mpồl nac pa rơp pơn jat tai gơguh uă. Ồng kơp kờñ ală mpồl lơh sa kă bro ờ mìng sền Gia Lai là dùl anih tus pa, mờ bal mờ ƀòn lơgar bơceh lơh ală gùng lòt pa:

“Añ kơp kơnờm ngai lam lơh lòt nhơl Việt Nam dơ̆ 2 tàm Gia Lai geh tai uă broă lơh lơh broă bal, phan bơna pa, uă gùng mờ mpồl nac pa tus Gia Lai kung bè ală anih tus ndai Việt Nam dê. Bol hi kơp kờñ ală mpồl lam lơh lòt nhơl lơh “Bơnơm dờng tàm tìp dà lềng tơlir” bơh dùl jơnau đơs kờñ yal tơnggit gơ gơs dùl gùng lòt nhơl mùl màl, bơh dùl broă lơh nam 2026 dê gơ gơs dùl bơta kuơ bơtàu tơnguh jŏ jòng”.