Show lơh “Hìu jòng” geh 4 bơnah, sơn đờm mờ “Ù tiah kơp kờñ” mờ 3 bơnah tờm “Dring gah”, “Gah” mờ “Ôk”. Cau sền geh tề lam bơh uă anih, bơnah koh gơl bơh rài kis cau Rơđê dê, bơh rài kis pah ngai pơgồp bal mờ brê bơnơm, ting mòc phan, tam phan tàm suơn mìr tus rài kis niam chài, nùs nhơm gơ jat bal mờ hìu jòng.

Ală gùng đơs pơnđik, sap cing, đờng goòng bơh yau kòn cau dê, jơnau đơs khan, bơhiàn lơh yàng, lơh chờ bơh yau mờ tơrgùm mat mpồl bơtiàn geh pơgồp bal mờ niam chài crăp lơh, sòl àng mờ măi mok bơyai lơh. Bơta krơi is broă lơh dê là cau sền ờ mìng trăng sền mờ gam geh ntrờn lòt gan tơl anih, tơmut să jan he tàm bàr pe broă lơh geh lơh wơl, bơh hơ̆ ơm rềp rlau mờ rài kis niam chài ờs mờng cau Rơđê dê.

Ală cau tus bal bơyai lơh ndrờm là cau chài mờ làng bol kòn cau Rơđê. Jơh ală bơnah bơyai lơh ngui dà kòn cau Rơđê dê, pơgồp bơnah gàr bơta niam chài bè ờs bơh anih niam chài geh lơh wơl dê.

Sền broă lơh, mò Lê Thị Lý ơm tàm sơnah ƀòn Buôn Ma Thuột, càr Dăk Lăk pà git, broă lơh do cèng wơl uă bơta kơlôi sơnơng tŭ lơh tơnggŏ wơl rài kis bè ờs, tam bau, bơhiàn bơh yau, phan soh mờ phan dò, phan wan cau ùr Rơđê dê lài do:

“Tŭ añ sền den añ gŏ gơ niam ngan. Añ gŏ rài kis làng bol kòn cau dê rài yau li la ngan mờ gŏ là, ngan là dùl rài niam chài pal prap gàr wơl. Ờ git là Dăk Lăk gơtùi lơh wơl dùl broă lơh niam bè do”.

Ồng Trần Hồng Tiến - Kwang lam bồ Sờh Niam chài, Tàp pràn să jan mờ Lòt nhơl càr Dăk Lăk pà git, broă ai măi mok tàm bơyai lơh ràng tơlik niam chài là gùng lòt dipal mờ jơnau sồr bơtàu tơnguh lơh mờ măi mok niam chài, mờ kung lơh geh bơta pràn lơh gơs ală phan lòt nhơl pa, wèt tus bơt bơtàu phan lòt nhơl niam chài gơtùi gơ hòi gơ jà nac lòt nhơl mờ lơh geh tai bơta kuơ lơh sa bơh niam chài krơi is ƀòn lơgar dê:

“Bol hi kơp gơn do gơ gơs dùl phan lòt nhơl nàng dong gah lòt nhơl bơtàu tơnguh. Tŭ nac lòt nhơl tus mờ Dăk Lăk, lơh bè lơi pal kơp kờñ geh sền ală show lơh tàm anih ngan ngồn bè do”.