Mờ tơngume “Tàm tơrbŏ bal mpồl bơtiàn - Gơ rề bơta niam chài”, do là ngai chờ sơn rờp geh bơyai lơh tơnơ̆ tŭ sàh Phú Túc geh tơng gơs, nàng kờñ pơgồp bơnah prap gàr, lơh niam bơta niam chài ală jơi bơtiàn pơgồp bal mờ yal tơnggit phan lơh gơs bơh suơn sre, phan OCOP ƀòn lơgar dê. Ngai chờ geh bơta tus bal bơh 14 mpồl tus bơh ală thôn, ƀòn tàm sàh, bal mờ 3 mpồl tìp mat lơh kwèng tus bơh ală sàh Ia Rsai, Ia Dreh mờ Uar.

Là dùl tàm ală mpồl geh khà cau tus bal uă ngan, ƀòn Chư Ung sồr rlau 60 nă cau chài, cau pơrlòng mờ cau geh jơng tàm mpồl lơh ngan rơcang ngai chờ in. Bơta tờm mpồl dê tàm Ngai chờ là lơh wơl dơ̆ ñô tơrnờm 3 - dùl bơhiàn lơh yàng bơh yau cèng bơta niam chài krơi is cau Jarai dê. Ồng Nay Noar - Cau chài ƀòn Chư Ung yal:

“Ƀòn bol hi tus bal Ngai chờ Niam chài jơi bơtiàn lơh hìu, lơh wơl bơhiàn ñô tơrnờm 3, bơyai lơh nàng kòn sau tơnơ̆ do in git bơhiàn ñô tơrnờm 3 bơh cau Jarai dê bè lơi. Ƀòn bol hi dê tus bal mờ bơnah bơyai lơh wơl ñô tơrnờm 3”.

Nùs nhơm duh hồl, gơ klŏ gơ crà bơta niam Ngai chờ Niam chài - Tàp pràn să jan ală jơi bơtiàn dùl êt nă cau sàh Phú Túc dê ờ mìng tơrgùm tàm suơn bal Phú Túc mờ gam nggồr chờ tàm gùng lòt tai. Ală dơ̆ bơyai lơh lòt tàm gùng, dròng cing jañ mồng, tamya xoang lơh gơlik nùs nhơm hô hơng ngan. Ală bơta tàp pràn să jan bơh yau bè ƀŏ phe 2 nơm pơrnai, dŏ che, sơnđoh ƀàu, lòt ceh càng èk bal mờ bơnah bơyai lơh soh phan kòn cau gơ hòi gơ jà gal ngan làng bol tàm ƀòn lơgar mờ nac lòt nhơl lòt pơn jờng. Rùp hin niam ngan rlau jơh là ală broă bơyai lơh soh phan kòn cau, pơgồp  bơnah jờng rơ bơta niam phan soh kòn cau dê mờ yal tơnggit bơta niam chài krơi is làng bol kòn cau Jarai dê. Bi Nay H’Dơ tus bơh thôn Lâm Viên pà git:

“Mpồl soh phan kòn cau bol hi dê geh 7 nă cau. Geh 2 yô soh phan kòn cau bè ờs bơh yau. Gam dùl yô geh cau ùr soh phan tam gơl pa. Bơh hơ̆ kờñ ai tơl nă cau in gŏ là, bulah rài kis rài yau halà rài kis pa tŭ do, phan soh digơlan krơi, mơya kung gam cèng bơta niam geh is cau ƀòn lơgar bol hi dê”.

Bơdìh ală broă lơh niam chài - tàp pràn să jan, drà Phan lơh gơs bơh suơn sre OCOP sàh Phú Túc geh 24 anih ràng phan bơh 14 mpồl tus bơh ală thôn, ƀòn, ràng tơlik dồ ròt ală phan sa bơkah ờs mờng krơi is bè: poac kơnrồ ìs dùl ngai, iar buh piang prùh tàm ding đơr, we (do là phan sa ờs mờng kòn cau dê), tơrnờm, blơn bơtang gơm mờ nha bùm blàng, blơn bơtang gơm mờ kơltau kơnrồ, ka bò dà dờng Ba buh… gơ hòi gơ jà gal ngac nac lòt nhơl mờ làng bol ƀòn lơgar lòt sền, blơi mờ sa.

Ồng Ngô Đức Mạo - Kwang Lam bồ Anih tờm Niam chài, Yal jơnau tơnggit mờ Tàp pràn să jan sàh Phú Túc, càr Gia Lai đơs nền, Ngai chờ Niam chài - Tàp pràn să jan ală jơi bơtiàn dùl êt nă cau mờ Drà phan lơh gơs bơh suơn sre, yal tơnggit phan OCOP sàh Phú Túc dơ̆ 1 nam 2026 cèng tus uă broă lơh niam chài krơi is. Tàm ù tiah niam chài, ală cau chài ai tơnggŏ wơl anih pơrjum mpồl bơtiàn, bơyai lơh lơh niam wơl cing, tàñ phan gle dơr, pơrlòng ƀŏ phe, tàñ ồi kòn cau, trah mòn rìp mờ ràng tơlik phan ngui lơh broă sa suơn sre, đờng goòng bơh yau. Bơh hơ̆ pơgồp bơnah prap gàr, lơh niam bơta niam chài ală jơi bơtiàn, yal tơnggit rùp hin ù tiah, kòn bơnus mờ ală phan bơkah tiơng pơn rơ bơh sàh Phú Túc, càr Gia Lai dê:

“Bơh tŭ lơh broă broă lơh gơnoar atbồ ƀòn lơgar 2 kâp tus tŭ do, broă lơh niam chài, tàp pràn să jan tàm kâp hơ đơm ờ huan geh bơyai lơh tai. Bè hơ̆ den tàng nam do, bol hi dan Anih duh broă Làng bol sàh bơyai lơh Ngai chờ Niam chài - Tàp pràn să jan ală jơi bơtiàn dùl êt nă cau nàng kờñ prap gàr, lơh niam bơta niam chài làng bol kòn cau Jarai tàm ƀòn lơgar dê. Bulah priă jền ờ huan geh, broă bơyai lơh tàm kâp hơ đơm, mơya tus tŭ do, ală thôn, ƀòn ndrờm jơh nùs ngan lơh jat, jơh nùs ngan pơlam tàp, rơcang phan ngui bơyai lơh. Ngai chờ lời wơl tềl niam ngan, gơ gơs là bơnàng jă nàng pơgồp bơnah prap gàr, lơh niam bơta niam chài làng bol kòn cau Jarai dê”.

Ngai chờ Niam chài - Tàp pràn să jan ală jơi bơtiàn dùl êt nă cau mờ Drà phan lơh gơs bơh suơn sre, yal tơnggit phan OCOP sàh Phú Túc dơ̆ 1 nam 2026 neh pơgồp bơnah lơh niam rlau tai rài kis làng bol ală jơi bơtiàn dê. Bơta pơgồp bal đah prap gàr bơta niam chài bơh yau mờ yal tơnggit phan lơh gơs bơh suơn sre, phan bơkah tiơng pơn rơ neh pơgồp bơnah sơlơ tơrbŏ kơ̆ mpồl tam klac dờng mpồl bơtiàn ală jơi bơtiàn, mờ kung lơh gơlik bơta tờm bơtàu tơnguh lòt nhơl kơ̆ kơljap jŏ jòng sùm ƀòn lơgar in.