Do là dùl tàm 3 ơdŭ geh pờ jat Rơndap broă sồ 6, Broă lơh jơnau kờñ dà lơgar bơtàu tơnguh lơh sa, mpồl bơtiàn tiah làng bol jơi bơtiàn dùl êt nă cau mờ tiah kơh bơnơm tàm nam do tàm càr Dăk Lăk dê. Ơdŭ bơto dròng cing mờ tam ya xoang kòn cau M’nông tàm xã Yang Tao geh 32 nă cau bơsram bơh 13 tus 54 sơnam tus bal.

Tàm tơngai 1 nhai, ală cau bơsram rơp geh bơsram tam ya xoang mờ dròng 3 jơnau cing kòn cau M’nông bơh ală cau chài tàm ƀòn lơgar bơto tơn. Bơh ơdŭ bơsram do nàng kờñ bơto jơnau git wă, bơta chài kuơmàng bè dròng cing mờ ràng tơlik dròng cing jañ mồng ai ơruh pơnu, kơnòm pa tàu mờ làng bol in. Lơh kah wơl bơta kờñ dròng cing jañ mồng, tơnguh uă bơta gĭt wă sền gàr bơhiàn niam chài niam bơnĕ jơi bơtiàn dê, ngui niam bơta kuơ niam chài cing mồng Tây Nguyên.