Do là broă lơh tàm tơngume dơ̆ lơh chờ Niam să Việt Nam nam 2023 bơh Tổng Lãñ sự quán lơgar Ấn Độ tàm ƀòn dờng Hồ Chí Minh, tìp mat lơh kuèng niam chài đah lơgar Ấn Độ mờ càr Dăk Lăk. Tàm broă lơh, cau sền geh sền ală dơ̆ bơyai lơh niam ngan mờ bềng bơhiàn niam bơnĕ niam chài bơhiàn lơgar Ấn Độ dê bơh mpồl tam ya Kuchipudi, geh 6 nă cau chài lam lài bơh lơgar Ấn Độ dê ràng tơlik.

Dơ̆ ràng tơlik geh sơnđờm mờ bàr pe bơhiàn ràng tơlik, tơnơ̆ hơ̆ tơl nă cau đơs tàm dơ̆ ràng tơlik mờ yal tơngĭt să tờm he dê mờ tơngume bơh jơh jơnau đơs mờ gùng tam ya dê nàng yal tơngĭt bơhiàn niam chài, lơh geh nùs nhơm bơh ală Yàng dê. Tơl jơnau ràng tơlik là dùl jơnau yal bềng jơnau yal yau, jờng rơ dùl nă Yàng tàm bơta pin dờn jăt Yàng bơh lơgar Ấn Độ dê, bè: Yàng bồ rơwas Ghanesha, Yàng Shiva, Yàng Rama, Yàng Vishmu, Yàng Krishna. Mờ ală dơ̆ ràng tơlik duh hồl ngan, gùng tàm ya ngăc ngar, ală dơ̆ ràng tơlik dong cau tus sền in sền gĭt mờ gĭt wă rlau tai bè bơta niam chài niam ngan bơh dà lơgar Ấn Độ dê. Ồng Mahesh Giri, Lãnh sự bơh Tổng lãnh sự quán lơgar Ấn Độ tàm ƀòn dờng Hồ Chí Minh pà gĭt: “Bol añ kờñ gơ rề uă nùs nhơm bơta gĭt gơ̆p đah 2 gah dê mờ gam geh bal bơta gĭt gơ̆p kă bro mờ bơta gĭt gơ̆p niam chài, bơta do kwơ màng rlau ngan. Hơ̆ là jơnau tờm ñchi lơh bol añ tus tàm do mờ rơ̆p pơn jat tai cribơyai ală broă lơh do. Bơta do lơh geh ală bơta gĭt gơ̆p kấp càr tàm bơta gĭt gơ̆p bơh bol he dê, gơ rơ̆p dong bơta gĭt gơ̆p bơh bol he dê gơ gơs đềt mềr rlau tai. Ấn Độ mờ Việt Nam geh bơta gĭt gơ̆p đềt mềr mờ rềp mềr, den tàng bol añ kờñ tơnguh gơnoar bơh bơta gĭt gơ̆p do dê”.