Tơngkah kir sơnrai 77 nam Ngai Cau ling sồt să- Cau ling chơ̆t màng, mang ngai 05/08, tàm Hìu đơs crih dờng Hà Nội, Mpồl Dong kờl hìu bơnhă cau ling chơ̆t màng Việt Nam, Anih Sơñio rùp Măy mŏk sồ VTC, Păng ƀăo Lơh broă mờ Mpồl bơtiàn gơ wèt Ƀộ Lơh broă, Cau ling sồt să mờ Mpồl bơtiàn pơgồp bal mờ Kông ty Pơgồp bal priă Bơtàu tơngguh Mblàng yal jơnau Niam chài Việt Nam mờ ală anih geh gơrềng bơyai lơh Broă lơh Tìp măt lơh kwèng đơs crih tam ya “Kis sùm mờ ù tiah dà lơgar”.

Broă lơh Tìp măt lơh kwèng đơs crih tam ya “Kis sùm mờ ù tiah dà lơgar” geh lơh nàng kờñ pơn jăt tai tàm đòm jăt nùs nhơm “Hùc dà kah tô dà”, “Kis gĭt jơnau gĭt adăt” bơh jơi bơtiàn Việt Nam dê, mơkung hòi jà ală kâp, ală gah broă, ală mpồl cíñ trị- mpồl bơtiàn, mpồl lơh sa kă bro, cau dồ nă să tàm jơh gùt lơgar pơn jăt tai lời ai bơta sền gròi ngan ngồn, kah rơngal ală Mè Việt Nam khin cha jak chài, ală cau khin cha jak chài chơ̆t màng, hìu bơnhă geh sră dong kờl bơh mpồl bơtiàn- cau geh màng mờ kăc màng. Bơh hơ̆, bơto bơtê bơhiàn kăc màng, nùs kờñ gơboh dà lơgar, pơñiờ să jơi bơtiàn mờ yờ tơngguh bơta gĭt wă geh kơnòl bơh rơnàng kơnòm să ngai do dê mờ tơnơ̆ do dê bè bơhiàn ờs mờng bơh yau “Hùc dà kah tô dà” bơh jơi bơtiàn Việt Nam dê.