Tàm rlau 1 nhai, 6 ơdŭ bơto wơl dròng cing jañ mồng, tam ya xoang mờ pơlam tàp bơta chài lòt nhơl mpồl bơtiàn geh bơyai lơh tàm ală ƀòn kòn cau Rơđê tàm ù tiah sơnah ƀòn Buôn Ma Thuột, càr Dăk Lăk gơ hòi gơ jà rlau 130 nă cau bơsram tus bal.

Tàm hơ̆, ală ơdŭ dròng cing mồng geh 60 nă cau bơsram, dềt sơnam ngan rlau jơh là 8 sơnam, dờng sơnam ngan rlau jơh là 35 sơnam. Bơdìh mờ ală jơnau cing kwơ màng, cau bơsram gam geh ală cau chài bơto wơl ală jơnau cing tơnguh uă nàng drơng dơ̆ ràng tơlik tàm dơ̆ lơh chờ mờ broă lơh lòt nhơl. Ală ơdŭ tamya Xoang kung pơgồp bal tơngume kwơ màng mờ tơnguh uă, dong cau bơsram bơsram tàp bơta chài ràng tơlik mờ wă rlau tai bơta kwơ bơh bơta đơs crih tam ya ờs mờng do dê. 

Là dùl tàm ală cau bơsram tus bal mờ ơdŭ tam ya xoang, oh H’Na Si Mlô, ơm tàm ƀòn Đung, sơnah ƀòn Buôn Ma Thuột, pà gĭt, ờ mìng bơsram ală broă tam ya lơm, oh gam wă rlau tai gơtha bơh tơl gùng tam ya dê, bơh hơ̆ sơlơ kờñ mờ kơ̆p kờñ sền gàr bơta niam bơnĕ niam chài bơh jơi bơtiàn he dê. “Oh kơ̆p kờñ là geh uă ală dơ̆ bơsram bè do ai ală oh tàm rơnàng tơnơ̆ do in, kung geh gĭt tus gùng tam ya xoang, nàng gùng tam ya xoang ờ gơtìp roh tĕ”.

Ndrờm bal mờ hơ̆, 3 ơdŭ pơlam tàp bơta chài lơh lòt nhơl mpồl bơtiàn bơh cau pơgru Hìu bơsram kao đảng Lòt nhơl Sài Gòn dê bơto tơn neh rcang ai cau bơsram tàm ƀòn Akŏ Dhông in bơta gĭt wă bè drơng năc lòt nhơl, drơng phan sa mờ bơt bơtàu broă lơh sền gĭt lòt nhơl mpồl bơtiàn.

Mò Phạm Thị Hải Bình, Phó Kwang lam bồ Anih tờm kă bro drơng broă broă lơh dà lơgar sơnah ƀòn Buôn Ma Thuột pà gĭt, broă pơgồp bal bơto wơl dròng  cing jañ mồng mờ bơto bơtê bơta chài lòt nhơl mpồl bơtiàn là gùng lòt pa nàng kờñ lơh geh mpồl tàm pơr dờn mơlà prap gàr niam chài ờs mờng, mơlà ngui geh cồng nha bơta kwơ ù tiah ƀòn lơgar nàng drơng broă bơtàu tơnguh lòt nhơl. “Nam do, bơdìh mờ ală ơdŭ bơto wơl dròng cing jañ mồng, tam ya xoang, sơnah ƀòn neh pơgồp bal mờ Hìu bơsram Kao đẳng Lòt nhơl Sài Gòn pờ 3 ơdŭ tơnguh uă bơta chài drơng năc lòt nhơl in, tơnguh bơta chài drơng broă sa sào gơwèt mờ ală hìu bơnhă geh drơng phan sa mờ bơt bơtàu broă lơh sền gĭt lòt nhơl mpồl bơtiàn. Bơh ală ơdŭ bơsram, cau bơsram geh rcang tai bơta gĭt wă tơl broă lơh lơh ală broă lơh lòt nhơl sền gĭt tàm ƀòn lơgar”.

Tơn jơh ală khoă bơsram, uă cau bơsram neh gơtùi gĭt dròng cing mồng, tam ya xoang mờ gĭt ală bơta chài bơh chờ tàm broă wă rò, drơng năc lòt nhơl. Broă lơh do geh kơ̆p kơnờm pơgồp bơnah prap gàr Ù tiah niam chài cing mồng Tây Nguyên pơgồp bal mờ bơtàu tơnguh lòt nhơl mpồl bơtiàn, lơh geh broă lơh tơn tàm ală ƀòn lơgar.