Bơta dờng pa bơh dơ̆ lơh chờ dê lơh gơlik ù tiah dờng rlau nàng càr Dăk Lăk yal tơnggit gah lơh phan sầu riêng, tàm tơrbŏ bal broă lơh gơlik phan mờ drà kă bro, mờ kung yal tơnggit ală bơta kuơ niam chài, lòt nhơl bơh ù tiah kơh bơnơm mờ tiah kềng gah dà lềng dê.

Đơs sơn đờm dơ̆ mut lơh, ồng Đỗ Hữu Huy, Chủ tịch Anih duh broă Làng bol càr Dăk Lăk pà git, gùt càr tŭ do geh mờr 41 rbô lồ sầu riêng, khà lơh geh kàl tam sầu riêng nam 2026 kờp dŭ geh mờr 500 rbô tấn, is ồn nam 2025 priă lơh geh bơh tac hờ lơgar ndai geh rlau 1 tơmàn 100 tơlak dolar Mỹ. Bơh bơta ƀuơn do, Dăk Lăk git nền pal tơnguh priă lơh geh gah lơh phan do mờ broă pơgồp bal lơh gơlik mờ tơnguh bơta niam, jòi git anih lơh gơlik, lơh gơlik jrô, logistics mờ drà kă bro: “Bol hi git nền pal tam gơl pràn bơh bồ tơngoh kơlôi sơnơng atbồ khà lơh geh broă lơh sa suơn sre gơ gơs atbồ bơta kuơ lơh geh phan suơn sre dê, ờ mìng sền gròi là lơh gơlik geh nđờ tấn, mờ pal sền gròi là tơl lồ lơh gơlik nđờ priă jền, làng bol lơh broă sa geh dờp kuơ gàr lơi, mpồl lơh sa kă bro tus bal kàr lơi tàm mpồl lơh gơlik phan mờ mat kă bro Dăk Lăk geh đal git bè lơi tàm drà ală lơgar”.

Nùs nhơm tơnguh priă lơh geh gah lơh phan kung geh ai tơnggŏ bơh ròt ală broă lơh bơh Dơ̆ lơh chờ sầu riêng Dăk Lăk 2026 dê. Bơdìh mờ anih cribơyai tàm tơrbŏ bal lơh gơlik, tac sầu riêng mờ anih ràng tơlik mìng dùl gah lơh phan, dơ̆ lơh chờ gam geh ală broă lơh hòi jà kă bro phan, tàm pơrlòng giă mờ tac bro sầu riêng tàm suơn, lòt sền suơn tam, dơ̆ lơh chờ phan sa mờ 102 phan sa pơgồp bal mờ sầu riêng. Tàm dơ̆ sơn đờm mut lơh, càr Dăk Lăk kung geh jàu 2 bơta dờng ngan rlau jơh Việt Nam, geh “Sơ̆ sầu riêng dờng ngan rlau jơh Việt Nam” mờ” Broă trŭ gơm mờ ràng tơlik ală phan sa bơh sầu riêng mờ khà uă ngan rlau jơh Việt Nam”. Ală broă lơh do ai gŏ, dơ̆ lơh chờ gam geh rề ơnàng bơh yal tơnggit phan lơh gơs bơh suơn sre gơ gơs tàm tơrbŏ bal kă bro phan, niam chài mờ lòt nhơl. Gơ wèt mờ làng bol Dăk Lăk, broă dơ̆ sơn rờp bơyai lơh dơ̆ lơh chờ tàm kâp càr là tŭ niam nàng sầu riêng geh git tus uă rlau tai, pờ ơnàng tai drà kă bro mờ lơh gơlik bơta gơn kơnờm bơtàu tơnguh gah phan. Ồng Bùi Văn Duy, ơm tàm sơnah ƀòn Buôn Ma Thuột pà git: “Nac bơh ală tiah ndai tus mờ nùs nhơm làng bol dê chờ hờp ngan wèt hờ dơ̆ lơh chờ ngai do. Sầu riêng do gam geh bơta sền gròi ờ mìng tàm Việt Nam mờ gam tàm ală lơgar gùt dar bol he dê tai, den tàng kờñ pal geh gùng dà nàng bơtàu tơnguh gơ in pràn nàng bơt bơtàu lơh sa ngai sơlơ bơtàu tơnguh rlau”.

Dơ̆ lơh chờ sầu riêng Dăk Lăk nam 2026 tài bè hơ̆ den tàng ờ mìng là dùl broă yal tơnggit phan bơna, mờ gam geh kơp kơnờm gơ gơs là broă sơn rờp nàng ƀòn lơgar tơnguh gơnoar broă gah lơh phan, rề ơnàng tàm tơrbŏ bal mờ rơhời lơh gơs dùl dơ̆ lơh chờ geh bơta gơ rề ơnàng rlau tàm ală nam tus.