Jăt tơngu me lơh broă bal, bơta pràn “Pang sră rùp ù tiah càr Khánh Hoà pal tơrlòng” rơ̆p yal khà măt ală ù tiah niam, nhơl sền, phan sa mờ hìu trŭ phan sa pơnrơ ngan geh gah lòt nhơl càr rơwah, đal git mờ tơrgùm jăt tơl tŭ. Bơh phan lơh broă, cau năc gơtùi sền jơnau yal tơngit, git ù tiah kờñ tus, hòi rơndeh, kờñ phan sa ha là dan yal lài anih sa tơn tàm dùl tơngu me lơh. Broă lơh rŭ geh lơh ală broă lơh ai lài nàng lam cau năc lòt nhơl in lòt sền ală tiah tus krơi is càr Khánh Hoà dê.

Bàr gah kung rơ̆p pơgồp bal lơh khà măt “Ală phan sa pal tơrlòng” mờ “Hìu trŭ phan sa pơnrơ ngan càr Khánh Hoà dê”, yal ală bơta kwơ phan sa càr dê, mờ dong kờl ală hìu kă bro geh tus bal mờ măi mok sồ, rề ơnàng bơta pràn tơrbŏ bal mờ cau năc. Đơs tàm dơ̆ kĭ hơ bal, mò Thái Thị Lệ Hằng, Kwang lam bồ Sờh Niam chài, Tàp pràn să jan mờ Lòt nhơl càr Khánh Hoà pà git, broă lơh broă bal là broă lơh mùl màl nàng lơh jăt jơnau kờñ tam gơl sồ bơh gah lòt nhơl dê, tơnguh bơta pràn măi mok nàng tơrbŏ bal ală bơta kwơ, yal geh cồng nha tiah tus, niam chài mờ phan sa càr dê. Bơh tŭ hơ̆, pơgồp bal tàm broă tơnguh uă broă lòt nhơl sền bơh cau năc dê, tơnguh bơta pràn tàm pơrlòng bơh tiah tus càr Khánh Hoà mờ wèt tus jơnau kờñ ai càr gơs tiah rơwah lài ngan bơh cau năc lòt nhơl tàm lơgar mờ ală lơgar dê: “Sờh kĭ hơ bal lơh broă bal mờ Grab tơlik măt phan ngui yal ờ uă tiah tus, hìu trŭ sa, hìu tăc phan sa mờ măt sơnđan “Hìu sa pơnrơ”, nàng yal cau năc lòt nhơl in. Tŭ cau năc tus càr Khánh Hoà pờ Grab, rơ̆p gŏ yal phan sa càr Khánh Hoà tàm hơ̆ dê. Do là phan lơh sa sồ mờ lòt nhơl ngăc ngar”.

Broă lơh tơngu me măi mok sồ geh bơyai lơh tàm bơta lòt nhơl càr Khánh Hoà pơn jăt tai gơguh pràn, mờ di pơgăp 12 tơlăk nă cau năc lòt nhơl, tàm hơ̆ geh rơlao 4 tơlăk 600 rơbô nă cau năc lòt nhơl tus bơh ală lơgar neh tus càr Khánh Hoà tàm nam do; priă geh bơh lòt nhơl geh rơlao 42 rơbô tơmàn đong. Bơh ngai 17 tus ngai 19 nhai 7 tus, Festival Dà lềng càr Khánh Hoà 2026 rơ̆p bơyai lơh mờ rơlao 40 broă lơh niam chài, đơs crih tamya, tàp pràn să jan mờ lòt nhơl, kờp dŭ geh bơh 600 rơbô tus 800 rơbô nă làng bol mờ cau năc tus, ai geh tai bơta pràn kàl lòt nhơl càr Khánh Hoà dê in.