Tus bal ơdŭ bơsram geh 30 nă cau bơsram là ơruh pơnu mờ cau chài kòn cau Rơđê tàm sàh Ea Phê. Tàm 25 ƀùi bơsram, ală cau bơsram geh Cau chài jak ồng Y Phôn Ksor mờ Cau chài jak ồng Vũ Lân tus bal tơn bơto yal wơl bơta chài dròng cing mồng, tam ya xoang mờ bơsram tàp ală jơnau cing ờs mờng kòn cau Rơđê dê.

Bal mờ bơsram jơnau tàm pơ àr, cau bơsram rơ̆p geh bơsram tàp dròng cing, mơkung cih wơl, kŭp video, lơh sồ jơnau bơsram nàng drơng ai broă lơh prap gàr phan lời wơl in. Oh Y Li San Kbuôr ơm tàm ƀòn Puăn, sàh Ea Phê chờ hờp yal: “Ƀòn kòn geh mpồl cing mồng, kòn kờñ ngan. Kòn kờñ bơsram dròng cing nàng tus bal mờ mpồl dròng cing. Ngai do geh bơsram kòn gơlơh chờ hờp ngan”.

Lài hơ̆, ngai 7/7, gah niam chài sơnđờm pờ ơdŭ bơto yal wơl sơnggơr yô, mồng 3, cing 5 bơh kòn cau Bahar dê tàm thôn Xí Thoại, xã Xuân Lãnh; ngai 8/7 sơnđờm pờ ơdŭ bơto yal wơl sơnggơr yô, mồng 3, cing 5 pơgồp bal mờ tam ya xoang bơh kòn cau Prum Hroi tàm Hìu bơsram kấp Bàr Jơi bơtiàn ơm sa ngai Đinh Núp, sàh Phú Mỡ. Bal mờ ơdŭ tàm sàh Ea Phê, dơ̆ do càr Dăk Lăk pờ 3 ơdŭ bơto yal wơl niam chài jơi bơtiàn, tơl ơdŭ geh 30 nă cau bơsram mờ kờp dŭ lơh sir lài mờ ngai 30/8.

Jat mò Nguyễn Thụy Phương Hiếu, Phó Kwang lam bồ Sờh Niam chài, Tàp pràn să jan mờ Lòt nhơl càr Dăk Lăk, tơnơ̆ 3 ơdŭ bơto yal wơl bơh sơnrờp, gah niam chài rơ̆p pơn jat tai pờ tai uă ơdŭ bơh priă jền Broă lơh jơnau kờñ dà lơgar mờ lam lơh ală gùng dà broă lơh pa bè pràp gàr niam chài cing mồng. “Ală ơdŭ bơto do lơh jat Broă lơh 1719 ai priă bơh nam 2025 dê, gam wơl broă lơh bơh nam 2026 den rơ̆p geh uă ơdŭ pơlam tàp rlau, tơrgùm lam lơh jat tơngume Broă lơh lơh broă sồ 14 bơh càr dê kung bè là Jơnau lơh nền tàm pơrjum sồ 03. Kung kơ̆p kờñ là ală sàh, sơnah ƀòn tơnggơs ală mpồl cing mồng jat jơnau sồr pa bơh Jơnau lơh nền 215 bơh Chính phủ dê, tŭ mut lơh broă den geh đau gùng dà broă lơh dong kờl niam ngan rlau jơh”.