Dùl tàm ală bơta tơngŏ tờm là broă càr Khánh Hoà mùl màl tơlik măt phan ngui sồ bè phan lời wơl niam chài kòn cau Prum mờ ràng tơlik tàm internet. Broă lơh jăt măi mok sồ jơh dong kờl ală bơta kwơ niam chài kòn cau Prum lik bơdìh hìu prăp gàr phan kwơ yau ha là tiah tềl kah yau, drơng tàm broă kơlôi sơnơng, bơto bơtê, yal mờ tơrbŏ bal mờ cau năc lòt nhơl tàm lơgar mờ bơh ală lơgar dê.

Jăt ală mpồl lơh sa kă bro đơs, bơta tờm kờñ gàr jơng cau năc lòt nhơl ờ mìng là ù tiah niam mờ gam là ală jơnau yal bè niam chài bơh tơl phan lời wơl dê. Bơh tàm nùs nhơm kơlôi sơnơng do, bơta niam chài kòn cau Prum ờ mìng là phan bơna pal prăp gàr mờ gam gơs bơta kwơ nàng bơ̆t bơtàu ală phan lòt nhơl krơi is, geh uă broă lơh. Ồng Alain Nguyễn, Kwang Lam bồ dờng Tiah ơm rơlô să Hoàn Mỹ, càr Khánh Hoà pà git: “Bơcri priă tàm càr Khánh Hoà neh 10 nam, ngai sơlơ bol añ sơlơ gŏ geh kwơ, bơta niam chài krơi is kòn cau Prum dong kờl bol añ geh ală jơnau nàng yal. Den tàng, bol añ ờ ngòt nàng yal bơta niam chài kòn cau Prum, bơh tŭ hơ̆, bơtàu tơnguh ală phan lòt nhơl niam chài ală jơi bơtiàn dê. Ờ di tus lơgar Việt Nam mìng geh um dà lềng, ờ di mìng geh sa là gơtùi, mờ gam pal là niam chài nàng cau jòi sền, nàng git wă, cau yal wơl nàng ală oh kòn cau in git”.

Ală cau jăk đơs là, tam gơl sồ gam pờ geh dơ̆ niam nàng ai phan lời wơl niam chài kòn cau Prum tus rềp rơlao mờ cau năc lòt nhơl bơh tàm ală phan ngui măi mok sồ bal mờ măi mok lơh broă pa. Mơya, nàng geh gal cau năc kờñ git nền nòn bơta niam chài, broă tam gơl sồ pal lòt bal mờ tơnguh uă bơta niam cau lơh broă. Mpồl cau pơlam jơnau, cau lơh broă lòt nhơl mờ bơh mpồl bơtiàn lơh broă phan lời wơl pal geh rơcang lài jơnau git wă nàng mblàng di nền nòn bơta niam chài tus mờ cau năc lòt nhơl in.

Phó Pơgru dờng, Tiến sìh ồng Ngô Văn Doanh, là cau tàm Mpồl duh broă Phan lời wơl niam chài dà lơgar lài do đơs: “Git wă nền nòn den neh niam ngan bloh, ƀuơn tàm broă yal, niam bơnĕ ngan, mhar ngan. Mơya bơta kờñ pal là wă nền nòn ală bơta kwơ niam chài, jơnau git wă ờ uă den mìng đơs gời, ờ loh làng. Tàm hơ̆ uă ngan là cau năc lơgar bơdìh, tŭ cau năc do tus tàm do, bơta ngăc ngar bơh cau năc do neh is, ờ mìng lòt nhơl bè ờs, mờ ală cau năc do gam geh bơta ngăc ngar rơlao mờ cau pơlam jơnau dê”.

Bơdìh mờ broă tơnguh uă bơta niam phan lòt nhơl niam chài, broă rề ơnàng drà kă bro cau năc bơh ală lơgar mờ ală phan krơi is kung kờñ pal geh sền gròi rơlao. Dùl gùng lòt pa geh sền gròi là bơtàu tơnguh lòt nhơl Halal pơgồp bal mờ niam chài gah jăt yàng Islam kòn cau Prum dê.

Jăt ală cau lơh broă kơlôi sơnơng yal, bal mờ broă tơnguh khà cau năc tus bơh Trung Đông mờ ală lơgar jăt yàng Islam, broă lơh ală broă lơh drơng ala geh khà Halal pơgồp bal mờ jòi sền bơta niam chài krơi is kòn cau Prum rơ̆p pờ geh tai bơta pràn bơtàu tơnguh ai gah lòt nhơl in. Bi Huỳnh Thanh Tâm, lơh broă tàm Mpồl kơlôi sơnơng bè Jơi bơtiàn mờ Kòn bơnus ƀòn dờng Hồ Chí Minh mblàng: “Bŭ lah mpồl bơtiàn cau jăt yàng Islam tàm ƀòn dờng Hồ Chí Minh ờ gal, mơya do là tiah tờm lơh sa dờng ngan bơh gùt lơgar dê, gam geh uă cau bơcri priă, cau năc bơh ală lơgar tàm Trung Đông gơtùi ngui ală broă lơh drơng ala Halal dê, pơgồp bal mờ niam chài gah jăt yàng Islam kòn cau Prum kis bơh yau tàm ƀòn dờng Hồ Chí Minh”.

Gơwèt mờ càr Khánh Hoà, do là càr gam ngui mpồl gơlang kòn cau Prum geh pơrnơ ngan bal mờ mpồl bơtiàn kòn cau Prum ơm kis bơh yau, prăp gàr phan lời wơl sùm pơgồp bal mờ gơnoar tờm bơh mpồl bơtiàn dê. Mò Thái Thị Lệ Hằng, Kwang Lam bồ Sờh Niam chài, Tàp pràn să jan mờ Lòt nhơl càr Khánh Hoà đơs là, tŭ làng bol tus bal tơn tàm broă prăp gàr mờ ngui bơta kwơ niam chài, phan lời wơl ờ mìng geh prăp gàr mờ gam lơh geh broă lơh kơl jăp bơh broă bơtàu tơnguh lòt nhơl dê. 

Mò Thái Thị Lệ Hằng pà git: “Nđan lah he ờ prăp gàr, ờ ngui ală bơta kwơ niam chài nàng tŭ cau năc lòt nhơl tus càr Khánh Hoà den rơ̆p git tàm do geh mpồl bơtiàn kòn cau Prum, geh uă bơta niam chài krơi is, geh uă bơta phan lòt nhơl niam bơnĕ nàng lơh lah ờ?. Bơh tŭ hơ̆, bơto bơtê nàng gơboh kờñ bơta kwơ niam chài ờs mờng, ală broă lơh niam chài gơtìp roh di gơlan geh prăp gàr gơtùi”.

Gơtùi gŏ, tàm rài pa, prăp gàr niam chài kòn cau Prum ờ gam mìng là prăp gàr ală bơta kwơ bơh rài lài do mờ là lơh geh tai bơta pràn kis ai phan lời wơl in. Tŭ măi mok pa, bơta ngăc ngar bal mờ mpồl bơtiàn geh lơh broă bal, bơta niam chài kòn cau Prum rơ̆p ờ mìng geh prăp gàr mờ gam gơs bơta tờm bơtàu tơnguh lòt nhơl, pơgồp bal tàm broă bơ̆t bơtàu gah lơh sa niam chài mờ yal rùp rài lơgar Việt Nam dê tus mờ dunia.