Nùs nhơm lòt nhơl duh hồl tàm ală anih tus tiah đah jum càr Khánh Hòa, ù tiah Ninh Thuận lài do. Ală ƀlàng dà lềng bè Ninh Chữ, Vĩnh Hy, tiah ơm rlô să kềng gah dà lềng, anih lòt sền niam chài, ƀòn lơh broă bơh yau bè Bàu Trúc, Mỹ Nghiệp gal ngan nac lòt nhơl. Dilah Nha Trang pơn rơ mờ lòt nhơl dà lềng, ơm rlô să den Phan Rang - Ninh Thuận yau geh bơta ƀuơn bè ù tiah gam bè ờs, phan lời wơl niam chài, phan lơh gơs bơh suơn sre tiơng pơn rơ. Bi Huỳnh Trọng Lượng - nac lòt nhơl bơh Nha Trang tus Phan Rang đơs:

“Niam chài, tiah tềl kah yau tàm Nha Trang neh bơtàu tơnguh bè lòt nhơl rlau. Tàm tŭ hơ̆, Phan Rang den kung gam uă bơta niam bè ờs bơh yau, gam prap gàr ală bơta kuơ niam chài ờs mờng, is ồn là bơta niam chài krơi is làng bol kòn cau Prum dê. Ală phan lòt nhơl tàm do kung li la ngan sơl bơh phan soh, phan kir sơnrai, chèu pơn tus ală phan mòn mờ tê, dong nac lòt nhơl geh tai uă bơta sac rơ wah nàng sền git mờ blơi phan, sền niam ngan”.

Bơh tơnơ̆ tơrgùm dùl mờ Ninh Thuận, càr Khánh Hòa lơh pràn yal tơnggit, hòi jà lòt nhơl, tàm hơ̆ bơta tờm là Festival Dà lềng Khánh Hòa 2026 mờ tơngume “Gơklŏ gơ crà dà lềng dờng - Brồ guh ndrờm pal ală lơgar” geh lơh bơh ngai 17 tus ngai 19/7. Bơdìh Nha Trang, uă broă lơh geh bơyai lơh tàm tiah đah jum càr bè Ràng tơlik mờ lơh ngan ngồn phan lời wơl niam chài phan ù buh Bàu Trúc, tàñ phan Mỹ Nghiệp tàm sàh Ninh Phước; nhơl đờng goòng kòn cau, tamya kòn cau Prum tàm Kuơ̆ Po Klong Garai; broă lơh đơs crih tamya tàm gùng, niam chài rơndeh bơkàu tàm sơnah ƀòn Đông Hải.

Is ồn tàm sàh tiah kơh bơnơm Lâm Sơn bơyai lơh Dơ̆ lơh chờ plai chi mờ cuh phău bơkàu. Broă pờ ơnàng ù tiah Festival Dà lềng tus uă tiah gam pơgồp bơnah lơh niam bơta kuơ niam chài bơh jŏ tàm do, lơh gơlik tai phan lòt nhơl mờ broă lơh sa làng bol in.