Ngai lồi poh, Hìu rông ƀòn Đăk Pơkao, sàh Tơ Tung nggồr chờ sap ntas cing mồng. Kra ƀòn ồng Đinh Plơnh - cau neh geh uă nam kơ̆ dơn, jơh nùs bơto wơl dròng cing jañ mồng mờ đơs pơnđik ai rơnàng kơnòm să in yal:

“Añ lơh ngan bơto wơl kòn sau in git bè cing mồng mờ đơs pơnđik nàng niam chài kòn cau Bahnar dê ờ gơtìp roh huĭ. Tài bơh sap cing mồng neh gơ mut tàm poac, tàm mhàm cau Bahnar he dê rau. Bơh tŭ gam dềt, bic tàm ơyun klo sap cing mồng gờm chờ tòm nhai tus tŭ cau kra sang rài. Añ sùm tơngkah ală sau là dròng cing ờ di mìng nàng bơyai lơh gơ in chờ hờp mờ pal dròng cing mờ jơh nùs jơh tồr he dê, pal git kis lơbơn niam, git ơt ơl mờ gơ rờm bal mờ cau mpồl bal. Bòr cing mìng gơtùi dròng gơ gơs sap niam tŭ jơh tơl nă cau dùl nùs bal”.

Kung đềt mềr mờ sap ntas cing, dar tamya xoang bơh tŭ gam dềt, cau chài ồng Đinh Hdot sền gròi uă ngan tus bơta chài mờ huềng bơh tơl jơnau cing dê tŭ bơto wơl. Ồng mblàng lơh loh:

“Tơl jơnau cing cau Bahnar tàm Tơ Tung dê ndrờm gơ jat bal mờ dùl bơhiàn lơh yàng ngan ngồn, geh tŭ den nggồr chờ sa piang kòi pa, geh tŭ den rơlĕ rơlùn, king crŭ tàm dơ̆ lơh yàng sa rơpu. Tŭ bơto ală sau in, añ pal tề lam tơl bơta ià gai, bơta chài tam cah sap ntá sbè lơi gơ in di. He lơh pơgru den pal jơh nùs, pal bơto wơl bơta ki ngàm gơ wèt mờ đờng goòng bơh yau, geh bè hơ̆ den hơ̆ sồng sap cing Dăk Pơkao gơtùi gàr bơta niam, bơta pơn yờ să tiah brê bơnơm dê”.

Bơdìh mờ sap cing nggồr chờ, ală jơnau pơnđik kòn cau Bahnar bơkah tồr, ală jơnau yal yau hơ-mon khin cha jak chài kung là bơta niam ròng siam nùs nhơm git nđờ rơnàng cau, gam geh ală cau chài jơh nùs bơto wơl cau kơnòm să in. Ồng Đinh Bri - ơm tàm ƀòn Đăk Pơkao, sàh Tơ Tung yal:

“Bơta kal ke bơh đơs pơnđik dê là pal geh sap jòng, geh nùs nhơm pơyua tàm jơnau pơnđik. Tŭ do, rơnàng kơnòm să ƀuơn ngan kờñ gùng đơs crih pa tàm điện thoại. Ală cau kra bè bol hi pal ai tŭ trồ mang, tơl ngai ơm rlô nàng đơs pơnđik ală sau in iat, mìng kơp kờñ tơmut tàm nùs ală sau bơta kờñ gơboh dà đơs, jơnau pơnđik mò pàng dê”.

Kung geh bơta kơlôi rơcang bè hơ̆ sơl, cau chài ồng Đinh Plih ơm tàm ƀòn Leng, sàh Tơ Tung yal:

“Bol hi lơh ngan pờ ơdŭ bơto cing mồng mờ đơs pơnđik tàm ƀòn Đăk Pơkao ai ală sau in, jơh ală tài kơnòl mờ mò pàng mờ mpồl bơtiàn. Añ chờ hờp ngan tài gơnoar atbồ sàh Tơ Tung sùm sền gròi, lơh gơlik bơta niam. Bol hi lơh ngan pơgồp bal broă bơto tàm ală dơ̆ pơrjum kàl rlô bơkang, pơrjum tàm hìu rông. Gŏ ală sau kờñ lòt bơsram, bal mờ gơp pơlam tàp, ală bơta glar bòl bol hi dê gơ lơh bè roh jơh. Cồng nha lơh geh tus tŭ do neh geh 2 mpồl cing mờ đơs pơnđik kơnòm dềt mờ 3 mpồl cau ràm să”.

Ală bơta lơh ngan ờ ơm rlô bơh ală cau chài tàm sàh Tơ Tung dê neh mblàng wơl bơta kờñ gơboh niam chài kòn cau Bahnar tus ală cau kơnòm să tàm pơ dờn wơl. Bi Đinh Văn Anging, dùl tàm ală cau pơn rơ tàm ală srơh niam chài đơs crih tamya bơh ơruh pơnu sàh Tơ Tung đơs:

“Bol oh ưn ngài ngan ală pơgru bè ồng Plơnh, ồng Hdot neh ờ git glar bòl ngai mang bơto bol oh in. Să tờm oh là dùl nă cau kơnòm să, git loh là dilah bol oh ờ lơh, ờ dờp kơnòl den tơnơ̆ do tŭ ală cau chài kra, ờ sô, den bơta niam chài hơ̆ rơp gơ rê tềng lơi. Oh sùm sơnơng là pal bơsram jak, ờ mìng bơsram dròng cing jak mờ gam bơsram bơta chài lơh niam wơl cing, bơsram bơta chài kah jơh ală jơnau cing, jơnau pơnđik yau nàng tơnơ̆ do gam bơto wơl ală oh dềt rlau in tai”.

Ờ mìng ơm wơl tàm broă sền gàr niam chài tàm ƀòn,c au chài kơnòm să Đinh Ơng gam ai ală bơta niam chài kòn cau Bahnar dê pơnđàng tàm mạng sàh hội, wèt tus ù tiah dờng ơnàng rlau tai:

“Niam chài cau Bahnar dê tàm Tơ Tung do niam krơi is ngan mờ bềng bơta niam chài kòn bơnus. Añ sùm sơnơng là, bơdìh broă bơyai lơh tàm ală ngai chờ ờs mờng, cau kơnòm să pal ngui măi mok, mạng sàh hội mờ ală tŭ niam tìp mat lơh kwèng niam chài gùt lơgar nàng yal tơnggit bè cing mồng, jơnau pơnđik kòn cau Bahnar dê tus mờ nac lòt nhơl rềp ngài. Tŭ niam chài bơh yau pơgồp bal mờ bơtàu tơnguh lòt nhơl mpồl bơtiàn, rài kis làng bol rơp bơtàu tơnguh rlau mờ hơ̆ kung là broă kơ̆ kơljap ngan rlau jơh nàng prap gàr phan lời wơl.”

Tàm hìu rông jơnhua, bơnhă ồs ndu gơn rơh kung gam hìr sùm bè rài cau khin cha jak chài Núp dê, sap cing mồng bơrlŭ bal mờ tamya xoang, jơnau pơnđik kung gam geh đơs sùm tàm làm gùt brê bơnơm Tơ Tung. Bơta niam chài jơi bơtiàn gam geh tàm pơ dờn, pơgồp bơnah bơt bơtàu ƀòn lơgar Tây Nguyên ngai sơlơ niam bơnĕ.