Phan lòt nhơl ngăc ngar càr Lâm Đồng dê tŭ do neh tơrgùm jơnau yal tơngit bơh mờr 1 rơbô 700 hìu năc ơm, 928 hìu trŭ sa, 283 tiah lòt nhơl, 137 anih tăc phan, 617 anih nhơl chờ pơrài bồ tơngoh mờ 644 anih geh kwơ mpồl bơtiàn.

Do là tơngu me tờm kwơ màng drơng tàm broă atbồ dà lơgar, hòi jà yal lòt nhơl, mờ ai jơnau tơngit tơl bè anih tus mờ ală broă lơh drơng ala lòt nhơl nàng làng bol, cau năc lòt nhơl in. Mò Lê Thị Trúc Linh, Phó Kwang lam bồ Sờh Niam chài, Tàp pràn să jan mờ Lòt nhơl càr Lâm Đồng pà git, càr kung neh lơh màh QR ai jơnau tơngit tàm uă tiah lòt nhơl pơnrơ ngan tàm càr dê.