Tàm nùs nhơm hô hơng mờ nggồr chờ bơh Ngai chờ dê, ù tiah tàm Ƀlàng dờng ngai 16 nhai 4 bềng lìu bơta gơ klŏ gơ crà bơh ồi kòn cau mờ sap ntas ală bơta đờng goòng bơh yau dê. Tàm sap sơng gơr Paranưng, sap uh kơmbuat Saranai bè lơh gơ chul nùs cau, bi David - dùl nă nac lòt nhơl tus bơh lơgar Mỹ chờ hờp yal:

“Añ kờñ ngan gùng đơs crih kòn cau Prum dê, añ gŏ gơ niam ngan, geh kuơ ngan tàm nùs, git tai bè nùs tồr kòn bơnus tai. Do là ồi kòn cau ờs mờng cau Prum dê tus bơh ƀòn Mỹ Nghiệp, là phan kuơmàng ngan nàng prap gàr ai rài tơnơ̆ do in”.

Ngai chờ ngan ngồn neh lơh gơs dùl pang rùp niam chài li la bơta gơ klŏ gơ crà, nggồr chờ bơta hô hơng mờ bềng lìu bơta kơp kờñ brồ guh tàm rài pa. Bơta gơ hòi gơ jà bơh ngai chờ dê ờ mìng gơ ơm tàm ală phan lời wơl krơi is mờ gam gơ ơm tàm nùs nhơm tam klac, bơtòm tơrgùm niam chài làng bol bơh làm gùt ală tiah dê. Ơm tàm nggùl ƀlàng dờng gơ̆ glŏ gơ crà bơkàu, bồng bi, ồng Mô Ha Mad tus bơh càr An Giang chờ hờp đơs:

“Bơta niam krơi is bơh tơl tiah dê geh ai tơnggŏ niam ngan. Añ là cau Prum Islam, ai do là Prum Bà Ni, Prum H’roi… Tơl tiah geh bơta niam krơi is, geh bơta gơ tàm bởlrŭ bal, bơh hơ̆ sơlơ tơnguh rlau tai bơta tam klac bal”.

Ngai chờ Niam chài kòn cau Prum mờ broă lơh kâp dà lơgar là cơng tàng niam ngan ai bơta kis sùm bơh niam chài jơi bơtiàn dê tàm tŭ tơngai tam gơl pa. Mờ càr Khánh Hòa, ngai chờ geh kuơ is ồn ngan. Tơnơ̆ tŭ tơrgùm dùl, Khánh Hòa geh dùl ù tiah bơtàu tơnguh pa - tiah bơtòm tơrgùm uă tiah tềl kah yau, bồt dà lềng bal mờ bơta pràn dờng ngan bè lòt nhơl, jak chài măi mok mờ lơh sa dà lềng. Do là bơta ƀuơn dờng ngan nàng càr tàm tơrbŏ bal bơnĕ bơnài đah prap gàr phan lời wơl mờ bơtàu tơnguh kơnhăp jŏ, đah sền gàr niam chài mờ tam gơl pa bơceh lơh. Đơs nền bơta kuơmàng bơh broă sền gàr phan lời wơl dê, ồng Nguyễn Việt Hùng - Chủ tịch Anih duh broă Làng bol càr Khánh Hòa đơs loh:

“Bol hi pin dờn là, kờñ lòt mhar pal bơcri priă ai phan bơna bơt bơtàu in mơya kờñ lòt ngài den pal bơcri ai niam chài in, ai kòn bơnus in. Hơ̆ ờ mìng là bơta sac rơ wah càr Khánh Hòa dê mờ là kơnòl càr Khánh Hòa dê gơ wèt mờ bơta bơtàu tơnguh kơ̆ kơljap dà lơgar dê, jơi bơtiàn dê. Tơl rơnàng mìng lòt bal mờ dà lơgar dùl gơl gùng mơya niam chài rơp lòt bal mờ jơi bơtiàn sùm sùm”.

Nàng lam lơh ngan ngồn broă rơndap lơh hơ̆, Khánh Hòa gam lơh ngan pơgồp bal mờ ală ƀộ, gah broă lơh dà lơgar, ală cau kơlôi sơnơng jak chài mờ mpồl bơtiàn nàng bơt bơtàu sră nggal UNESCO cih mat phan lời wơl niam chài ờ di phan bơna “Lam lơh ngan ngồn bơta pin dờn duh khoai Mè Thiên Y Ana” kòn cau Prum dê mut tàm mat phan lời wơl niam chài ờ di phan bơna ala mat kòn bơnus dunia dê. Tŭ do, Khánh Hòa wèt tus lơh niam gơnoar broă là tiah tờm prap gàr, kơlôi sơnơng mờ yal tơnggit niam chài kòn cau Prum jơh bal tiah kềng gah dà lềng đah jum tàm gùl lơgar mờ Tây Nguyên dê.