Ală ngai lồi poh pa do, tiah tơnao dà Ea Kao, sơnah ƀòn Ea Kao, càr Dăk Lăk gơs tiah tus lòt nhơl duh hồl ngan mờ git nđờ jơ̆t rơbô nă làng bol bal mờ cau năc. Ală broă lơh bè lơh sàl nàng ơm, was SUP, tơnpar klềng ha là par zu tơrlòng gam lơh gơs dùl bơta niam pa, geh uă nùs nhơm jòi kờñ git mờ pơgồp bal mờ ù tiah geh is. Bơh dùl tiah tơnao dà ngềt ngơ̆t, tơnao dà Ea Kao gam rơhời gơs tiah tus lồi poh bơh làng bol bal mờ cau năc dê. Ồng Lê Trương Quân, tàm ƀòn Cư̆ Mlim, sàh Ea Kao pơnyờ să ngan tŭ sàh geh tiah lòt nhơl niam bơnĕ. “Tàm ală ngai do añ gŏ cau năc lòt nhơl tus tềng tơnao dà Ea Kao gal ngan, is ồn là tàm ƀùi mho. Tàm do geh ală broă lơh bè lơh sàl, was plung, đơs crih, cau năc tus chờ hờp ngan, gal ngan. Añ kung kơno tus do geh rơndăp broă lơh ƀlàng golf tàm Ea Kao tai, mơya tus tŭ do kung gam ờ hềt gŏ lơh sơl, kung kơ̆p gơn geh mŭt lơh nàng Ea Kao geh niam bơnĕ rơlao, cau năc tus ngai sơlơ gal rơlao, làng bol geh tai broă nàng kă bro”.

Rơndăp broă lơh ƀlàng golf Ea Kao neh geh tàm rơndăp ù tiah bơh uă nam do, mơya tus tŭ do kung gam ờ hềt geh lơh. Di lah geh bơcri priă lơh ndrờm bal, bal mờ anih ơm rơlô să, kă bro phan mờ broă lơh drơng ala gùt dar tơnao dà, tiah do gơtùi lơh niam rơlao bơta geh lài ù tiah niam, mờ ai tai broă lơh mờ tơnguh geh bơta kwơ ai lòt nhơl sàh do in.

Càr Dăk Lăk geh bơta pràn bè lòt nhơl dờng, mơya tus tŭ do kung gam ờ hềt geh ƀlàng golf niam mŭt lơh broă. Tàm tŭ hơ̆, lòt nhơl golf là bơnah broă lơh gam gơguh mhar, hòi jà mpồl cau năc geh khà priă tă uă mờ tơngai ơm jŏ. Den tàng, rơndăp ù tiah pa geh ai bơtàu tơnguh 6 rơndăp broă lơh ƀlàng golf mờ kờp jơh priă lơh rơlao 11 rơbô tơmàn đong tàm Ea Kao, Buôn Đôn, Bình Kiến, Tuy An Nam… nàng lơh gơs mpồl phan lòt nhơl golf pơgồp bal mờ ơm rơlô să, niam chài mờ ù tiah niam. Jăt ồng Trần Tiến Lợi, Chủ tịch Tơrgùm ală mpồl hìu ù càr Dăk Lăk đơs, do là bơnah broă geh bơta pràn ai lòt nhơl sàh do in. “He ờ gơtùi sền golf là môn tàp pràn să jan bè ờs nàng pơrài bồ tơngoh, mờ pal là gah lơh sa broă lơh drơng ala tờm ngan. Lơh geh mpồl lơh broă bal, pơgồp bal mpồl, lơh geh mpồl pơgồp bal nền nòn, ƀlàng golf, ƀlàng rơndeh par, hìu ơm mờ anih tus, nàng lơh gơs phan lòt nhơl tơrgùm jơh tơn. Ală rơndăp broă ù tiah lơh ƀlàng golf niam bơnĕ neh lơh gơs ală bă ù klàr gơs ală bă ù geh uă biàng, ai geh git nđờ rơbô broă lơh”.

Ờ mìng ƀlàng golf, rơndăp ù tiah lơh niam wơl tơnơ̆ mờ tơmŭt bal gam pờ geh bơta pràn bơtàu tơnguh lòt nhơl pa tŭ dơ̆ sơnrờp càr Dăk Lăk tơrgùm geh bal bơta pràn brê bơnơm dờng mờ dà lềng. Tàm khà 257 rơndăp broă lơh geh ai lài hòi jà bơcri priă tơngai sơnrờp, geh 32 rơndăp broă gơwèt gah lòt nhơl ơm rơlô să, ƀlàng golf mờ tàp pràn să jan mờ jơh priă bơcri lơh mờr 127 rơbô tơmàn đong. Tiah đah măt tơngai Lik geh ai gùng dà broă lơh nàng bơtàu tơnguh lơh anih ơm rơlô să, ƀlàng golf mờ tiah drà broă lơh drơng ala; tiah măt tơngai Mŭt lơh geh bơta pràn brê, lơh sa suơn sre mờ niam chài bơh mờr 50 jơi bơtiàn dê nàng lơh gơs ală phan lòt nhơl krơi is.

Jăt ồng Lê Phúc Long, Phó Kwang Lam bồ Sờh Niam chài, Tàp pràn să jan mờ Lòt nhơl càr Dăk Lăk đơs, rơndăp ù tiah dơ̆ do ờ mìng rề ơnàng tiah bơtàu tơnguh mờ gam lơh geh tơngu me adăt boh lam kwơ màng nàng hòi jà ală cau bơcri priă jŏ jòng. “Do là tơngu me adăt boh lam kwơ màng ngan nàng hòi jà, jà ală cau bơcri priă dờng gam sền gròi tus tàm ală tiah tơrgùm lơh lòt nhơl, ơm rơlô să tiah niam. Jơnau kờñ bơh lòt nhơl càr Dăk Lăk dê tàm tơngai tus là bơcri priă bơtàu tơnguh ală phan lòt nhơl tơlir, kơl jăp mờ đềt mềr mờ tiah kis”.

Nàng ală gùng dà broă lơh tàm rơndăp ù tiah kờñ gơs lơh, càr Dăk Lăk ai geh bal mờ lơh gơs phan bơna rơ̆p tơrgùm lơh geh tiah bơcri priă ndrờm bal, rơcang lài lơh geh bă ù kloh niam, bơsong ală gơkòl bè tơm ntrờn ù tiah mờ lơh broă bal mờ mpồl lơh sa kă bro tàm broă lơh jăt rơndăp broă. Ồng Đỗ Hữu Huy, Chủ tịch Anih duh broă Làng bol càr Dăk Lăk đơs nền: “Càr Dăk Lăk hơ lơh broă bal mờ mpồl lơh sa kă bro tàm jơh rài kis bơh rơndăp broă lơh dê, hơ rơcang lài ai geh bă ù kloh niam, lơh mhar broă tơm ntrờn, dong kờl, lơh geh ƀòn ơm kis pa, tơm ntrờn ù tiah. Gơwèt mờ ală rơndăp broă lơh tờm, rơndăp broă lơh pràn, ală rơndăp broă geh gơrềng dờng tus mờ lơh sa mpồl bơtiàn càr dê, kwang đơng lam càr rơ̆p sồr bơsong tơn kal ke, gơkòl, gàr niam broă tơm ntờn ù tiah geh lơh ndrờm bal, di mờ jơnau geh ai”.

Bơh rài kis pa gam lơh gơs tềng gah tơnao dà Ea Kao tus mờ nùs nhơm kơlôi sơnơng bơtàu tơnguh jòng bơh brê bơnơm dờng tus dà lềng, càr Dăk Lăk gam geh dơ̆ niam nàng lơh geh dùl bơta pràn bơtàu tơnguh dờng ơnàng.