Bơh tàm tŭ rơ̆p 4 jơ 30 phút àng drim, ƀòn tras ka Mũi Né (sơnah ƀòn Mũi Né, càr Lâm Đồng) kơno nggồr săp cau tŭ ală mpồl ơhò lơh ka rê tơnơ̆ mờ dùl mang lơh ka tàm dà lềng. Git nđờ rơhiang nơm ơhò lơh ka mờ plung wil lơh mờ đơr tơrgùm tềng gah dà lềng, tàm tŭ tàm ƀlàng dà lềng, broă blơi phan tàm dà neh sơn đờm ur ar ngan. Sền bơh đang ñhoa, git nđờ rơhiang nơm ơhò lơh sa bal mờ plung wil lơh mờ đơr neh ơm jăt gah dà lềng tơlir, lơh geh dùl pang rùp krơi is bơh ƀòn tras ka Mũi Né dê pah tŭ àng drim gờñ.

Tàm do, plung wil lơh mờ đơr là phan pal geh nàng pơn diang cau bal mờ phan tàm dà bơh ơhò lơh ka rê tus hờ ù gờl. Nùs nhơm chờ bơh drà tăc àng drim gờñ ur ar tŭ làng bol mờ cau lòt blơi ka tơrgùm tềng ƀlàng dà lềng blơi phan tàm dà pa geh cèng rê tus hờ gờl. Ală thùng ka ris geh làng bol mhar tam cah is tơn tàm ƀlàng dà lềng lài mờ tŭ jun tus ală drà mờ hìu blơi.

Tơnơ̆ mờ dơ̆ tăc phan tàm drà, ală cau lơh ka den tă ală jàl nàng tàñ wơl, rơcang ai dơ̆ lòt lơh ka pơn jăt tai in. Dà lềng mù, uă cau rơcang lài khòm kràng mờ rơwah phan tàm dà jăt gah dà lềng, pơgồp bal tàm broă jòi geh tai priă. Tơnơ̆ mờ ală tŭ lơh broă jal mhar, ƀòn tras ka rơhời gơs wơl ngềt ngơ̆t bè ờs. Mpồl ơhò lơh ka ơm jăt gah dà lềng tơlir niam tàm bơta măt tơngai sòl duh.

Ờ mìng là anih lơh broă nàng geh phan ngui sa tàm rài kis bơh uă rơnàng cau lơh ka dê, ƀòn tras ka Mũi Né gam prăp gàr ală bơta niam krơ is tàm rài kis bơh ƀòn kis jăt gah dà lềng dê. Ală dơ̆ ơhò rê lơh ka tŭ àng drim gờñ bơh đah măt tơngai lik, bơta niam cau blơi tăc phan geh lơh bơh dà lềng ur ar, rùp cau was plung wil lơh mờ đơr, rùp cau tàñ wơl jàl ha là git nđờ rơhiang nơm ơhò lơh ka ơm jăt gah dà lềng tàm bơta trồ tơngai duh neh lơh gơs dùl pang rùp lơh broă bè ờs mơya geh uă bơta pràn kis.

Bơh tàm pơn jăt rài kis bè ờs do, neh pơgồp bal tàm broă lơh gơs bơta niam bơnĕ krơi is ngan bơh Mũi Né dê, do là tiah cau năc lòt nhơl ờ mìng sền gŏ bơta niam bơh dà lềng dê mờ gam sền gŏ nhơm tă bơh bơta mùl màl bơh dùl ƀòn tras ka ờs mờng kung gam geh prăp gàr sùm bơh uă rơnàng dê.