Nàng di tŭ tơlik măt tàm dơ̆ bơyai lơh Festival Dà lềng, Sờh Niam chài, Tàp pràn să jan mờ Lòt nhơl càr Khánh Hoà pơgồp bal mờ Băo mờ Pờ tơlik jơnau đơs, Sơnio rùp Khánh Hoà bal mờ ală cau jăk, neh lơh broă mờ bơta pràn uă nàng tơmŭt jơh tàm măi mok sồ rơlao 20 khà măt tiah niam, tiah tềl kah yau mờ tiah lòt nhơl pơnrơ ngan bè Kwơ̆ gơlang Mò Pô Nagar, Kwơ̆ gơlang Trầm Hương, Hòn Chồng, Anih kơlôi sơnơng Dà lềng dờng, Hìu đơs crih Đó, ƀlàng dà lềng Nha Trang… Jơnau tơngit geh tơmŭt 3D, kŭ rùp flycam, kŭp rùp 360 độ mờ geh bơsong tơn tàm tiah hơ̆ nàng gàr niam bơta di pal lài mờ tŭ tơmŭt tàm măy mok sồ.

Ồng Nguyễn Xuân Duy, Phó Kwang lam bồ Báo mờ Pờ tơlik jơnau đơs, Sơnio rùp càr Khánh Hoà pà git, broă pơgồp bal đah sră ƀăo mờ măi mok sồ rơ̆p ai geh gùng dà broă yal pa, dong kờl cau năc lòt nhơl in geh tìp mờ jơnau tơngit mờ sền tiah tus nhơl tơn bơh lài mờ tŭ lòt: “Bơta pràn bè sră ƀăo uă bơta phan den bol añ ờ mìng lơh jăt kơnòl mblàng yal mờ gam lơh broă bal tàm broă lơh jăt măi mok sồ jơh ală tiah tus mờ broă pơgồp bal rùp, măi mok bal mờ jơnau tơngit. Tàm tơl jơnau, bol añ dong kờl cau năc lòt nhơl ƀuơn tàm broă tìp jơnau tơngit, lơh mờ tus sền ală tiah. Măi mok sồ là phan lơh broă, gam sră ƀăo là cau yal jơnau tŭ bàr bơta tờm do pơgồp ndrờm bal, tơl tiah tus nhơl sền ờ mìng geh yal mờ gam geh pơlam nùs nhơm, ai geh bơta lơh pràn kơl dang”.

Uă măi mok sồ bè lòt nhơl càr Khánh Hoà ờ mìng yal bè rùp ală tiah tus mờ gam tơrgùm bal dơ̆ lòt sền 3D, sră rùp ù tiah sồ, ai tơngŏ tiah, tam gơl priă jền, dan geh dơ̆ lòt nhơl tơn tàm internet, sơnio hìu năc ơm, hìu sa, rơndeh lòt, ală broă lơh Festival Dà lềng bal mờ uă bơta kwơ bè ƀlàng ơn rơndeh, dong kờl, lơh sơnơm, pơs wàs kloh niam mpồl bơtiàn… Bơh tŭ hơ̆, cau năc lòt nhơl gơtùi rơcang lài jòi git jơnau tơngit, lơh geh tơngai lòt mờ pơgồp bal tàm internet mờ ală broă lơh drơng ala lòt nhơl tơn tàm điện thoại at tê. Do geh sền là dơ̆ tam gơl bơh broă yal bè ờs tus mờ bơ̆t bơtàu bơta niam lòt nhơl ngăc ngar, ai broă kờñ nhơl sền bơh cau năc lòt nhơl lơh tờm. Lŏ Bùi Thị Ngọc Trâm, sàh Khánh Vĩnh, càr Khánh Hoà kơ̆p gơn: “Lài do den oh kung sền là ală măi mok sồ sơl bè bơta niam chài kòn cau Prum mờ mùl màl là niam bơnĕ ngan tài rùp niam, jơnau tơngit geh sền gŏ tơn mờ ƀuơn lơh tai. Măi mok sồ pa kung bè hơ̆ sơl, mìng kờñ geh dùl gùng link là gơtùi jòi gŏ jơh càr Khánh Hoà tơrgùm dềt ƀuơn ngan nàng yal ală bơyô tàm tiah ngài in”.

Jăt mò Hoàng Thị Bích Hạnh, lơh broă tàm Anih tờm Dong kờl tam gơl sồ sră ƀăo, Cục Sră ƀăo gơwèt Bộ Niam chài, Tàp pràn să jan mờ Lòt nhơl pà git, ală cau jăk chài neh tơrgùm bơsong, sền nàng git jơnau tơngit nàng gàr niam măi mok sồ bè lòt nhơl càr Khánh Hoà lơh broă di mờ tơngai geh ai. “Tŭ do geh rơlao 20 tiah tus pơnrơ ngan mờ càr Khánh Hoà neh rơwah nàng tơmŭt tàm măi mok sồ. Jơh ală cau tàm mpồl tơrgùm uă ngan ai broă mblàng, bơsong ală jơnau tơngit, Sền wơl, sền nàng git mờ ai ngui ală tơngu me nàng tơmŭt tàm măi mik sồ”.

Tơlăk măt di tàm dơ̆ bơyai lơh Festival Dà lềng càr Khánh Hoà 2026, Măi mok lòt nhơl sồ - Jơnau bơto sồr lòt nhơl tàm măi mok sồ càr Khánh Hoà ờ mìng drơng ai cau năc lòt nhơl in tàm kàl lơh chờ mờ gam ai geh tơngu me tờm jơnau tơngit ngui bal ai gah lòt nhơl in, pơgồp bal tàm broă bơ̆t bơtàu càr Khánh Hoà gơs tiah tus ngăc ngar, lơh pa mờ geh uă bơta pràn tàm pơrlòng.