Cau chài ồng Y Kŭt Niê sơn đờm đềt mềr mờ jơnau pơnđik mờ đờng goòng ờs mờng kòn cau dê bơh tŭ 18 sơnam. Ồng yal, rài yau ờ geh sră pơ àr, ơdŭ bơsram bè tŭ do, ồng mìng git lòt jat ală cau kra ƀòn, cau chài dờng sơnam, iat khi đơs pơnđik, sền khi dròng cing hơ̆ sồng bơsram rơhời dơ̆ dùl êt: “Añ git đơs pơnđik mờ nhơl đờng goòng kòn cau bơh tŭ 18 sơnam. Lài hơ̆, añ sùm iat ală cau chài lòt lơh hơ̆ sồng bơsram đòm jat. Rơhời den añ geh mờng chài mờ sơn đờm bơto wơl kòn sau tàm ƀòn in. Nam 2007, añ geh dơ̆ bơto ală oh tàm Hìu bơsram kòn cau ơm sa bic tơn. Mìng tơnơ̆ 3 nhai bơsram, ală sau neh git dròng cing dồ bă chài ngan. Tơnơ̆ hơ̆, añ pơn jat tai tus bal Mpồl đơs crih tamya kòn cau tàm Đồng Mô, Sơn Tây, Hà Nội mờ đềt mềr mờ mpồl tus nam 2019”.

Jat tŭ tơngai, ală gùng đơs pơnđik kòn cau Rơđê, sap cing lơngô mờ sap ntas jơnhua bơh kơmbuat đĭng năm dê neh gơ gơs dùl bơnah ờ gơtùi ờ geh tàm rài kis bơh ồng Y Kŭt Niê dê. Ờ mìng nhơl chài ngan, ồng gam git mòn is ală bơta đờng goòng bơh yau. Bơta kuơmàng rlau là ồng Y Kŭt niê ờ gàr ală bơta kuơ hơ̆ ai mìng is să tờm he in. Gơ wèt mờ ồng, broă bơto wơl ai cau kơnòm să in là kơnòl bơh cau lam lài dê: “Nàng gơtùi mòn gơs dùl nơm kơmbuăt đĭng năm, sùm pah roh mờr nggùl nhai. Dilah ờ ru uă broă ndai den geh tŭ pal roh mờr 1 nhai den hơ̆ sồng gơtùi mòn gơs. Jat añ den ală cau lòt lài kờñ pal geh kơnòl bơto wơl ai rơnàng kòn sau in nàng ờ lơh roh huĭ bơta niam chài krơi is kòn cau he dê. Ai ală bơyô kơnòm să den pal rơcang lài jòi broă nàng git, tìp mat lơh kwèng mờ rơnàng lòt lài nàng bơsram, bơ tơl tai jơnau git wă mờ bơta chài gơ in niam rlau”.

Cau chài ồng Y Kŭt Niê sùm geh làng bol ki ngàm ngan lài bơta lơh krơh lài mờ nùs nhơm geh kơnòl. Ồng kung gam kơ̆ dơn sền gàr mờ lơh gơ rề bơta niam chài ờs mờng bơh yau, bơh broă mòn, uh kơmbuăt đĭng năm, dròng cing tus broă tus bal ală srơh bal bơh ƀòn lơgar dê, bơto wơl ai rơnàng kơnòm să tàm ƀòn lơgar in. Bi Y Tía Niê, ơm tàm ƀòn Ea Mblay, sàh Mdrăk, càr Dăk Lăk là dùl nă cau bơh mpồl cing geh ồng Y Kŭt Niê bơto yal: “Cau chài ồng Y Kŭt Niê là dùl nă cau lơh krơh lài tàm ƀòn. Tàm tŭ bơhiàn bơh yau, bơta niam chài kòn cau he dê gam rơhời roh huĭ, ồng kung gam kơ̆ dơn sền gàr mờ lơh gơ rề uă, bơh broă uh kơmbuăt đĭng năm, dròng cing tus jơh nùs ngan tus bal ală srơh ƀòn lơgar dê. Is ồn, wa sùm jơh nùs bơto wơl ai rơnàng kơnòm să in, kơp kờñ ală oh git, kờñ mờ tàm pơ dờn wơl bơta niam chài kòn cau he dê”.

Mờ bơta kơ̆ dơn, bơta jơh nùs mờ bơta kờñ gơboh bềng lìu ngan gơwèt mờ niam chài jơi bơtiàn, cau chài ồng Y Kŭt Niê neh mờ gam pơgồp bơnah kuơmàng tàm broă prap gàr, ngui niam ală bơta kuơ niam chài bơh yau kòn cau Rơđê dê. Ală broă ngềt ngơt hơ̆ ờ mìng gàr wơl sap cing, jơnau pơnđik ai tŭ do in mờ gam tàm pơ dờn wơl bơta niam chài ai ală rơnàng tơnơ̆ do in tai.