Deh nam 1966, cau chài mò Mlop, kòn cau Bahnar ơm tàm ƀòn Brel Dôr 2, xã Glar, kơnhoàl Đăk Đoa, càr Gia Lai bơh tŭ gam dềt neh kờñ ngan tàñ ồi kòn cau. Bơh sơn rờp, ồi kòn cau bơh mò dềt tàñ mìng ngui tàm hìu bơnhă halà pà ai jơi nòi in. Mơya bơta kờñ gơboh neh lơh mò pơn jat tai gàr sùm broă tàñ ồi kòn cau tus tŭ do.

Nàng gàr sùm broă tàñ ồi kòn cau mờ mò pàng lời wơl neh kal ke, mờ kờñ bơtàu tơnguh broă do den sơlơ kal ke rlau. Ờ di cau lơi bơsram kung git tàñ, tàñ niam, mờ pal geh bơta chài, geh nùs nhơm kơ̆ dơn tai. Mò Mlop yal, bơta chờ hờp dờng ngan rlau jơh là nam 2006, Mpồl lơh broă bal Broă lơh sa mờ Tàñ ồi kòn cau Glar geh lơh, gơ gơs là anih nàng bơto broă tàñ ồi kòn cau làng bol in: “Bal mờ tàñ ồi kòn cau añ kung bơto tàñ ai uă cau ùr tàm ală thôn ƀòn in, hơ̆ sồng bơto ală sau ùr in tàm kàl rlô bơkang. Ală nam rềp ndo, añ kung gam lòt bơto ală sau kòn cau Bahnar tàm An Khê in, tàm tiah hơ̆ rài yau kung geh uă cau git tàñ sơl, mơya neh gơtìp roh huĭ rơhời. Añ ờ ngòt lòt ngài nàng bơto. Ai tàm ƀòn den ƀuơn rlau, añ gơtùi bơto bơh drim tus mho tàm hìu, ờ geh bơta lơi”.

Rlau 30 nam lòt jat bơta kờñ gơboh tàñ ồi kòn cau, pờ git nđờ rhiang ơdŭ tàñ ồi kòn cau, mò Mlop geh làng bol hòi là Pơgru bơto tàñ ồi kòn cau. Tàñ ồi kòn cau neh gơ gơs là broă tàm pơ dờn wơl hìu bơnhă dê, kòn ùr tơnhua là bi Mlơnh kung tàm pơ dờn broă mè dê sơl. Bi Mlơnh neh chài ngan bơh bơceh lơh, lơh pa ală bơta ồi kòn cau nàng di mờ jơnau kờñ phan soh, phan ngui tŭ do. Bi Mlơnh yal: “Tàñ ồi kòn cau ờ lơh geh priă jền uă ờ, uă ngan là nàng sền gàr broă bơh yau mò pàng dê lời wơl. Tàñ ồi kòn cau gơtùi lơh tŭ ru broă suơn sre mờ lơh geh tai priă jền hìu bơnhă in”.

Ai bi Seo, 36 sơnam ơm tàm ƀòn Brel Dôr 2, tơnơ̆ tŭ jơh bơsram ơdŭ tàñ ồi kòn cau geh mò Mlơp jà ơm wơl lơh broă tàm Mpồl lơh broă bal đơs: “Añ lơh tàm do neh uă nam. Geh hìu bơnhă mơi Mlop dong añ in geh broă lơh, añ chờ hờp ngan. Tơnơ̆ do añ rơp lơh ngan nàng tàñ gơs uă phan niam tac cau blơi in. Lơh ndo rơp dong să tờm he git prap gàr broă bơh yau mờ mò pàng neh lời wơl”.

Mờ bơta đơng lam, atbồ bơh mò Mlop dê, tŭ do, Mpồl lơh broă bal Broă lơh sa mờ Tàñ ồi kòn cau Glar gàr sùm broă lơh ai mờr 20 nă cau lơh broă tờm ngan. Ală tŭ ru broă lơh suơn sre, Mpồl lơh broă bal geh pơgap 100 nă cau lơh broă. Bơdìh mờ tàñ ồi kòn cau nàng pơyua anih blơi in tac, Mpồl lơh broă bal gam dờp, kĭ sră pơrgon tàñ ală bơta ồi kòn cau jat jơnau sồr bơh cau blơi dê tai. Mò Mlop pà git, tŭ do, ồi kòn cau ờ mìng tac tàm càr Gia Lai mờ gam tac tàm ală càr Dăk Nông, Dăk Lăk, Kon Tum, geh tŭ tac tàm Nha Trang, Đà Nẵng, Hồ Chí Minh: “Tŭ do neh geh điện thoại, he kă bro, pơyua rơndeh jun pơndiang kung ƀuơn sơl. Cau blơi den pơyua priă bơh tài khoản den tàng kă bro ƀuơn rlau. Phan tac kung yòm đau, ngan là ồi mbơn, àu cau ùr, àu cau klau, kơldung triau… añ tàñ, mai jat rùp rài pa, sền gơ lơh niam mat mơya kung gam gơtùi gàr bơta niam bơh yau den tàng geh uă cau blơi. Geh cau blơi bơh lơgar Mỹ, lơgar ndai khi rê nhơl kung blơi uă sơl”.

Mờ bơta kờñ gơboh mờ broă tàñ ồi kòn cau, cau chài mò Mlop mờ ală cau chài tàm Mpồl lơh broă bal Broă lơh sa mờ Tàñ ồi kòn cau Glar, kơnhoàl Đăk Đoa, càr Gia Lai ờ mìng gàr sùm broă lơh bơh yau, ai geh broă lơh, tơnguh priă lơh geh, mờ gam pơgồp bơnah sền gàr mờ ngui niam bơta niam chài cau Bahnar dê tai.