Niam să ồng Alíp! Chờ hờp ngan geh tơm boh bơr mờ ồng tàm jơnau Bơta niam chài ală kòn cau Tây Nguyên ngai do. Ơ ồng, dan ồng pà git cing mồng geh gơtha bè lơi tàm rài kis làng bol Bahnar dê?

Cau chài ồng Alíp: Lài ngan dan pơyua jơnau lùp còp, jơnau ưn ngài tus làng bol mờ gơp bơyô iat rơdô.. Cing mồng den gơ geh kuơ dờng ngan tàm rài kis bơh git nđờ rài do. Bơta kuơ gơ dê gơ ơm tàm broă ngui tàm ală dơ̆ lơh yàng, lơh chờ dờng, tàm broă ies ƀồc, lơh yàng duh khoai pơn yơu bè lơh yàng sa rơpu, lơh yàng sa ơseh,… ndrờm ngui cing mồng lơm. Mờ rài yau den pal là hìu pas sơm hơ̆ sồng geh cing mồng, blơi dùl bòr cing mồng kung pal tam gơl mờ git nđờ nơm rơpu, kơnrồ. Cing mồng geh ngui ai jơh gùt ƀòn lơgar in, den tàng gơ geh kuơ jơh bal bè nùs nhơm mờ phan bơna.

Digơlan tài bơh ồng git bơta kuơ dờng màng cing mồng dê den tàng neh đềt mềr mờ cing mồng bơh tŭ gam dềt, mờ neh gơ gơs là bơta kờñ gơboh tàm rài kis ồng dê, hơ̆ ơ ồng?

Cau chài ồng Alíp: Cing mồng neh jat añ bơh tŭ gam dềt tus tŭ do, sap cing sùm lơh añ in kah tus ală dơ̆ lơh yàng ờs mờng bè bơyai lơh pơthi. Să tờm añ den kơnờm geh bơsram bơh bèp ồng den hơ̆ sồng git ngui cing mồng, añ mờng lòt jat khi dròng cing jañ mồng tàm ală ngai bơyai lơh tòm nhai, lơh pơthi, khat dùl dơ̆ lơh yàng lơi ngui cing mồng añ ndrờm lòt jat lơm.

Bè hơ̆ den bơh ală dơ̆ lơh yàng, ồng neh bơsram bơta chài dròng cing, jañ mồng mờ tơmut huềng nùs he tàm ală sap cing mồng. Ồng gơtùi yal bơta kơlôi sơnơng ồng dê bè bơta do sơl?

Cau chài ồng Alíp: Tàm ală dơ̆ lơh yàng, klo sap cing den tơl nă cau rơp tàm jà gơp tus, bal mờ gơp dròng cing, tamya xoang, chờ hờp ngan, kuơmàng den tàm ngai bơyai lơh pơthi là chờ hờp ngan rlau jơh.. den tàng pal kơp tus trồ mang hơ̆ sồng tus he geh dròng. Tàm trồ mang den ală cau dròng cing jak sùm lơh lài, tài tŭ do ală ùr ơruh gam tamya xoang, ală klau pơnu kờñ ai tơnggŏ bơta jak chài he dê den tàng kờñ bơsram tŭ do là ờ gơtùi, pal kơp tus tŭ trồ jrô bơnăng, uă cau bơñul dròng cing ờ jai tai, tŭ do den rơp geh cau bơto he in, bơh hơ̆ den he bơsram rơhời. Dơ̆ 2 ai là tŭ ờ tơl cau den bol hi dan mut dròng ala, dan dròng bơh ală bơta cing dềt, dròng bơh jơnau cing ƀuơn rơhời den dròng ală bơta cing dờng, dròng kal ke tus tŭ dròng chài bè tŭ do.

Ơi, mờ bơta kờñ gơboh bal mờ lơh ngan bơsram, đòm jat, lòt gan nđờ jơt nam pơlam tàp, digơlan là ồng neh prap gàr geh uă mờng chài kuơmàng tàm niam chài dròng cing jañ mồng?

Cau chài ồng Alíp: Să tờm añ git dròng uă ngan jơnau cing, kờp bal jơnau cing yau halà ală jơnau cing pa tŭ do. Pơn yơu bè tàm dơ̆ lơh yàng tòm nhai, bơyai lơh pơthi den dròng ală jơnau cing chờ hờp, ndang, ai tàm ală dơ̆ bơyai lơh yàng duh khoai bè lơh yàng sa rơpu, kơnrồ, ơseh den dròng ală jơnau cing ndai. Lơh yàng sa rơpu den geh tơl cing mờ mồng, ai lơh yàng sa kơnrồ, ơseh den mìng ngui mồng lơm gời. Dròng cing l ơh yàng sa rơpu mờr ndrờm bè dròng cing sơn đờm ngui hìu rông. Đơs bal jơnau cing yau kung uă ngan, ai jơnau cing pa tŭ do den hòi là jơnau cing Jrai, geh sap dròng li la ngan, gơguh tus git nđờ jơt jơnau cing.

Bè hơ̆ den nàng ală jơnau cing do ờ gơtìp roh huĭ, dùl nă cau chài geh broă lơh lơi nàng bơto wơl rài tơnơ̆ in halà ờ, ơ ồng?

Cau chài ồng Alíp: Añ bơto cing mồng neh 11, 12 nam do. Khà ală sau bơsram, geh lơh sră dờp là cau chài kơnòm să tàm ƀòn mờr 40 nă. Tŭ do, ală sau kờñ ngan tus bal ală dơ̆ lơh yàng, ală dơ̆ tàm pơrlòng. Añ sùm kơp kờñ ală rơnàng tơnơ̆ do gàr sùm jơnau cing niam bèp ồng dê den tàng añ neh lơh ngan bơto wơl, bơto khi in ală jơnau cing ngan ngồn nàng khi in git, kờp bal mờ jơnau dròng cing, đờng T’rưng halà đờng Ting ning.

Ơi, dan ưn ngài ồng Alíp neh tus bal dơ̆ tơm bơh bơr do!