Hìu mò Xong tàm tiah tàm gùl ƀòn Kon Wang, sàh Tân Tiến, càr Dăk Lăk, sùm kơno săp ntas pơnồt brài. Cau ùr neh rơlao 60 sơnam mơya kung gam ngai pah ngai nggui tềng bơnơ̆ tàñ ồi, mpàng tê chài kèr to pơnồt brài, tàñ gơs ală pang ồi geh uă dà sơng niam bơnĕ ngan. Mò Xong pà git: “Añ sơn đờm git tàñ ồi là kơnờm bơh mè bơto. Tŭ hơ̆, añ bơsram ndang mờ tàñ ndang, añ lơh broă tàm mìr bal nàng geh phan sa hìu nhă in. Tơnơ̆ mờ tŭ mè chơ̆t, añ lơh ngan is uă ngan. Tŭ bao, ròng kòn mờ lơh broă ndang, añ kung gam bơsram tai broă tàñ ồi, bơh pang ồi yùp tus mờ ồi mbơn ào ờs mờng. Tŭ kòn neh dờng, añ geh uă tơngai nàng tơrgùm tàñ, tàñ gơs uă ngan pang ồi nàng ngui tàm hìu nhă bal mờ tăc ală cau tàm ƀòn in”.

Bơh bơnơ̆ tàñ bè ờs hơ̆, mò Xong ờ mìng geh tai priă mờ gam bơto broă tàñ ồi nàng oh kòn bal mờ ală cau tàm ƀòn in nàng pơn jăt tai prăp gàr bơta niam chài jơi bơtiàn dê. Tŭ do, tàm sàh Tân Tiến, càr Dăk Lăk neh lơh geh dùl mpồl tàñ ồi yau geh 7 nă cau, mờ uă sơnam krơi is. Lŏ Phân, dùl nă kòn mò Xong dê pà git: “Lài ngan añ bơsram bơh mè, tơnơ̆ do mè añ chơ̆t, añ pơn jăt tai bơsram mờ mơi Xong. Mơi bơto añ tàm broă dang che brài, ai che dà sơng, lơh phan bơka. Tŭ do añ neh tàñ gơs pang ồi mă kòn, pang ồi tơ̆. Mơ añ chài ngan tàm broă pơgồp bal dà, gùng che brài niam, phan bơka ờs mờng niam bơnĕ ngan. Añ mờ oh mi gơboh kờñ ngan, kơ̆p kờñ geh mơi bơto uă rơlao. Ưn ngài mơi Xong neh gàr broă tàñ ồi do. Bol añ rơnàng kơnòm să rơ̆p pơn jăt tai, bañ lời broă tàñ ồi gơtìp roh”.

Ồi yau geh mpồl do tàñ tàm sàh Tân Tiến lơh gơs neh geh uă ngan làng bol kờñ dan blơi nàng ngui. Pa do, dùl hìu tàñ mai phan tàm sơnah ƀòn Buôn Ma Thuột, càr Dăk Lăk pơyoa mò Xong in 7 thùng che len, kờñ tàñ ào ờs mờng kòn cau Sơdàng dê nàng tăc mờ ai ơpah. Ồi yau kòn cau Sơdàng mờng geh 3 dà tờm hơ̆ là: kò, jù mờ tơlir dimơ. Ồi yau geh gùng kò mờng ngui tàm ală dơ̆ lơh chờ, phan bơka lơh tơngŏ àng gơcrà niam bơnĕ ngan. Ồi yau gùng jù là lơh pơgăp bè ù tiah, trồ tiah. Phan bơka geh lơh rùp bè nùs nhơm tam klăc bal, dong kờl bal bơh mpồl bơtiàn dê. Ồi yau gùng tơlir dimơ lơh geh bơta pràn kơnòm să, pa, gơdờp mờ phan soh tàm dơ̆ lơh chờ mờ tìp bal bơta niam chài… Lŏ Phan, dùl nă cau kis tàm ƀòn Ea Mao, sàh Tân Tiến yal: Ală ngai chờ lơi tàm ƀòn, cau lơi kung soh phan ờs mờng kòn cau Sơdàng dê. Soh phan gŏ gơlơh pơnyờ să ngan. Mò ồng neh lời wơl, mờ tŭ do gam geh ală mò, ală cau chài  bè mò Nhân, mò Nhoa, hơ̆ là mò Xong gàr broă tàñ ồi, den tàng bol añ sơlơ git ưn ngài, mờ sơlơ kờñ mbơn, soh phan ờs mờng kòn cau dê. Ồi yau do tàñ niam ngan mờ kơl jăp tai”.

Mờ nùs nhơm kờñ gơboh bal mờ broă lơh ngan, cau chài Xong neh mờ gam gàr sùm broă tàñ ồi yau kòn cau Sơdàng dê. Bơh mpàng tê chài mò neh bal mờ ală cau ùr tàm sàh Tân Tiến tàñ gơs ală pang ồi niam bơnĕ ngan cơn đoà jăt jơng kòn sao tàm rài kis tŭ do.