Bol he gam iat dùl gơl uh kơ wào mờ đơs kưt bơh cau chài bi Y Đhin Niê, mat mờng hòi là bèp Ruin dê ơm tàm ƀòn Triă, sàh Ea Tul, càr Dăk Lăk dê uh mờ đơs. Bi là cau chài kơnòm să ờ huan geh ngan gam git yal khan Rơđê, git mòn kơ wào bơh yau kòn cau Rơđê dê. Cau chài bi Y Đhin yal, kơ wào ờ mìng là ding gle ờs mờng, mờ cèng tàm hơ̆ jơh dùl jơnau yal niam chài, sồr pal geh bơta nền nòn mờ git sap chài rơgơi. Dilah rơnàng cau kơnòm să ờ bơsram, ờ gàr den ală sap ntas bơh kơ wào, bơh đơs kứt, eirei rơp rơhời gơtìp roh huĭ:

“Uă cau sơnơng là mòn kơ wào ƀuơn, mơya mùl màl ờ di cau lơi kung gơtùi mòn, tài kờñ pal geh bơta chài git sap niam. Tŭ do, tàm ƀòn lơgar, uă cau chài dờng sơnam neh rơhời ờ gam tai, ai rơnàng kơnòm să den ndrờm bè mìng gam wơl dồ nă añ gơtùi mòn ală bơta đờng goòng do. Añ kung rơp bơto wơl kòn sau in bơta chài mòn kơ wào, nàng bơta niam chài krơi is kòn cau he dê ờ gơtìp roh huĭ, ờ gơtìp sang tĕ”.

Tàm hìu jòng tàm ƀòn Phơng, sàh Ea Tul, càr Dăk Lăk, cau chài ồng Y Khĭm Niê Siêng teh tơl sap cing, yal bol kơnòm dềt in iat bè ală ngai lơh chờ gơklŏ gơ crà, yal bè jơnau gơtha bơh tơl sap ntas dê. Gơ wèt mờ ồng, tơl sap cing là dùl jơnau nting tơngkah niam chài kòn cau Rơđê mìng geh kis tŭ geh bơto wơl. Ồng gơ lơh ờ suk ngan tŭ sền gŏ cau kơnòm să rơhời ờ gam git sap cing tai, den tàng neh lời jơh nùs tồr ai broă bơto wơl in:

“Cing là dùl bơta đờng goòng ờ gơtùi ờ geh tàmr ài kis ƀòn lơgar cau Rơđê dê. Cing mờng geh ngui tàm ală dơ̆ lơh yàng kuơmàng bè lơh yàng chờ sa piang kòi pa, ies ƀồc (pơgồp bal mờ sơng gơr), lơh yàng hòi dan pràn kơldang să jan ai cau neh geh lơh yàng mờ rơpu, kơnrồ in halà tàm dơ̆ lơh yàng mut hìu pa… Sap ntas cing dê gơ jat bal mờ tơl broă lơh niam chài, pin dờn bơh ƀòn lơgar dê. Cing ờ gơtùi tam cah is bơh rài kis mpồl bơtiàn. Bè hơ̆ den tàng, dilah cau kơnòm să tàm ƀòn ờ hềt git, den bol hi là ală cau lòt lài pal geh kơnòl bơto wơl nàng kòn sau in ờ huĭ bơhiàn niam bơnĕ mò pàng neh lời wơl”.

Bal mờ bơta kờñ gơboh mòn đờng goòng kòn cau, cau chài ồng Y Lương Niê, mat mờng hòi là ồng Thun dê ơm tàm ƀòn Triă, sàh Ea Tul, càr Dăk Lăk đềt mềr ngan mờ kơmbuăt Đing năm. Bơh ală sap uh moat jrùm bơh ies ƀồc dê tus bơta chờ hờp bơh dơ̆ lơh chờ dê, ồng sùm kơlôi sơnơng pal bơto wơl kòn sau in nàng sap đing năm sùm mpong ntas tàm mpồl bơtiàn:

“Rài yau, kơmbuat đing nam mìng geh uh tàm tŭ ies ƀồc. Tŭ do, kơmbuat đing nam gam geh uh tàm uă dơ̆ lơh chờ ƀòn lơgar dê. Nàng sền gàr bơta niam chài krơi is do, bơta kuơmàng ngan rlau jơh là rơnàng cau kơnòm să pal bơsram mờ tàm pơn jat tai”.

Bơh sap uh kơ wào rơlĕ rơlùn, sap cing nggồr nggàc, tus sap uh kơmbuăt đing năm lơbơn niam… ală cau chài kòn cau Rơđê tàm càr Dăk Lăk gam lơh ngan nàng ală sap ntas krơi is kòn cau dê mpong ntas sùm tàm ƀòn lơgar. Khi mblàng wơl bơta kờñ gơboh mờ kơp kờñ cau kơnòm să git kờñ gơboh, git bơsram, gàr tĕ bơta niam chài is ồn kòn cau he dê.