Ƀòn Dơng Bắk, xã Yang Tao, kơnhoàl Lăk, càr Dăk Lăk geh sền là tiah mìng dùl lơm tàm tiah Tây Nguyên gam prap gàr broă mòn phan ù buh bơh yau cau M’nông Rlơm dê. Do là broă lơh bơh yau neh geh bơh jŏ rài bơh cau M’nông dê, mờ broă mòn phan ndrờm lơh mờ tê lơm tàm jơh ală bơnah broă sơklŭ ù, mòn gơs rùp, ìs rañ mờ cèng buh. Tŭ do, broă do gơ hòi gơ jà uă ngan nac lòt nhơl tus sền, jòi git. Bulah bè hơ̆, tŭ do mìng gam 2, 3 nă cau chài, jơh ală ndrờm là cau ùr lơm gam prap gàr broă lơh. Ơdŭ bơto bơtê mờ lơh ngan ngồn broă lơh mòn phan ù buh mờ tê bơh cau M’nông dê geh lam lơh bơh bơnah priă Rơndap broă lơh prap gàr, ngui niam bơta kuơ niam chài bơh yau niam bơnĕ bơh ală jơi bơtiàn dùl êt nă cau dê gơ jat bal mờ bơtàu tơnguh lòt nhơl gơ wèt Broă lơh jơnau kờñ dà lơgar bơtàu tơnguh lơh sa mpồl bơtiàn tiah làng bol jơi bơtiàn dùl êt nă cau mờ tiah kơh bơnơm tơngai bơh nam 2021 tus nam 2030. Tus bal ơdŭ bơto bơtê do geh 20 nă cau là cau ùr M’nông tàm ƀòn Dơng Bắk, xã Yang Tao. Ală cau bơsram rơp geh bơsram mờ lơh ngan ngồn ală bơnah broă nàng mòn gơs dùl phan ù buh.