Geh lam lơh tàm dơ̆ bơyai lơh dơ̆ lơh chờ kơphê Buôn Ma Thuột dơ̆ 8, nam 2023 pa geh bơyai lơh, mìng tơnơ̆ 7 ngai, dơ̆ tàm pơrlòng neh gơ hòi gơ jà 65 nă cau cùp rùp ơm tàm ală càr: Dăk Lăk, Dăk Nông, Gia Lai, Đà Nẵng mờ ƀòn dờng Hồ Chí Minh tus bal mờ rlau 600 nơm rùp dùl nơm mờ mpồl rùp. Rùp geh cùp mờ jơh bal mờ măi cùp  ờs ngui cùp hiñ mờ điện thoại attê ngăc ngar, cih wơl uă ală tŭ niam, cih yal gơ lơh bè làm jơh ală broă lơh tàm broă lơh bơh dơ̆ lơh chờ kơphê dê.

Mpồl bơyai lơh neh sac rơwah 47 nơm rùp mŭt tàm dar ràng tơlik mờ 20 nơm rùp niam ngan rlau jơh tàm ală rùp do nàng jàu khà jờng, tàm hơ̆ geh 1 khà A, 1 khà B, 2 khà C mờ 16 khà pơn jờng. Tơnơ̆ dơ̆ jàu khà jờng, 47 nơm rùp niam ngan rlau jơh geh ràng tơlik tàm gùng sră kơphê Buôn Ma Thuột bơh tŭ do tus jơh ngai 22/04.