Ủy ƀan Ñân zân càr Dăk Lăk pa ring bal rơndap broă ai gơnoar ƀòn dờng Buôn Ma Thuột lam lơh tơrlòng lài gùng lòt jơng mờ broă drơng ala rơndeh coh mpồl bơtiàn tàm ƀòn dờng. Rơndap broă lơh do geh kơp kơnờm rơp lơh gơlik dùl ù tiah mpồl bơtiàn ƀuơn ai làng bol mờ nac lòt nhơl in. Jat hơ̆, tiah lòt jơng kờp dŭ rơp lơh tàm jơh gùt gơl gùng Phan Đình Giót (gơl bơh gùng Lê Duẩn tus gùng Lê Hồng Phong). Jat kềng gùng lòt jơng rơp ràng tac ală phan niam chài wac mòn mờ tê, phan kir sơnrai mờ ală phan sa tiơng pơn rơ bơh Tây Nguyên dê.

Gơ wèt mờ broă drơng ala rơndeh coh tàm gùng ƀòn dờng rơp lơh mờr 20 anih tàm ală tiah geh gal cau, ală tiah tờm kă bro, broă drơng ala, ală anih tus tiah tềl kah yau niam chài, ală anih wă nac rơndeh buýt dê. Bơnah priă tă lơh geh lơh jat broă lơh tă pơgồp bơh mpồl bơtiàn dê.