Tơnơ̆ 7 nhai lam lơh, càr Dăk Lăk neh lơh sir 4 tàm kờp jơh 10 jơnau kờñ mờ 14 tàm 32 kơnòl broă bơh nam 2026 dê; ală jơnau kờñ, kơnòl broă gam wơl gam geh lơh jăt di tơngai. Ƀòn lơgar neh ai lơh jăt uă kơrnoăt, gùng dà broă lơh kwơmàng, pơnrơ là Jơnau lơh nền tàm pơrjum 03 bè dong kờl sền gàr mờ ngui niam bơta kwơ phan lời wơl niam chài cing mồng tơngai bơh nam 2026- 2030; lam lơh bơ̆t bơtàu ală jơnau yal tơnggĭt phan lời wơl, lơh sră nggal jak chài gơ wèt mờ bàr pe phan lời wơl, tiah tềl lời wơl kah yau; mơkung rơcăng ală broă lơh, pơrjum bơyai niam chài, lòt nhơl dờng bè Lơh chờ Sầu riêng Dăk Lăk nam 2026 mờ Lơh chờ Kơphê Buôn Ma Thuột dơ̆ 10 nam 2027.

Cribơyai tàm dar pơrjum, ală cau ala măt dan ai lài bơcri priă lơh bơka niam wơl tiah tềl lời wơl, bơ̆t bơtàu phan bơna niam chài – lòt nhơl mùl gŏ is, lơh pràn lơh sồr phan lời phan wơl, prăp gàr jơnau đơs, akhar cih bơh làng bol M’Nông, Jrai dê mờ tơngguh priă jền ai broă niam chài in nàng kờñ jòi lơh geh cồng nha ală bơta kwơ bơhiàn niam chài is drơng bơtàu tơngguh lòt nhơl in.

Đơs pơndŭt dar pơrjum, mò Huỳnh Thị Chiến Hoà, Phó Bí thư Tỉnh ủy, Phó Lam bồ duh broă sùm Mpồl Sồr lơh bè bơtàu tơngguh niam chài càr Dăk Lăk đơs sùm, cồng nha bơh sơnrờp pa lơh geh bơnàng jă, bơta kwơmàng là pal ai ală jơnau lơh nền gơgơs ală phan bơna niam chài geh bơta kwơ, gơgơs ală gah lơh sa mờ măy mŏk mờ drơng broă sa priă niam chài tơl pràn tă pơgồp tàm gơguh tai bơh ƀòn lơgar dê.

Mò Huỳnh Thị Chiến Hoà sồr ală sờh, gah, ƀòn lơgar tơrgùm lơh sir ală jơnau kờñ gam wơl, is ồn là kơnòl broă lơh sồ phan lời wơl, bơ̆t bơtàu măt kă bro phan bơna niam chài mờ niam chài sồ gơ jăt bal mờ bơta ƀươn is Dăk Lăk dê.

 “Tơrgùm lơh gơs ală jơnau kờñ gam wơl mờ broă jàu gơrềng tus broă lơh sồ ală phan lời wơl tiah tềl lời wơl dà lơgar mờ tiah tềl lời wơl dà lơgar is ồn. 10 kơnòl broă gam wơl bơh nam 2026 dê sùm sền swì sồr ngan di tŭ tă bơsong kal ke, gơkòl, ngan là mờ ală bơta gơkòl gơlik geh bơh kâp hơđơm. Bơ̆t bơtàu măt kă bro ală phan bơna lơh sa mờ măy mŏk, drơng broă sa priă niam chài đơs bal mờ niam chài sồ đơs is krơi is, gơkờñ, dipal mờ bơta is rơmis, broă gơlik geh mờ bơta pràn bơh ƀòn lơgar dê”.