Bal mờ hơ̆, di tàm dơ̆ Lơh chờ kơphe Buôn Ma Thuột dơ̆ 8 tus do, ală broă lơh ai rơwas pơrlòng re dà, pơrlòng ntoăt, pơrlòng coh plai kung ờ gam geh bơyai lơh tai. Jăt jơnau yal bơh mpồl lơh broă nhơl chờ mờ hìu năc ơm Biệt Điện tàm ƀòn dờng Buôn Ma Thuột, càr Dăk Lăk yal, bơh ngai 10 nhai 02, mpồl lơh broă do neh ơm jơh broă đì rơwas tàm tiah nhơl chờ Rơbàng yồng Buôn Đôn, tàm xã Krông Na, kơnhoàl Buôn Đôn, ala mờ broă nhơl chờ pa geh uă bơta niam chài rơgơi tàm do dê pơgồp bal mờ ală broă lơh nhơl chờ đềt mềr mờ rơwas bè ai rơwas lòt nhơl, chờ nhơl bal mờ cau năc.

Kơrnoăt do kờñ lơh jăt gùng dà broă lơh bơh càr Dăk Lăk dê bè tơngai ơm ờ ai nhơl chờ đì rơwas tàm broă kă bro nhơl chờ nàng prăp gàr mpồl rơwas ròng càr dê, tam gơl rơhời tus mờ broă nhơl chờ rơwas đềt mềr. Kung gơrềng tus mờ broă lơh do, tàm broă lơh Chờ rơwas Buôn Đôn-dùl tàm ală broă lơh tờm bơh lơh chờ kơpke Buôn Ma Thuột dơ̆ 8, nam 2023 geh bơyai lơh tàm nhai 03 tus tàm càr Dăk Lăk, ờ geh ală broă lơh bè: pơrlòng rơwas ntoăt, pơrlòng rơwas re dà, pơrlòng rơwas coh plai, ờ pơrlòng rơwas duĭ che mờ cau. Ala mờ hơ̆, geh ờ uă broă lơh nhơl chờ ndai bè: Duh khoai bơta pràn kơl dang rơwas in, ai rơwas tus bal dơ̆ sa buffet, pơrlòng bơka să rơwas, pơrlòng ai rơwas chờ gờm cau năc, ai rơwas lơh broă bal mờ kŭp rùp mờ cau năc...