Bơh nam do, Dơ̆ lơh chờ Sầu riêng Krông Pách rơ̆p geh tơnguh kấp gơ gơs Dơ̆ lơh chờ Sầu riêng càr Dăk Lăk. Tơngume do neh geh Anih duh broă Làng bol càr Dăk Lăk ring bal jat tàm ală jơnau đơs pơndŭt bơh Mpồl Lơh kơnòl broă sùm Tỉñ ủy càr, tơnơ̆ tŭ sền sơ wì ală cồng nha pơn rơ ngan bơh ală dơ̆ bơyai lơh dơ̆ lơh chờ lài do dê. Jat gùng dà pơlam pa, Dơ̆ lơh chờ Sầu riêng càr Dăk Lăk rơ̆p geh bơyai lơh jat broă lơh dờng kấp càr, pah dơ̆ 2 nam dùl dơ̆. Kờp dŭ, dơ̆ lơh chờ sơnđờm geh lơh dờng kấp càr rơ̆p geh bơyai lơh tàm nam do, là broă lơh tơrgùm bal, pơgồp bal đah broă lơh sa suơn sre, niam chài mờ lòt nhơl.

Dơ̆ lơh chờ rơ̆p geh uă broă lơh, bè: Drà broă lơh sa suơn sre, tàm pơrlòng plai chi bơkah, rơndeh bơkào lòt pơdar tàm gùng, bơyai lơh ràng tơlik đơs crih tam ya bơh yau, yal tơngĭt  uă lòt nhơl, tàm tơrbŏ bal tăc  bro phan lơh geh bơh broă lơh sa suơn sre... Jat Sờh Niam chài, Tàp pràn să mờ Lòt nhơl càr Dăk Lăk, càr gam lơh broă rơndăp lơh bơtàu tơnguh geh ngan ai Dơ̆ lơh chờ Sầu riêng, mờ sền gĭt là bơta tờm tàm ală broă lơh lòt nhơl qúy 3 nam do dê, ngan là dơ̆ ơm rlô ngai Sơntờm Dà lơgar ngai 2/9.