Ngai chờ nàng kờñ gờm chờ wă rò tơngkah kir sơnrai 133 nam Ngai deh Củ tịc Hồ Chí Minh dê ngai 19/05. Tus bal ngai chờ do geh rlau 400 nă cau chài, cau đơs crih tam ya mờ ală cau pơrlòng tàp pràn să jan bơh ală jơi bơtiàn ơm kis tàm ală xã, thị trấn tàm kơnhoàl dê.

Geh lơh tàm 02 ngai, hơ̆ là ngai 09 mờ 10 nhai 05 do, ngai chờ geh uă broă lơh rơ̆ ru, bè: Lơh tơngŏ wơl ală broă lơh pơrjum lơh yàng ờs mờng bơh yau bơh làng bol ală jơi bơtiàn tàm kơnhoàl dê; Pơrlòng dròng cing jañ mồng mờ ală đờng goòng kòn cau; Broă lơh pơnyơu hìu ờs mờng bơh yau mờ ràng tơlik phan bơna bơkah pơnrơ is tiah he dê; Pơrlòng tờm gơnơng mờ ală jơnau tàp pràn să jañ ờs mờng bơh yau; Pơrlòng soh phan kòn cau; Pơrlòng trŭ gơm phan sa mờ ală jơnau nhơl ờs mờng bơh yau.

Cau chài ồng Y Ân là kòn cau M’Nông ơm tàm thôn Phú Lợi, xã Quảng Phú, kơnhoàl Krông Nô, càr Dăk Nông đơs là, broă bơyai lơh ngai chờ rơ̆p pơgồp bơnah lơh, sền gàr mờ ngui niam ală bơta kwơ niam chài krơi is ờs mờng bơh yau bơh làng bol ală jơi bơtiàn tàm ù tiah kơnhoàl dê.