Ngan là, ală dơ̆ lơh yàng bè sơnam kis kòn cau Mnông dê kung gam geh làng bol bơyai lơh sùm. Tàm hơ̆ geh bơhiàn lơh Yàng sa kra mờ gơthan kwơ màng lơh uă rlau tai bơta tam klăc đah hìu bơnhă mờ ƀòn lơgar.

 Kòn cau M’nông Rlăm tàm kơnhoàl Lăk, càr Dăk Lăk sùm bơyai lơh dơ̆ lơh Yàng sa kra mè bèp rlau 60 sơnam in nàng tơngŏ nùs nhơm duh rơngòt, dòn bơr mờ sền dờng màng mè bèp. Dơ̆ lơh Yàng sa kra sùm geh bơyai lơh bơh nhai 1 tus nhai 2 pah nam tơnơ̆ tŭ tơn jơh dùl kàl tơnhào phan tàm sre tàm mìr. Jat cau bơjơu Y Krai Cil, ơm tàm ƀòn Jiê Yuk, xã Dăk Phơi, kơnhoàl Lăk yal, lài do, kòn ùr tơnhoa tàm hìu bơnhă là cau geh gơnoar bơyai lơh dơ̆ lơh Yàng sa kra ai mè bèp in, mơya tŭ do jơh ală oh kòn tàm hìu bơnhă ndrờm geh bơyai lơh dơ̆ lơh Yàng sa kra ai mè bèp in lơm. Dơ̆ lơh Yàng sa kra bơh kòn cau M’nông Rlăm sùm pơgồp bal mờ broă  duh khoai Yàng mờ phan ơn pơdơng phan duh khoai. Phan ơn pơdơng tàm dơ̆ lơh Yàng sa kra tàm hơ̆ geh: dùl nơm sur halà iar, 3 mơngàn piang, dùl nơm plai nhồng ro mờ ờ gơtùi ờ geh yăng tơrnờm, ngan là dà ñô bơh Yàng dê.

Cau bơjơu ồng Y Krai Cil pà gĭt: Ală cau geh sơnam bơh 70 tus 80 sùm geh bơyai lơh dơ̆ lơh Yàng sa kra. Añ sùm lơh yàng duh khoai mờ phan ơn pơdơng là iar, yăng tơrnờm, sur nàng lơh dơ̆ lơh Yàng sa kra. Tŭ jơh ală phan ơn pơdơng neh geh ơn tơl làm den cau bơjơu rơ̆p sơnđờm bơyai lơh dơ̆ lơh Yàng sa kra. Cau bơjơu hòi dan mờ Yàng tàm hơ̆ geh: Yàng bơnơm, Yàng brê, Yàng dà nàng dan gơnoar geh bơyai lơh dơ̆ lơh Yàng sa kra.

 Tŭ tàm ƀòn geh hìu bơnhă bơyai lơh dơ̆ lơh yàng kwơ màng do, bơh drim gờñ làng bol tàm ƀòn bal mờ gơ̆p, tơl nă cau dùl broă lơh, cau klau den rcang ală yăng tơrnờm ƀô thồm, cau ùr den plờih biăp, cau lòt bơ̆ dà, bal mờ hìu bơnhă trŭ gơm ală phan sa pơn rơ bơkah ngan. Tàm dơ̆ lơh Yàng sa kra bơh kòn cau M’nông Rlăm dê geh tơl làm cau tàm pròc mhàm bal tàm hìu bơnhă mờ jơh bal làng bol tàm ƀòn rềp ngài. Do ngan là dơ̆ nàng jơh tơl nă cau tìp mat bal, cribơyai bal bè broă lơh, bơta mờng chài lơh broă sa, pơn jờng bal mờ gơ̆p tam klăc bal, prap gàr bơhiàn niam bơnĕ jơi bơtiàn he dê, bơto tơngkah bal mờ gơ̆p kis lơh jat adat boh lam bơh dà lơgar dê mờ kơ̆p kờñ ală bơta niam bơnĕ tus mờ hìu bơnhă bơyai lơh dơ̆ lơh Yàng sa kra do in.

Cau bơjơu Y Krai Cil, ơm tàm ƀòn Jiê Yuk, xã Dăk Phơi, kơnhoàl Lăk, càr Dăk Lăk pà gĭt tai: Tŭ bơyai lơh dơ̆ lơh Yàng sa kra, làng bol kơ̆p kờñ ai cau geh lơh dơ̆ lơh yàng pràn kơl dang geh uă pràn kơl dang să jan, kis chờ hờp, pràn kơl dang mờ oh kòn kòn sau mờ lơh krơh nàng bơto bơtê oh kòn kòn sau in lơh broă sa mờ nting tơngkah oh kòn kòn sau bơsram jak nàng geh rài kis niam bơnĕ rlau, bal mờ gơ̆p bơt bơtàu ƀòn lơgar pas niam rlau.

Tơnơ̆ tŭ lơh Yàng sa kra, cau geh lơh Yàng rơ̆p ià bồp jồp tơrnờm mờ kơ̆p kờñ geh Yàng sùm dong kờl, ai ală bơta niam bơnĕ ngan rlau jơh ai să tờm, oh kòn kòn sau mờ ƀòn lơgar in. Pơn jat hơ̆, bal mờ jơnau gờm chờ, jơnau ưn ngài bè ală dà kơl hề bơh mè bèp dê neh ròng siam he tào dờng, ală oh kòn kòn sau rơ̆p pà phan ai cau geh lơh Yàng in, ală phan pà geh pà sùm là yăng tơrnờm, phan soh kòn cau, ồi tơ̆...

Lài mờ tŭ tơn jơh dơ̆ lơh yàng, ồng mò, mè bèp geh nggui wơl bơtòm tơrgùm mat bal mờ oh kòn kòn sau nàng nting tơngkah, bơto bơtê tơl nă cau tàm ƀòn bal mờ gơ̆p bơtàu tơnguh lơh sa, prap gàr bơhiàn niam bơnĕ jơi bơtiàn kòn cau dê.

Dơ̆ lơh Yàng sa kra bơh kòn cau M’nông Rlăm, tàm kơnhoàl Lăk dê geh bơyai lơh bal hiă mơya cèng uă ngan bơta kwơ. Do là dơ̆ nàng oh kòn kòn sau in tơngŏ nùs nhơm duh rơngòt, dòn bơr mờ kờñ gơboh ồng mò, mè bèp. Do là dùl bơhiàn lơh Yàng ờ gơtùi ờ geh tàm rài kis kòn cau M’nông Rlăm tàm tiah do dê, dùl bơhiàn niam bơnĕ bơh mpồl bơtiàn dê.