Mò Lơ Mu K’Poh (kòn cau K’Ho- Cil) rlau 70 sơnam, ơm tàm thôn Srê Đăng, sàh Tân Hội, càr Lâm Đồng pà gĭt: dơ̆ lơh Yàng sơnđan mat ai kơnòm dềt pa deh in là bơhiàn is ồn ngan. Do là dơ̆ nàng tơngŏ bơta chờ hờp bơh hìu bơnhă dê, yal ai mpồl bơtiàn, ƀòn lơgar in bè dùl nă cau pa:“Tơnơ̆ dùl tơngai kal ke bòl glar glèng bun deh dùh jê sồt, tus ngai mè deh kòn lơngăp lơngai, den tơnơ̆ hơ̆ hìu bơnhă bơyai lơh dơ̆ lơh Yàng sơnđan mat ai kòn in jat bơhiàn bơh kòn jơi bơtiàn bol añ dê. Kơ̆p kờñ tơnơ̆ do kơnòm dềt geh pràn kơl dang, tào dờng gơ gơs cau geh kwơ, lơh jat krơh mè bèp dê”.

Tŭ kơnòm dềt deh pơgăp 1 poh, hìu bơnhă bơyai lơh dơ̆ lơh Yàng sơnđan mat. Dilah rài kis hìu bơnhă ờ hềt geh priă jền bơyai lơh dờng, den khi mìng lơh dơ̆ pơn yơu nàng kơnòm dềt in geh sơnđan mat. Lài mờ tŭ bơyai lơh, hìu bơnhă rơ̆p jà ală kra ƀòn, cau geh bơngă pin dờn, halà cau kồñ tàm jơi nòi tus cribơyai broă bơyai lơh Yàng. Ồng Liêng Hót Ha Kliêng (kòn cau K’Ho Cil) ơm tàm thôn Srê Đăng, sàh Tân Hội, càr Lâm Đồng pà gĭt, phan ơn pơdơng mờ sơlào phan ơn pơdơng dơ̆ lơh Yàng sơnđan mat bơh kòn cau K’Ho dê kung gơ jat bal tàm ală bơta bơh tơl hìu bơnhă dê sơl:“Geh sur, geh iar den lơh sur, lơh iar; mờ kơ̆p kờñ kơnòm dềt ờ gơtìp kòp tê jê să, ờ gơtìp kal ke tàm rài kis, mờ rơ̆p geh lơngăp lơngai mờ bơtoah bơtoài. Tơnơ̆ hơ̆ ala mat hìu bơnhă jà cau dờng sơnam ơn tê tàm bìng liang mờ gờm chờ ai kơnòm dềt in geh lơngăp lơngai, mờ kơ̆p kờñ kơnòm dềt pleh mờ nùs nhơm iơh bơsạ, lơh roh bơta tam klăc bal. Tơnơ̆ do, tŭ tào dờng geh nùs nhơm niam, pơgồp bơnah bơt bơtàu ƀòn lơgar; hơ̆ là bơta kwơ màng ngan rlau jơh bơh dơ̆ ơn tê do bơh kòn cau K’Ho bol añ dê”.

Mat bơh kòn cau K’Ho Cil dê cèng gơtha jrô ơnàng uă ngan, tơngŏ bơta tàm pơr dờn bơh jơi nòi mờ tiah ơm kis mpồl bơtiàn dê. Den tàng, lài mờ tŭ geh bơyai lơh dơ̆ sơnđan mat, hìu bơnhă lùp bal ală cau gĭt wă bè mò pàng jơi nòi dê, ală cau kra, cau geh bơngă pin dờn tàm hìu bơnhă, nàng rơwah mat ai gơ in di pal. Gơwèt mờ kòn cau K’Ho Cil tàm Tân Hội, sùm mat sơnđờn kòn ùr dê rơ̆p sơnđan là K’Jiêng, K’Ba; dilah là kòn klau den rơ̆p sơnđan là Ha Liang, Ha Kră, Ha Ôñ… Ồng Liêng Hót Ha Kliêng pà gĭt, hơ̆ ală mat sơnđan gơ jat bal mờ ală krơh niam pơn rơ jak tàm kah yau bơh jơi nòi dê, tŭ geh đơs tus tàm mpồl bơtiàn, kòn cau K’Ho Cil pin dờn uă ngan: “Jat bơhiàn bơh jơi bơtiàn bol añ dê nàng sơnđan mat ai kơnòm dềt in den pal rơwah mat sơnđan ală cau klau geh nùs nhơm kờñ gơboh ƀòn lơgar, geh dà kơl hề bơt bơtàu ƀòn lơgar hơ̆ sồng ai mat sơnđan nàng sơnđan ai kòn in. Ai ală ồng lơi lời wơl krơh ờ niam den ngan ngồn là ờ gŏ sơnđan mat ai kòn he in ờ. Cau ùr kung bè hơ̆ sơl, cau ùr lơi lời wơl krơh niam den hơ̆ sồng ai mat sơnđan ai kòn in. Pơn yơu bè mò K’ Huệ, K’Ba, ồng Ha Liang, Ha Kră … hơ̆ là ală mat sơnđan nàng hìu bơnhă in sac rơwah mờ sơnđan mat ai kòn he in, tài bơh khi geh nùs nhơm kờñ gơboh, gĭt tam pà bal dong kờl bal mờ gơ̆p mờ pơgồp bơnah bơt bơtàu mờ sền gàr ƀòn lơgar”.

Gơtùi đơs, dơ̆ sơnđan mat bơh kòn cau K’Ho Cil tàm Lâm Đồng ờ mìng ƀuơn ngan là dùl bơhiàn niam chài lơm mờ gam là jơnau yal bơto tơngkah tơl rơnàng gĭt sền dờng màng mò pàng, sền gàr bơhiàn niam bơnĕ bơh bèp ồng dê. Bơh tơl nơm mat, bơta kờñ gơboh bơh hìu bơnhă dê, bơta kơ̆p kờñ bè dùl rài kis lơngăp lơngai pràn kơl dang, gĭt ưn ngài mè bèp mờ tam klăc bal geh pơyoa tus mờ kơnòm dềt. Tàm rài kis pa tŭ  do, dơ̆ lơh Yàng sơnđan mat kung gam ngềt ngơ̆t gàr gơnoar broă kwơ màng, tàm tơrbŏ bal rài lài do – tơngai tŭ do- mờ rài tơnơ̆ do, ròng siam hwềng nùs mờ bơhiàn niam chài is bơh làng bol kòn cau K’Ho Cil dê.