Do là broă lơh geh kwơ màng wèt tus tơnkah 50 nam crơng gơs bơta git gơ̆p lơh broă bal mờ lơgar ndai đah lơgar Việt Nam mờ lơgar Nhờk, pơgồp bal tàm bơta pơn jờng bơta niam bơnĕ bơh bơta niam chài ờs mờng, bơta git gơ̆p lơh broă bal, lơh bơyô bal kơl jăp đah bàr lơgar, đah bàr Hà Nam mờ ală càr, mpồl lơh broă lơgar Nhờk.

Tàm dơ̆ pơrjum, Củ tịc Quốk hội ồng Vương Đình Huệ neh ala măt kwang đơng lam Đảng, Dà lơgar jào kơrnoăt dờp 2 bơta phan kwơ màng dà lơgar ai càr Hà Nam in. Hơ̆ là phan kwơ màng dà lơgar jơnang lŭ hìu yàng Phờk Giàu tàm xã Đinh Xá, ƀòn dờng Phủ Lý mờ Phan kwơ màng dà lơgar sơngơr lơngô Tiên Nội 1, tàm mpồl phan jòi geh 16 nơm bơh Bảo tàng càr Hà Nam dê. Mờ Ƀộ Văn hoá, Thể thao mờ Zu lịc neh jào kơrnoăt tăp sèng Phan lời wơl rài lài do kấp dà lơgar mờ 4 tiah lời wơl tàm càr Hà Nam dê.