Rlau 90 sơnam, mơya cau chài ngan Lò Văn Biến, kòn cau Thái, ơm tàm ƀòn Cang Nà, sơnah ƀòn Trung Tâm, thị xã Nghĩa Lộ, càr Yên Bái pah ngai kung gam tơryang tơryồng bơto yal wơl akhar kòn cau Thái yau dê mờ ală tam ya lì yau bơh kòn cau Thái dê ai kwang bàng mờ làng bol tiah do dê. Ồng pà gĭt, tàm jơh tŭ tơngai đơng lam kăc màng, đơng lam broă lơh bơt bơtàu mờ bơtàu tơnguh Dà lơgar, Đảng he dê sùm sền dờng màng mờ jờng rơ uă gơnoar bơh niam chài. Tàm Pơrjum niam chài gùt lơgar geh bơyai lơh tàm nhai 11 nam 2021, Tổng Ƀí thư ồng Nguyễn Phú Trọng kung uă dơ̆ đơs wih đơs wơl: “Niam chài là bơnàng jă nùs nhơm bơh mpồl bơtiàn, niam chài gam den jơi bơtiàn gam, niam chài roh den jơi bơtiàn roh”. Gĭt wă jrô nùs nhơm hơ̆, bal mờ nùs nhơm kờñ gơboh, bơta pơn yờ să ngan bè ală bơhiàn niam chài niam bơnĕ jơi bơtiàn he dê, ồng neh lời jơh rài kis he dê ai broă kơlôi sơnơng, mblàng yal, lơh wơl ală bơhiàn niam chài kòn cau Thái dê. Ồng Biến đơs: “Neh là kòn cau Thái den tơl nă cau pal gĭt jơi bơtiàn he dê geh ală bơta niam bơnĕ lơi. Ală cau kra, ală cau gĭt den bơto yal wơl nàng tơl nă cau in gŏ mờ bơsram jat bal”.

 Bơdìh mờ ồng Biến, ơm tàm thị xã Nghĩa Lộ, càr Yên Bái tŭ do, tàm ală ƀòn lơgar gam geh uă ngan ală bèp, ală wa, ală mò, ală mè gĭt wă uă ngan bè ală bơta niam chài niam bơnĕ ngan bơh jơi bơtiàn kòn cau Thái dê, bơh cih akhar tus đơs pơnđick, tam ya, đờng goòng, phan sa, ală broă nhơl chờ bơh yau.... Khi gam lời uă nùs nhơm nàng prap wơl, bơto yal wơl ai ală rơnàng pơn jat tai in mờ kơ̆p kờñ ală bơta niam chài hơ̆ geh kis sùm.

Tàm Sơn La – ù tiah geh 12 jơi bơtiàn oh mi ơm kis bal, gĭt wă jrô ngan bồtơngoh bơh Củ tịc Hồ Chí Minh dê “Niam chài sòl gùng ai làng bol Dà lơgar in lòt” mờ jơh nùs lơh jat gùng dà broă lơh bơh Đảng dê tàm broă lơh kis wơl, bơtàu tơnguh niam chài lơgar Việt Nam dê, tàm hơ̆ să tờm Tổng Ƀí thư ồng Nguyễn Phú Trọng neh uă dơ̆ đơs nền “Niam chài gam den jơi bơtiàn gam, roh niam chài là roh jơi bơtiàn”... ală nam do, kấp ủy, gơnoar atbồ mờ làng bol tiah do sùm sền gròi prap gàr, ngui niam ală bơta kwơ niam chài mờ ală srơh, broă lơh geh ngan, ngan ngồn. Mò Quàng Thị Xuyến, Kwang atbồ Mpồl Niam chài- Mpồl bơtiàn, Mpồl duh broă làng bol càr Sơn La kung pà gĭt: “Tus tŭ do, Mpồl duh broă làng bol càr Sơn La neh ai lơh jat 05 Jơnau lơh nền tàm pơrjum geh gơrềng tus broă dong kờl prap gàr, ngui niam ală bơta kwơ niam chài jơi bơtiàn. Bơta ndai tai, ală broă dong kờl bơtàu tơnguh niam chài jơi bơtiàn geh tàm bơrlŭ bal tàm broă lơh jơnau kờñ Dà lơgar bơtàu tơnguh lơh sa- mpồl bơtiàn tiah làng bol jơi bơtiàn dồ ết nă cau mờ tiah kơh bơnơm. Duh broă sùm Mpồl duh broă làng bol càr kung jàu ală Mpồl bơh Mpồl duh broă làng bol càr dê lơh jat broă jat sền sùm, ờs mờng gơwèt mờ broă tam pà, ai priă jền dong kờl gơwèt mờ ală Jơnau lơh nền tàm pơrjum geh gơrềng tus niam chài”.

Tŭ gam kis, Tổng Ƀí thư ồng Nguyễn Phú trọng sền gròi ngan tus broă prap gàr mờ ngui niam ală bơta kwơ niam chài jơi bơtiàn, ală bơta kwơ niam chài phan bơna mờ ờ di phan bơna bơh ală kơnhoàl ù tiah bơh làng bol ală jơi bơtiàn, pơgồp bal mờ lơh jat bal bơta niam bơnĕ niam chài bơh tơngai pa dê mờ kơ̆p kờñ mpồl cau geh bồ tơngoh gĭt wă, mpồl cau cih jơnau,  cau đơs crih tam ya jơh nùs ngan, jak chài ngan, geh kơnòl bơt bơtàu bal geh cồng nha dùl rài niam chài Việt Nam gơguh jak, cèng bềng bơhiàn niam chài jơi bơtiàn dê. Tàm pơrjum Niam chài gùt lơgar nam 2021, Tổng Ƀí thư uă dơ̆ đơs wih đơs wơl : “Niam chài là hwềng tờm bơh jơi bơtiàn dê, đơs tus bơhiàn niam bơnĕ bơh jơi bơtiàn. Niam chài gam den jơi bơtiàn gam...”.

Gĭt wă geh bơta hơ̆, bi Thạch Sroh, ơm tàm xã Đôn Châu, kơnhoàl Duyên Hải, càr Trà Vinh, là cau tàm Mpồl Jơnau cih, đơs crih tam ya càr pà gĭt, mpồl jơnau cih, đơs crih tam ya kòn cau Khmer tơngai pa do neh geh uă tă pơgồp tàm broă prap gàr mờ ngui niam đơs crih tam ya bơh yau bơh jơi bơtiàn dê. Mìng is să tờm bi dê, tàm tơngai tus rơ̆p pơn jat tai tă pơgồp ai gah niam chài in. Bè bơta sang rài bơh Tổng Ƀí thư ồng Nguyễn Phú Trọng dê, bi Thạch Sroh tơngŏ bơta pơlai soh uă ngan:“Tổng Ƀí thư ồng Nguyễn Phú Trọng jak chài uă ngan, ồng sền gròi uă ngan bè niam chài bơh jơi bơtiàn Việt Nam dê đơs bal, is ồn sền gròi, pơndờm pơnđiang, pơn jờng làng bol ală jơi bơtiàn prap gàr mờ ngui niam bơhiàn niam chài niam bơnĕ ngan bơh he dê. Tŭ do, klo yal Tổng Ƀí thư sang rài, añ mờ làng bol Khmer jê nùs ngan, dan cih kah dà kơl hề, ală nùs nhơm bơh ồng dê gơwèt mờ làng bol jơi bơtiàn”.

Cau chài ngan ồng Lâm Xuân, ơm tàm xã Tân Mỹ, kơnhoàl Trà Ôn, càr Vĩnh Long đơs là, ồng kờñ ngan nùs nhơm, rài kis, broă lơh lơh broă bơh Tổng Ƀí thư ồng Nguyễn Phú Trọng dê, kràñ cê jơh nùs tàm broă lơh mơya pơn dềt să ngan, rềp mềr ngan. Is ồn, Tổng Ƀí thư ồng Nguyễn Phú Trọng sền gròi uă ngan tus gah niam chài, bơt bơtàu, prap gàr ală bơta kwơ niam bơnĕ bơh niam chài, kòn bơnus Việt Nam dê. Tổng Ƀí thư sang rài, là Dà lơgar roh tĕ dồ nă cau jak chài ngan, Đảng roh tĕ dùl nă đảng viên, dùl nă kwang bàng jơh nùs jơh tồr, jơh bơta pràn he dê tài dà lơgar, tài làng bol. Cau chài ngan ồng Lâm Xuân, pà gĭt tai: “Tổng Ƀí thư geh nùs nhơm lơbơn niam ngan, kờñ gơboh jơh ală làng bol jơi bơtiàn dồ ết nă cau, tàm hơ̆ geh làng bol kòn cau Khmer. Ồng sền gròi ngan broă prap gàr mờ ngui niam bơhiàn niam chài niam bơnĕ ngan jơi bơtiàn dê, ờ gŏ di lời gơbàn roh tĕ. Să tờm añ dan ưn ngài, jơh nùs kah kơlôi mờ cih kah dà kơl hề bơh Tổng Ƀí thư dê”.

 Ai ồng Thạch Si Phone, lài do là Cau atbồ Mpồl đơs crih tam ya tơrgùm bal Khmer Bạc Liêu pà gĭt, là dùl nă cau lơh broă tàm gah đơs crih tam ya, añ sền dờng màng uă ngan, ưn ngài uă ngan ală nùs nhơm jơh nùs bơh Tổng Ƀí thư ồng Nguyễn Phú Trọng dê gơwèt mờ niam chài jơi bơtiàn, lơh geh ală bơta ƀuơn ngan ai mpồl cau cih jơnau, cau đơs crih tam ya khat gơboh bơceh lơh, tă pơgồp uă rlau tai ai đơs crih tam ya Dà lơgar in. Ồng Thạch Si Phone pơlai soh ngan đơs:“Tổng Ƀí thư ồng Nguyễn Phú Trọng là cau pal ki ngàm uă ngan. Ồng neh jơh nùs tài Đảng, tài làng bol, tàm hơ̆ geh làng bol jơi bơtiàn dồ ết nă cau mờ sùm đơs tàm ală dơ̆ Pơrjum bơh Đảng dê broă lam lơh jat Jơnau lơh nền tàm pơrjum bè gah niam chài. Tŭ do ồng neh sang rài, să tờm añ kờñ gơboh mờ kah ồng uă ngan. Gơnoar broă là dùl nă cau đơs crih tam ya añ jơh nùs lơh jat ală jơnau kơ̆p kờñ bơh ồng dê tŭ gam kis, là sền gròi mờ lời uă nùs nhơm ai broă lơh bơt bơtàu mờ bơtàu tơnguh rài niam chài bơh yau bơh kòn cau Khmer dê”.

Tổng Ƀí thư ồng Nguyễn Phú Trọng sang rài là dùl bơta hoàc huơr dờng ngan gơwèt mờ Đảng, Dà lơgar, làng bol, mpồl jơnau cih, đơs crih tam ya gùt lơgar đơs bal, cau đơs crih tam ya kòn cau Khmer đơs is. Mơya, ală phan lời wơl mờ nùs nhơm jơh nùs bơh Tổng Ƀí thư dê gơwèt mờ niam chài jơi bơtiàn kung gam sùm, jơh ală bol añ pal geh kơnòl bơt bơtàu bal geh cồng nha dùl rài niam chài Việt Nam gơguh jak, cèng bềng bơhiàn niam chài krơi is jơi bơtiàn dê jat nùs nhơm kơ̆p kờñ bơh Tổng Ƀí thư dê.