Tàm 2 ngai do, mờr 600 nă kwang bàng, cau đơs lơh ờ ờs mờng bơh 15 mpồl lơh broă tàm càr Dăk Lăk dê neh tus bal dơ̆ ràng tơlik, mờ 82 dơ̆ ràng tơlik tàm hơ̆ geh uă bơta bè tam ya, đơs crih, jơnau ntas phan teh dê, jơnau lơh lèo. Jăt jơnau đơs bơh mpồl bơyai lơh dê, dơ̆ pơrlòng neh tơrgùm bơta tus bal bơh uă bơnah cau, sơnam krơi is, bơh ală kơnòm dềt pa mìng 13 sơnam tus ală wa mơi tŭ do neh 84 sơnam. Bơta hơ̆ pà gŏ, srơh đơs crih tam ya làng bol gam bơtàu tơnguh lam uă mờ geh bơta gơ hòi gơ jà pràn kơl dang gơwèt làng bol tàm ù tiah càr dê.

Ală mpồl neh jăt tàm tơngume bơh dơ̆ pơrlòng dê là “Dăk Lăk jơnau mpong ntas ngai pa”, geh bơta rcang lài mờ bơcri lơh niam ngan jơh bal mờ tơngume mờ bơta niam đơs crih tam ya mờ broă lơh ràng tơlik dê; cèng uă bơta niam, bơh bơhiàn yau tus bơta pa. Bơta niam chài ờs mờng bơh ală jơi bơtiàn, bơhiàn niam bơnĕ is bơh tơl tiah dê geh ngui mờ ràng tơlik li la mờ uă ngan.