PGS.TS ồng Nguyễn Trọng Phúc, lài do là Viện tưởng Viện Jơnau kah yau Đảng, Họk viện Cíñ trị Dà lơgar Hồ Chí minh đơs sùm, lòt gan tŭ tơngai lơh broă geh Đảng, Dà lơgar tàm jàu at uă gơnoar broă đơng lam tờm kwơ màng ngan ờ kờp bè gah jơnau cribơyai tàm sră pơ àr halà tàm bơta geh ngan. Tổng Ƀí thư ồng Nguyễn Phú Trọng kung geh ală tă pơgồp jak chài is ồn ngan, bơta do neh geh jơh gùt Đảng, jơh gùt làng bol, jơh bal uă bơyô ală lơgar cih dờp, jờng rơ uă ngan: “Do là Gai lòng geh bơh rài lơgar Việt Nam zân củ kộng hòa, Gai lòng Sơrmañ Rơmĭt lời nàng pà ai cau dồ nă să geh cồng nha is ồn jak ngan gơwèt mờ broă lơh kăc màng Đảng, Dà lơgar bơh Dà lơgar dê mờ gam geh uă tă pơgồp dà kơl hề tàm broă lơh mờ ală cau dồ nă să pơn rơ ngan drơng lơh, cih dờp ală dà kơl hề geh bal bơta tă pơgồp dờng ngan bơh Tổng Ƀí thư dê gơwèt mờ broă lơh bơh Dà lơgar he dê”.

Đơs sùm nùs nhơm tam klăc bal jơi bơtiàn mờ bơta pin dờn ngan tàm bơta đơng lam bơg bơh Đảng Kộng sản lơgar Việt Nam dê lam bồ là Tổng Ƀí thư ồng Nguyễn Phú Trọng bơh uă ngan ală rơnàng làng bol tàm jơh gùt lơgar tàm tơngai pa do, mò Bùi Thị An, Củ tịc Mpồl cau ùr geh bồ tơngoh gĭt wă Hà Nội, Củ ñiệm Mpồl cau ùr jak chài bơh Ală Mpồl ala măt cau lơh broă ƀòn dờng Hà Nội dê đơs, tŭ geh klo yal Tổng Ƀí thư ồng Nguyễn Phú Trọng dờp Gai lòng Sơrmañ Rơmĭt bơh ală gah yal tơngĭt jơnau: “Gai lòng Sơrmañ Rơmĭt là Gai lòng dờng màng kwơmàng ngan rlau jơh bơh Dà lơgar Việt Nam dê den tàng tŭ jàu Tổng Ƀí thư ồng Nguyễn Phú Trọng in ngan là tơngŏ bơta cih dờp bơta ưn ngài bơh jơh gùt Đảng, jơh gùt làng bol dê gơwèt mờ Tổng Ƀí thư ồng Nguyễn Phú Trọng”.

Uă jơnau đơs kung jờng rơ, tàm 3 tơngai lơh broă pa do, bơh khoă XI (nam 2011) tus tŭ do, Tổng Ƀí thư ồng Nguyễn Phú Trọng neh geh ală dà kơl hề dờng ngan  gơwèt mờ broă lơh bơtàu tơnguh Dà lơgar, is ồn là tàm tơngai lơh pràn lơh mờ măi mok jơh lơm, mut gơ rờm bal mờ ală lơgar, lơh jat broă lơh kwơ màng bè sền gàr Dà lơgar tàm bơta pa. Is ồn, Tổng Ƀí thư geh tă pơgồp dà kơl hề dờng ngan bè gah jơnau cribơyai tàm sră pơ àr, mờ broă lơh lời uă ngan tŭ jiơ kơlôi sơnơng mờ geh bơta sền gĭt pa là jơnau cih: “Bàr pe broă bè jơnau cribơyai tàm sră pơ àr mờ bơta geh ngan bè Củ nghĩa xã hội mờ gùng lòt tus Củ nghĩa xã hội tàm lơgar Việt Nam”. Do ngan là bơta tơrgùm wơl broă lơh tam gơl pa gơ jat bal mờ gùng lòt Xã hội Củ nghĩa mờ Wa Hồ neh sac rơwah. Den tàng bè hơ̆, phan ƀàn dờng màng kwơmàng ngan rlau jơh bơh Đảng mờ Dà lơgar dê jàu pà Tổng Ƀí thư ồng Nguyễn Phú Trọng in là bơta cih dờp mờ jờng rơ uă ngan broă lơh tă pơgồp dà kơl hề bơh Tổng Ƀí thư dê tàm ală gah lơh broă. Phó Giáo sư – Tiến sĩ ồng Đào Duy Quát – lài do là Phó Kwang atbồ Ƀan Tuyên giáo dà lơgar đơs: “Đảng, Dà lơgar he yal Jơnau lơh nền mờ jàu pà Gai lòng Sơmañ rơmit ai Tổng Ƀí thư ồng Nguyễn Phú Trọng in là dùl bơta cih dờp bơh Đảng, Dà lơgar mờ làng bol he dê gơ wèt mờ dà kơl hề mờ ală tă pơgồp dờng ngan bơh ồng Nguyễn Phú Trọng dê gơ wèt mờ broă lơh kac màng mờ broă lơh tam gơl pa bơh dà lơgar he dê, jơi bơtiàn he dê, do là bơta cih dờp dà kơl hề mờ bơta tă pơgồp dờng màng jak ngan gơ wèt mờ broă lơh kac màng bơh jơi bơtiàn he dê”.

Ồng Y Nuel Niê, atbồ ƀòn Ako Dhong, sơnah ƀòn Tân Lợi, ƀòn dờng Buôn Ma Thuột, càr Dăk Lăk chờ hờp tŭ klo yal Ƀộ Cíñ trị neh geh jơnau lơh nền jàu Gai lòng Sơmañ rơmit pà Tổng Ƀí thư ồng Nguyễn Phú Trọng in. Ồng Y Nuel đơs: “Tổng Ƀí thư ồng Nguyễn Phú Trọng dờp Gai lòng Sơrmañ Rơmĭt là di pal ngan. Dà kơl hề dờng ngan rlau jơh bơh Wa dê là kơryan sa kuề sa kuà, mờ kơryan pràn ngan, chu lòng pal chu jơh tus tàm nggu. Tus tŭ do, broă lơh kơryan sa kuề sa kuà bơh Wa dê neh lơh geh cồng nha niam ngan”.

Klo yal Ƀộ Cíñ trị neh geh Jơnau lơh nền jàu Gai lòng Sơmañ rơmit pà Tổng Ƀí thư ồng Nguyễn Phú Trọng in, ồng Trương Duy Cảnh, 70 sơnam, 44 sơnam Đảng, hìu tàm mpồl ƀòn drà 2, sơnah ƀòn Lê Lợi, ƀòn dờng Kon Tum, càr Kon Tum pà git: “Broă Tổng Ƀí thư ồng Nguyễn Phú Trọng geh Dà lơgar jàu Gai lòng Sơmañ rơmit là dipal ngan. Nùs nhơm Wa dê là nùs nhơm bơh cau Kộng sản kờñ gơboh làng bol, tài làng bol. Kuơmàng tàm broă lơh kơryan sa kuề sa kuà bơh Đảng mờ dà lơgar dê mờ tàm hơ̆ wa Nguyễn Phú Trọng là Kwang atbồ Mpồl rơcang lài kơryan sa kuề sa kuà bơh Đảng dê, Wa neh sồr lơh kràñ cê, jơh nùs, ờ pleh, ờ cèng bơta să tờm is, ờ sơmờm kuơ. Wa lơh làng bol in dòn, Đảng in đòm, rài lơh sa xã hội củ nghĩa bơtàu tơnguh pràn. Ală rơnàng kwang bàng lòt tơnơ̆ Đảng dê pal bơsram, đòm jat nàng dipal là đảng viên, dipal là kwang bàng, dipal là làng bol lơgar Kộng hòa xã hội củ nghĩa Việt Nam”.