Dùl ƀùi drim tàm bồt Nhơn Châu (Cù Lao Xanh), ală ơhò lơh ka kung gam tus anih ơhò ơm bè ală ngai sơl. Mìng krơi, tềng rbàng anih ơhò ơm gal tai măy kŭp, àng đèng, cau chài mờng mờ rơhiang nă năc lòt nhơl ngài. Ală cau mìng kwèng mờ tàm pơn jăt rài kis lơngăp lơngai bơh ƀòn tras ka dê tŭ do gơgơs “cau lơh lơma” tàm jơnau yal rài kis ờs mờng he dê tơn. Ală cau chài mờng jăt làng bol lơh ka lòt tus dà lềng, ñơ̆p triang sền ñhơ̆t ƀùi dà lềng (san hô), lòt tàm gùl ală gùng dềt bồt dê, boh bơr mờ làng bol ƀòn lơgar. Tus mang, dùl mpràp đơs crih tam ya geh lơh tơn kềng bồt gơhòi gơ jà gĭt nđờ rbô nă làng bol mờ năc lòt nhơl tus sền.

Ờ mìng là dùl broă lơh rài bồ tơngoh lơm, Nhơn Châu dơ̆ sơnrờp geh gĭt nđờ tơlăk nă cau sền tàm jơh gùt lơgar gĭt tus bơh ală rùp hin ngan ngồn ngan bè kòn bơnus mờ rài kis tiah bồt ngài. Bi Hồ Thị Đoan Trang, làng bol thôn Tây, sàh Nhơn Châu pà gĭt, làng bol chờ hờp ngan tŭ ƀòn tờm he dê gŏ măt tàm broă lơh sơnio rùp mùl màl mờ geh dơ̆ tìp măt lơh kwèng mờ ală cau mờng chài:

“Añ chờ hờp ngan tài jŏ ngan gơbloh bồt hơ̆ sồng geh dùl broă lơh dờng mờ gơhòi gơ jà uă năc lòt nhơl ngài tus mờ bồt Cù Lao Xanh añ dê. Añ gơn kơnờm là bồt rơ̆p geh uă broă lơh rlau tai nàng bơtàu tơngguh lòt nhơl”.

Ồng Nguyễn Tiến Dũng, Bí thư Đảng ủy sàh Nhơn Châu pà gĭt, gơdờp bơh broă lơh rài bồ tơnguh mùl màl dong rùp hin bồt geh gơrề uă làm bă tiah tàm ală anih mblàng yal jơnau, gơhòi gơ jà tai uă năc lòt nhơl ngài tus mờ ƀòn lơgar:

"Tàm broă lơh “Say Hi gơglŏ gơcrà” pa do tàm anih yal tơnggĭt jơnau mpồl bơtiàn, uă làng bol mờ năc lòt nhơl ngài gĭt tus Nhơn Châu uă ngan. Añ kơ̆p kờñ là Nhơn Châu mờ bơta geh mờ tŭ niam bơh broă lơh dê rơ̆p gơhòi gơ jà gal ngan năc lòt nhơl ngài nàng yal tơnggĭt uă rùp hin, kòn bơnus, rài kis ƀòn lơgar mờ ù tiah ƀòn lơgar tiah do dê nàng bơtàu tơngguh tàm tơngai tus”.

Bal mờ ală broă lơh sơnio rùp mùl màl, Gia Lai kung gam yal ală jơnau he dê bơh rùp hin mờ săp đơs gam geh hòi là điện ảnh. Ala tài lơh lơma tàm anih kŭp rùp jơh ală broă, uă mpồl lơh lơma săc rwah ală anih pơnrơ gơ jăt bal mờ srơh Tây Sơn nàng lơh tơnggŏ wơl dùl tŭ tơngai kah yau khin cha jak chài. Pôs đồng ling ntàu tam lơh, tiah tàp ling, wàng ơseh halà hìu jàm geh lơh roh uă ngan tŭ jiơ ờ mìng nàng drơng ală anih kŭp video in lơm.

Tơnơ̆ tŭ lơma lơh sir, jơh gùt ù tiah do rơ̆p geh gàr wơl bè dùl anih lơh lơma pờ, tiah năc lòt nhơl ngài gơtùi cơnđoà mŭt tàm bơta kah yau, sền gŏ niam chài mờ wă wờng tai bè bă ù geh sền là tiah tờm bơh chờm vòh Tây Sơn dê. Cau pơlam lơh ồng Võ Đức gam lam lơh dùl rơndăp broă lơh điện ảnh tàm sàh Tây Sơn, yal:

“Bol hi kờñ tìp mờ năc sền bơh rùp să pa jăt tàm ală broă geh ngan nàng cau tàm lơma geh rềp mềl, geh jơnau tàm dơlam nùs mờ rài kis ờs mờng, rềp mềl rlau mờ tơl nă cau. Bơta dơ̆ do geh lơh drơng ai năc lòt nhơl ngài in, kung bè dùl phan lời wơl dềt mờ mpồl lơh lơma lời ai ƀòn tờm he dê in”.

Dilah săp đơs mờ rùp hin lời prăp wơl jơnau kah wơl den gùng đơs crih pờ wơl mpồng lam cau kơnòm tus mờ Gia Lai. Mega Concert “Gia Lai- Brê bơnơm dờng tìp dà lềng tơlir” tàm dơ̆ sơnđờm Nam Lòt nhơl Dà lơgar 2026 geh lơh tàm ƀòn dà lềng Quy Nhơn neh bơtòm tơrgùm geh uă cau chài mờng tiơng pơnrơ, gơhòi gơ jà pơgăp 70 rbô nă năc bơh uă càr, ƀòn dờng. Ờ dồ êt nă cau dơ̆ sơnrờp tus Gia Lai mìng tài bơh dùl măng đơs crih tam ya lơm, mơya tơnơ̆ hơ̆ lời tai tŭ jiơ lòt sền dà lềng, brê mờ niam chài ƀòn yau. Bơyô kơnòm să Lê Thanh Phương Hạ, pà gĭt:

 “Oh tàm Nha Trang tus. Dơ̆ sơnrờp kơnhoàl ù tiah tàm gùl lơgar he geh dùl concert dờng bè hơ̆, den tàng ngan ngồn oh pal lòt”.

Ală jơnau yal geh yal bơh sơnio rùp, rùp hin mờ săp đơs (điện ảnh) mờ gùng đơs crih gam cèng wơl cồng nha loh làng ai gơguh tai lòt nhơl càr Gia Lai in. Is nhai 7 nam 2026, càr wă pơgăp 1 tơlak 800 rbô nă năc, gơguh 40% pơndrờm bal dùl tŭ mờ nam lài. Kờp jơh 7 nhai geh rlau 10 tơlak 550 rbô nă năc. Tàm hơ̆, năc ală lơgar gơguh pơgăp 77%. Priă geh bơh lòt nhơl mờr 23 rbô tơmàn đong, gơguh 22%.

Bơh ngkời ală khà kờp hơ̆ là bơta tam gơl tàm broă lơh lòt nhơl: bơh yal uă anih tus gơ tam gơl wơl tus lơh geh sền gŏ; bơh yal tơnggĭt anih niam tus yal ală jơnau lơh năc lòt nhơl ngan kờñ he lòt sền gĭt is. Ồng Hà Văn Siêu, Phó Lam bồ Kụk Lòt nhơl Dà lơgar Việt Nam đơs là, càr Gia Lai pal lơh niam broă lơh pa do: 

“Gia Lai pal lơh bè lơi gàr jơng năc lòt nhơl ngài jŏ rlau bơh ală sền gŏ jrô rlau, kơno ală jơnau yal gơkờñ mờ krơi is crih crài rlau bè dùl anih tus. Gia Lai kung pal jòi lơh jơnau măy mŏk nàng lơh jơnau yal tơnggĭt phan kwơ geh is lòt nhơl. Bol he ngui măy mŏk yal ală jơnau gơkờñ bè Gia Lai rơ̆p là đah pal jăt, jơnau sồr mờ kơnòl broă gơ tơlik ai gah lòt nhơl Gia Lai in đơs is mờ Việt Nam in đơs bal tàm tơngai tus”.

Gia Lai gam rwah broă lơh mŭt tàm lơh sa mờ măy mŏk lơh rài bồ tơngoh ờ di là nàng lơh gơlik geh ală broă lơh tŭ do, mờ nàng tơl broă lơh sơnio rùp, tơl nơm lơma, pah măng đơs crih tam ya gơgơs dùl jơnau jà lòt sền bă ù. Mờ tŭ làng bol ƀòn lơgar gơgơs dùl bơnah bơh ală jơnau yal hơ̆, năc lòt nhơl ngài ờ mìng geh yal uă, mờ gam geh yal tơnggĭt tai bơh bơhiàn niam bơnĕ is mờ jơnau kah wơl mpồl bơtiàn dê tơn.