Hìu ƀềp dềt hìu bơnhă bi Ksor H’Liên dê, 37 sơnam mpong ntas sap ƀŏ mpal. Tàm hìu ƀềp hơ̆, geh bơnhă ồs sing mờ lòng hìt sùm, geh ală sơ̆, lềng dà, ală đo tơngời ro yồng kềng kơlik… Mờ geh dùl nơm điện thoại ngac ngar geh ơn bồ đap nàng kup rùp wơl tơl broă lơh bi H’Liên dê.

Bi trŭ gơm phan sa ndang, quay video ndang. Bơh broă rơcang phan, trŭ gơm tus tŭ phan sa geh gơm sin, jơh ală ndrờm geh bi kup rùp wơl mờ pơnđàng tàm mạng sàh hội. Gơ wèt mờ H’Liên, hìu ƀềp dềt hơ̆ ờ mìng là anih nàng trŭ gơm biap piang hìu bơnhă dê, mờ gam lơh bi kah bè rài kis cau Jarai dê tai:

“Hìu ƀềp do gơ wèt mờ añ ờ mìng là anih nàng trŭ gơm biap piang mờ gam là anih añ kờñ gàr wơl dùl bơnah jơnau kah kir cau Jarai bol hi dê. Bè hơ̆ den tàng añ lơh ngan nàng lơh geh dùl anih đềt mềr, geh bơnhă ồs, geh sơ̆, geh lềng dà, geh đo tơngời ro. Añ kung kờñ là tŭ cau tus ndo nàng jòi git tai bè mờng kwèng cau Jarai sàu sa, ơm kis mờ sền gàr ală bơta niam chài he dê”.

Digơlan ală rùp hin mờng kwèng hơ̆ neh lơh gơlik bơta niam krơi is tàm ală video H’Liên dê. Bơh hìu ƀềp dềt, ală phan sa mùl mờng kwèng ngan tàm rài kis cau Jarai dê bè nha bùm blàng chàng, blơn bơtang ƀŏ mờ ka rì, boh ngòñ sràt… sơn đờm cơnđuà lik bơh internet tus mờ uă cau rlau. Tŭ ală video geh H’Liên pơnđàng tàm facebook Mị Son, neh gơ hòi giw jà git nđờ rhiang rbô, hơ̆ sồng git nđờ tơlak dơ̆ sền mờ cih wơl jơnau đơs:

“Bơh chờm añ sơnơng là he quay video nàng prap wơl, hơ̆ sồng yal bơyô, cau tờm in sền. Ờ sơnơng là ală video hơ̆ geh uă cau kờñ mờ sền. Geh ală jơnau đơs lùp bè bơta chài gơm biap, phan nàng gơm, bè bơhiàn bơh yau cau Jarai dê. Añ gŏ gơ lơh chờ hờp ngan mờ kung ờ sơnơng là geh bè hơ̆”.

Bơh bơta sền gròi hơ̆, ală biap sa tàm videp kung rơhời geh tŭ niam tus mờ cau sền. Bi H’Liên gơm biap sa mờ yal tơnggit biap sa tàm mạng sàh hội. Ală biap sa ờs mờng ờ mìng geh uă cau git tus rlau mờ gam cèng wơl priă jền lơh geh hìu bơnhă in. Is ồn, biap ka hồl ƀŏ mờ nha é mờ boh ngòn sràt geh cau kờñ ngan:

“Bơh chờm añ gơm ală biap do là nàng drơng broă sàu sa hìu bơnhă dê in lơm gời. Tơnơ̆ video geh uă cau sền den geh uă cau lùp añ là bi tac sơl, bi gơtùi pơyua añ in dùl êt ka ƀŏ sơl. Tŭ hơ̆ den hơ̆ sồng añ sơnơng là, dilah tơl nă cau neh kờñ biaơ do den ñchi bơh tài he ờ lơh nàng tac. Mờ ka hồl ƀŏ nha é là biap sa mờ añ pin dờn ngan, tài do là biap sa mờng kwèng cau Jarai dê mờ kung là biap sa geh uă cau lùp ngan rlau jơh. Tŭ do den bơdìh mờ yal tơnggit biap sa tàm mạng sàh hội añ gam geh tai dùl êt priă jền hìu bơnhă in”.

Tơnơ̆ ală gơl video geh tơlak nă cau sền hơ̆ gam geh bơta pơn jờng, lòt bal bơh hìu bơnhă, is ồn là bơklau bi dê, bi Ksor Hai. Bi là cau ơm rềp, sền gŏ bơh ală ngai sơn rờp bi H’Liên quay video, mờ kung là cau wă rlau jơh bơta chờ hờp, bơta gơboh mờ bi lời ai broă do in:

“Bơh chờm gŏ pơ ùr gơm biap kòn cau he dê, hìu bơnhă kung chờ hờp mờ ờ sơnơng là ală biap sa mờng kwèng geh uă cau sền gròi, kờñ bè hơ̆. Gŏ pơ ùr kờñ mờ lơh ngai sơlơ niam den cau lơi kung ring bal lơm, cau lơi gơtùi dong broă lơi den dong. Hìu bơnhă kung chờ hờp tài bơh ală video hơ̆, uă cau git tus biap sa cau Jarai dê rlau tai”.

Bơta lơh gơs bơta gơ kờñ tàm ală video bi H’Liên dê ờ gơ ơm tàm bơta kal ke, mờ là bơh ală rùp hin mờng kwèng, ngan ngồn. Bi Phan Thị Liên ơm tàm sơnah ƀòn Pleiku, càr Gia Lai pà git:

“Añ kờñ ngan sền ală video H’Liên dê tài gơ sền ngan ngồn mờ rềp mềr. Bơh ală jơnau yal tàm rài kis bè ờs, bi ờ mìng dong tơl nă cau git rlau tai bè rài kis, niam chài kòn cau Jarai dê mờ gam prap wơl ală bơta niam ngan, mờng kwèng ngan ƀòn lơgar dê”.

Bơh ală biap sa mờng kwèng tàm hìu ƀềp hìu bơnhă dê, bi H’Liên gam ai jơnau yal bè rài kis mờ niam chài cau Jarai dê tus rềp rlau mờ uă cau mờ bơta song ring:

“Añ ờ sơnơng là he gam lơh bơta lơi dờng màng. Añ mìng kờñ gơm ală biap sa mờ añ git, Mơya dilah bơh ală biap sa hơ̆ là tơl nă cau git tai dùl êt bè cau Jarai den añ sơnơng hơ̆ kung là dùl broă nàng sền gàr niam chài kòn cau he dê. Mờ añ kơp kờñ tơnơ̆ do, ală biap do kung gam geh gơm sùm, kung gam geh cau git tus, ờ mìng tàm ƀòn lơgar mờ gam tàm ală tiah ndai tai”.