Bơh tŭ dà mbòr ƀòn K’ Li A, sơnah ƀòn Đạt Hiếu, ƀòn drà dờng Buôn Hồ, càr Dăk Lăk geh lơh wơl, bŭ lah hìu neh geh tơrlung dà mơya lŏ H’ En Niê kung gam tus tềng mbòr dà nàng đơ dà. Lŏ H’ En geh mè bơto tàm broă lơh kañ nàng ƀĕ tơrnờm. Lŏ H’ En sơlơ chờ tŭ git ƀòn lŏ dê pa geh lơh Hợp ták xã lơh sa suơn sre mìng lơh ală bơta phan ờs mờng, tàm hơ̆ geh tơrnờm. Hơ̆ sồng do là phan tơrnờm OCOP ƀòn K’ Li A dê ờ mìng geh ngui tàm ală dơ̆ ñô sa ƀòn dê, ngai chờ bơh sơnah ƀòn mờ gam drơng cau năc tus nhơl sền in mờ lơh geh uă tus mờ ală tiah tàm gùt lơgar in git tus.

Lŏ H’ En Niê pà git: “Añ kơ̆p kờñ là ală kấp, gơnoar atbồ ai tơl bơta niam nàng pờ geh ală ơdŭ bơto cau gam kơnòm tàm ƀòn K’ Li A do in geh bơsram ală broă lơh ờs mờng kòn cau dê. Kòn ùr den bơsram tàñ ồi, ƀĕ tơrnờm; kòn klao den bơsram tàñ sơ̆, bơsram ală lơh mờ git teh, uh phan ờs mờng kòn cau dê. Geh bè hơ̆, hơ̆ sồng gơtùi prăp gàr kơl jăp bơta niam chài kòn cau dê”.

Rài kis làng bol kòn cau Rơđê tàm ƀòn K’ Li A mìng kơnờm tàm broă lơh sa suơn sre, mờ ală bơta phan tam tờm bè kơphe, tiêu, sầu riêng. Bơh dềt tus dờng kis tàm ù tiah do, ồng Y Chép Mlô gŏ nền nòn ngan ală tam gơl mờ bơtàu tơnguh bơh tơl hìu tàm ƀòn dê; Lơh sa ngai sơlơ bơtàu tơnguh, ờ gam hìu nhă lơi jơgloh sào, ào ờ geh soh. Mơya ồng Y Chép kung gam kơlôi rơcang ngan tŭ kah wơl bè ală nam nhai lài do, mờ nùs nhơm kờñ iăt geh dùl jơnau đơs pơn đik, săp ntas cing mồng, săp ntas kơmboăt, kơwào, ha là mìng dùl săp ntas cau piah kòi… Jơh ală bơta do mìng gam kah tàm nùs nhơm kơlôi den ni sơna geh lơh wơl, geh ngan wơl. Ồng Y Chép Mlô chờ hờp đơs: “Jơh ală cau tàm ƀòn ndrờm dờn jăt kra ƀòn mờ kwang atbồ ƀòn, lơh ngan tơriang tàm broă lơh sa den broă lơh sa geh bơtàu tơnguh, hìu lơi kung geh prăp phan bơna. Uă hìu neh lơh hìu dờng niam, blơi tơl ală bơta phan ngui tàm rài kis pa. Tŭ do, bol añ neh sền kwơ tàm broă prăp gàr bơhiàn ờs mờng kòn cau bol añ dê”.

Ồng Y Ngia Mlô, Ƀí thư Ci ƀộ ƀòn K’ Li A pà git tàm khà 277 hìu tàm ƀòn, mìng gam 13 hìu rơƀah, geh tus 43 hìu tơl ngui tơl sa mờ pas gơs. Tŭ do gùt ƀòn kung gam 40 nơm hìu jòng ờs mờng kòn cau dê nàng lơh anih ơm mờ drơng tàm broă sào sa bơh cau năc lòt nhơl in. Do là mpồl broă lơh tờm tàm broă bơtàu tơnguh lơh sa, sơrbì bơhiàn ờ niam, geh sùm bơta niam chài krơi is kòn cau Rơđê dê. Ồng Y Ngia Mlô pà git: “Bol añ sùm prăp gàr bơhiàn ờs mờng kòn cau Rơđê dê bè: duh khoai dà mbòr, duh khoai kờñ geh bơta pràn kơl dang să jan ai làng bol tàm ƀòn in. Làng bol kung ƀĕ tơrnờm, prăp hìu jòng, mờ ală bơta phan uh, phan teh, tàm hơ̆ kwơ màng ngan là cing mồng”.

Mò Nguyễn Thị Trúc, Ƀí thư Đảng ủy sơnah ƀòn Đạt Hiếu pà git: Rơndăp broă lơh: “Bơtàu tơnguh lòt nhơl mpồl bơtiàn mờ ngui ală bơta kwơ niam chài cing mồng, bơtàu tơnguh broă ƀĕ tơrnờm gơs phan OCOP” ai geh jơnau ring bal bơh ală làng bol kis tàm ƀòn K’ Li A dê. Đảng ủy neh jào tus tơl bơnah broă ai ală mpồl lơh broă, mpồl cíñ trị tàm sơnah ƀòn in lơh. Mò Nguyễn Thị Trúc đơs nền: “Ngui ală bơta kwơ niam chài pơgồp bal mờ bơtàu tơnguh lòt nhơl. Ai jơnau kờñ bơtàu tơnguh lòt nhơl mpồl bơtiàn kung bè ngui bơta kwơ niam chài cing mồng. Bơtàu tơnguh broă ƀĕ tơrnờm gơs dùl phan OCOP nàng drơng cau năc lòt nhơl in”.

Nàng dong kờl hợp ták xã tàñ ồi yau ƀòn K’ Li A lơh broă, Mpồl cau ùr ƀòn drà dờng Buôn Hồ neh pơgồp bal mờ Hìu bơto broă lơh nàng pờ ơdŭ bơto broă tàñ ồi yau, mờ pà oh mi cau ùr tàm ƀòn in 03 nơm bơnơ̆ tàñ. Mò Nguyễn Phạm Minh Tiết, Củ tịc Mpồl cau ùr ƀòn drà dờng Buôn Hồ ờ sŭk đơs: pal lơh bè lơi nàng tăc geh ală phan neh tàñ, gàr geh tơl priă ală cau tàm mpồl in? Ală cau do geh kis mờ broă lơh do, hơ̆ sồng geh lơh sùm. Mò Nguyễn Phạm Minh Tiết pà git: “Bơdìh broă jào priă, jào bơta git wă den ală cau tàm hợp ták xã do pal geh gùng dà kă bro geh cồng nha nàng phan mờ ală cau do tàñ gơs ờ mìng geh lời nàng ràng tơlik mờ pal geh tus mờ cau ngui. Pal geh nùs nhơm lơh pràn is mờ tơnguh jơh nùs nhơm bơh să tờm dê tàm broă prăp gàr bơta niam chài kòn cau”.

Đơ dà mbòr gơlik geh bơh tàm tiah ù, siah tàm dră tơrnờm neh kơ̆t tềng mpang hìu. Tê at ding bồp ñô, bơta bơkah dà tơrnờm lơh nùs nhơm bal mờ să jan niam bơnĕ ngan. Săp ntas cing mồng bơh tàm ală hìu jòng, lơh mpong tus tàm ală suơn kơphe gam hòn tơlir niam ƀòn K’ Li A, sơnah ƀòn Đạt Hiếu, ƀòn drà dờng Buôn Hồ dê.