Sền wơl tơl pang rùp geh cùp bal mờ ƀồc Tổng Ƀí thư ồng Nguyễn Phú Trọng, mò H’Yam Bkrông ơm tàm ƀòn Tơng Jú, xã Ea Kao, ƀòn dờng Buôn Ma Thuột, càr Dăk Lăk ngoh rơngac yal wơl, mò pơn yờ să ngan 2 dơ̆ geh tìp mat Tổng Ƀí thư. Kuơmàng, nam 2011, mò mờ ală oh mi cau ùr gam tàñ is àu kòn cau Rơđê niam ngan pà Tổng Ƀí thư in tŭ ồng rê còp ƀòn: “Tŭ klo yal là sơn đơm ruồi brài mơ nàng tàñ àu pà Wa in, pơyua jơh bơta kờñ gơboh, bơta ki ngàm he dê gơ wèt mờ Wa. Dơ̆ 2 tìp Wa là tŭ añ lòt Pơrjum jờng rơ cau geh bồ tơngoh bơsram sră, cau geh bồ tơngoh git wă, cau lơh sa kă bro geh pơn rơ jak mờ cau geh bơngă pin dờn jơi bơtiàn dồ êt nă cau tàm Hà Nội. Añ gŏ ki ngàm ngan ală jơnau Wa nting tơngkah gơ wèt mờ làng bol jơi bơtiàn dồ êt nă cau đơs is mờ gùt lơgar đơs bal, pal bơt bơtàu mpồl tam klac dờng, geh  tam klac den hơ̆ sồng gơtùi lơh geh cồng nha”.

Kah sùm jơnau nting tơngkah bơh ƀồc Tổng Ƀí thư dê, ală nam do, mò H’Yam bal mờ 45 nă cau tàm mpồl lơh broă bal tàñ ồi kòn cau Tơng Bông (ndrờm là cau Rơđê tàm xã Ea Kao), neh ngai sơlơ tam klac brồ guh, lơh ngan jòi git, lơh pa rùp hin ồi àu, lơh gơlik uă phan kòn cau pa, pơgồp bal mờ prap gàr niam chài bơh yau nàng lơh ƀòn lòt nhơl mpồl bơtiàn.

Gơ wèt mờ cau chài jak ngan ồng A Biu ơm tàm ƀòn Klếch, xã Ngọc Bay, ƀòn dờng Kon Tum, càr Kon Tum bulah neh dờng sơnam, mat sền ờ loh tai, jơng neh rơm, mơya ồng kung gam jơh nùs mờ broă jòi tơrgùm đờng goòng mờ bơto wơl ai ală cau kơnòm să in. Ồng lời ai jơh bơta jơh nùs he dê nàng jòi cing mồng, đờng, sơng gơr, rùp dơm chi..tàm mpồl bơtiàn kòn cau Bahnar, cèng rê tàm hìu he dê mờ lơh tiah do gơ gơs dùl anih lòt nhơl mpồl bơtiàn. Ồng A Biu yal: “Nàng yal tơnggit bè niam chài Tây Nguyên den bulah să jan neh kra mơua tàm hìu añ neh lơh dùl anih lòt nhơl, jòi tơrgùm geh mờr 30 bòr cing. Tŭ do, añ kung lòt mblàng yal bè niam chài uă ngan, bơh kơnòm bơsram tus oh kòn tàm hìu, làng bol tàm ƀòn. Geh tŭ pa do añ gam lòt bơto cing mồng Bahnar. Kơp kờñ geh bơta sền gròi bơh dà lơgar dê den ngan là làng bol rơp sền gŏ bơta tam klac bal jơh nùs tàm ƀòn lơgar he dê, bal mờ gơp lơh mpong ntas sơl sap dròng cing”.

Broă sền gàr ală phan lời wơl niam chài tàm Tây Nguyên gam dờp geh bơta sền gròi, tàm pơ dờn bơh uă cau kơnòm să dê. Rơ Châm Tứ ơm tàm ƀòn Mrông Yố 1, xã Ia Ka, kơnhoàl Chư Păh, càr Gia Lai pa rơp 15 sơnam mơya neh git mờr 10 jơnau yal yau bơh cau Jarai dê. Oh gŏ bơtuah ngan tài geh ồng git yal yau den tàng pal lơh ngan bơsram uă: “Bơsram tai sơlơ uă jơnau yal yau sơlơ niam, dilah he ờ git den ồng ờ gam tai den rơp roh jơh, bơta niam chài kòn cau he dê den he pal sền gàr, mblàng wơl mờ đòm jat. Bulah ờ git uă bè ồng den kung pal gàr wơl dồ êt ai tơnơ̆ do in”.

Sền gàr mờ ngui niam ală bơta kuơ niam chài bơh yau, cau chài jak ngan ồng A Đuh ơm tàm ƀòn Trang, xã Đăk La, kơnhoàl Đăk Hà, càr Kon Tum sùm rê tàm ală ƀòn nàng jòi ală jơnau pơnđik. Ồng kung kơlôi sơnơng, lơh pa wơl ală bơta đờng goòng bè cing, mồng, t’rưng, ting ning, klông put mờ bơceh ală jơnau pơnđik pa. Ồng đơs là, hơ̆ là broă nàng bơtàut ơnguh niam chài tàm bơta pa: “Gùng pơnđik tờm kung gam gàr bè ờs, jat tàm ală bơta tờm hơ̆ mờ he cih jơnau pa. Ngui bơh ală gùng đơs hơ̆ nàng bol he lơh gơ nim niam rlau nàng tơnơ̆ do geh ală jơnau pơnđik drơng làng bol he in niam rlau”.

“Niam chài là huềng, là ntìng bơh jơi bơtiàn dê, niam chài gam den jơi bơtiàn gam” – jơnau đơs bơh ƀồc Tổng Ƀí thư ồng Nguyễn Phú Trọng dê tàm Pơrjum niam chài gùt lơgar nam 2021 gam bè ờs sơl bơta kuơ. Kah kơlôi tus ƀồc Tổng Ƀí thư, làng bol ală jơi bơtiàn Tây Nguyên pơn jat tai sền gàr, ngui niam bơta niam chài bơh yau kung là sền gàr huềng jơi bơtiàn dê tơnơ̆ do in.