Mò H’Rưm H’mok ơm tàm ƀòn Hra Ea Hning, xã Dray B’hăng, kơnhoàl Cư̆ Kuiñ, càr Dăk Lăk yal, nam 2020, tŭ neh rlau 60 sơnam, bơta pràn kơldang să gơmù uă ngan ờ rơgơi lơh ală broă lơh kơn jơ̆. Nàng geh priă jền ngui sa tàm rài kis ai să tờm he in mờ ròng dồ nă kòn kwĕt kơlte, mò H’Rưm H’mok kơlôi tus broă lơh wơl bơrnơ̆ tàñ ồi yau. Tŭ gam dềt, H’Rưm H’mok neh geh mè bơto wơl broă tàñ ồi. Tŭ dờng, broă tàñ ồi bơh mò H’Rưm dê ờ geh cau lơi tàm ƀòn gơtùi bàn geh. Lơh wơl broă lơh, ngai nhai tơryăng tơryồng, jơh nùs jơh tồr kềng bơrnơ̆ tàñ ồi. Mơya bơsir wơl, phan bơna ồi yau bơh mò H’Rưm dê lơh gơlik ờ tơl lơh geh jơnau kờñ bơh cau blơi dê. Tài bơh mò chài ngan broă lơh Kteh. Bơta chài do là bơta chài ngan sềr rùp bơka tàm phan ngui soh kòn cau Rơđê dê, ờ huan ngan geh cau chài lơh broă do.

Tàm ƀòn Hra Ea Hning geh bàr pe nă oh mi cau ùr să jan ờ pràn, lơbơn ñâm ñô sùm, ờ gơtùi lơh ală broă lơh jơng tê kơn jơ̆ den tàng rài kis hìu bơnhă khi dê kal ke ngan. Khi kờñ tus bal tàñ ồi yau mờ mò H’Rưm. Bè hơ̆ là tàm nam 2021, mpồl lơh broă bal tàñ ồi yau ƀòn Hra Ea Hning dê geh tơlik măt bal mờ 6 nă cau tàm mpồl. Mò H’Rưm H’mok là cau ătbồ mpồl lơh broă bal do. Bal mờ broă bơto pơlam ai ală cau tàm mpồl in bè bơta chài sềr rùp bơka hơ̆ là bơta chài Kteh, mò H’Rưm H’mok dờp lơh tơn kơnòl broă jòi drà tăc phan ai jơh ală cau tàm mpồl in. Mò H’Rưm H’mok, đơs: Tàñ ồi yau neh lơh geh priă jền ai añ in. Tài bơh añ neh kra gơbloh, ờ jai lòt lơh broă tàm mìr tai den tàng bè hơ̆ añ tàñ ồi yau. Kơnờm bơh tàñ ồi yau mờ oh mi cau ùr geh broă lơh, geh priă jền sùm tai. Añ chờ hờp ngan tài bơh tàm tŭ sơnam kra mơya kung gam geh sơl broă nàng lơh. Dồ nhai añ lơh geh 4 tơlak đong, gen tàng bè hơ̆ añ geh rài kis kơ̆ kơl jăp rlau.

Bi H’Neo, là cau bơh mpồl lơh broă bal tàñ ồi yau ƀòn Hra Ea Hning pà gĭt: Bi mŭt bal tàm mpồl lơh broă bal do neh mờr 03 nam do. Tơngai sơnrờp, ală bi ờ geh anih ơn bơrnơ̆ tài ồi den tàng pal jồm rồm hìu bơh dồ nơm hìu rơng tàm ƀòn dê nàng lơh anih ơn bơrnơ̆ tàñ ồi. Bi H’Neo, yal: Bơh tŭ geh mpồl tàñ ồi yau tus dì tŭ do den rài kis să tờm dê geh uă bơta ƀươn. Dồ nhai den añ tài geh 4 pang ồi, lơh geh priă 4 tơlak đong. Tàm mpồl tàñ ồi yau den jơh ală cau lơi kung kal ke lơm. Tàm 6 nă oh mi cau ùr tàñ ồi yau bol hi den kung geh sơl oh mi cau ùr kal ke ngan.

Phan bơna ồi yau bơh mpồl lơh broă bal ƀòn Hra Ea Hning dê geh bơngă pin dờn mờ năc blơi phan bơh tiah rềp tiah ngài. Nam 2022, mpồl lơh broă bal geh Mpồl Bơh nùs nhơm Dăk Lăk hòi jà tă pơgồp pà dồ nơm hìu rơng ờs mờng bơh yau kờp priă 300 tơlak đong. Hìu rơng geh lơh niam bơnĕ ngan tàm tiah tàm gùl, ơm rềp hìu niam chài ƀòn dê. Bơh hơ̆, tơl nă cau tàm mpồl lơh broă bal geh anih lơh broă ƀươn soh.

Bi H’Tin H’mok là kwang bàng cau ùr ƀòn Hra Ea Hning ờ mŭt bal tàm mpồl lơh broă bal tàñ ồi yau mơya sùm lùp lăp pơndờm pơnđiang dong kờl ală cau tàm mpồl, ngan là dong khi tàm broă yal tơnggit tăc phan bơna. Bi H’Tin H’mok, đơs: Kòn cau Rơđê bol hi sùm sền dờng màng ngan phan ngui soh ờs mờng bơh yau bơh he dê. Cau ùr Rơđê kờñ ngan soh ồi ào bơh yau, den tàng bè hơ̆, phan ngui soh ờs mờng bơh yau kung gam sùm geh sền gàr sơl. Phan ngui soh ờs mờng bơh yau bơh rài ồng pàng dê den tàng oh kòn kòn sau tŭ do kung gam prăp gàr mờ ngui sùm sơl.

Ồng Y Xuyên Buôn Yă, Phó Củ tịc Anih duh broă Làng bol xã Dray B’hăng pà gĭt: Ƀòn Hra Ea Hning geh rlau 400 hìu, mìng là kòn cau Rơđê lơm. Rài kis lơh sa làng bol dê kơnờm jơh tàm lơh broă sa sươn sre. Tŭ do ƀòn kung gam sơl rlau 100 hìu rƀah, rlau 50 hìu pa jơh rƀah. Gơnoar ătbồ xã đơs niam ngan broă oh mi cau ùr tàm ƀòn neh lơh wơl ngui wơl broă lơh tàñ ồi yau, gơ sền gàr, prăp gàr niam chài bơh yau mờ lơh geh tai priă jền nàng kơ̆ kơl jăp rài kis. Broă gơ tơlik tŭ do là rơnàng kơnòm să ờ hềt bài kờñ ngan mờ ală broă lơh ờs mờng bơh yau bè tàñ phan, lơh mòn ală đờng goòng ờs mờng bơh yau, tàñ ồi yau. Tài bơh chài lơh ală broă do, pal geh tŭ tơngai tàp bơtê lơh bòl glar mờ kơ̆ nùs ngan. Mơya, priă lơh geh bè lơh sa ờ geh uă wơl bè ală broă lơh ƀươn soh ndai.

Ồng Y Xuyên Buôn Yă đơs là, cau chài pal kis geh mờ phan bơna bơh he lơh geh, tŭ hơ̆ broă lơh hơ̆ sồng geh rề ơnàng lơh uă. Ồng Y Xuyên Buôn Yă, đơs: Tàm ƀòn Hra Ea Hning geh mpồl tàñ ồi yau bơh oh mi cau ùr dê. Kơnờm bè hơ̆, oh mi cau ùr neh geh broă lơh sùm. Bulah priă jền lơh geh bơh broă lơh do ờ hềt uă, ờ hềt ndrờm pal mờ bơta pràn tŭ tơngai he tă pơgồp. Khi tàñ ồi yau là nàng geh broă lơh broă sa gời gơ dê mờ dilah đơs bè priă lơh geh den dồ êt ngan gen tàng ờ lơh gơkờñ gơ wèt mờ ơruh pơnu kơnòm pa tàu.