Tàm nhai 7 pa do, sùm tàm ală ƀùi drim ngai dơ̆ 2, dơ̆ 4, dơ̆ 6 pah poh, mờr 30 nă oh tàm sơnam kâp 1 mờ kâp 2 tơrgùm tàm hìu jòng bơh bèp Jiwon dê ơm tàm ƀòn Akŏ Dhông, ƀòn dờng Buôn Ma Thuột, càr Dăk Lăk. Tàm do, geh 2 ơdŭ bơsram dà Mỹ ờ sa priă bơh ală cau bơsram dờng lơh broă dong kờl is bơh càr dê pờ tàm tơngai rlô bơkang. Tus bal ơdŭ bơsram, ală oh geh bơsram wơl akhar cih mờ tàp ngan ngồn tơm bơh bơr mờ dà Mỹ bơh ală bơta nhơl nŏ, jơnau đơs crih. Oh Đỗ Thanh Nhã Byă (10 sơnam) ơm tàm ƀòn Akŏ Dhông chờ hờp đơs: “Sau geh bơsram ơdŭ bơto dà Mỹ ờ sa priă bơh ală bi bơsram dờng dê bơto. Sau gŏ geh kuơ ngan să tờm oh in. Mờ tàm kàl rlô bơkang do oh gam bơsram tai uă bơta, ngan là sau kơp kờñ git đơs ală dà đơs mờ kòn rơp bơsram bơta chài tơm boh bơr mờ ală cau gùt dar, ngan là cau lơgar ndai”.

Ai gơ wèt mờ oh H’Da Rin Êñuôl (15 sơnam) ơm tàm ƀòn Alê B, sơnah ƀòn Ea Tam, ƀòn dờng Buôn Ma Thuột den ală ngai rlô bơkang sơlơ niam rlau tŭ oh geh git bơta niam chài kòn cau Rơđê dê bơh ơdŭ tamya xoang bơh Anih tờm mblàng yal jơnau, niam chài mờ Tàp pràn să jan ƀòn dờng Buôn Ma Thuột bơyai lơh. H’ Da Rin pà git: tàm 1 nhai do, oh mờ ală bơyô geh jòi git bè dơ̆ lơh chờ bơh yau cau Rơđê dê, ală bơhiàn lơh yàng, ală broă lơh geh tamya xoang mờ ală jơnau tamya xoang ƀuơn. Bơh hơ̆ dong oh git rlau tai mờ sơlơ kờñ niam chài kòn cau he dê rlau tai: “Oh neh bơsram tai uă bơta bè niam chài kòn cau he dê. Oh git tai uă jơnau tam ya mờ gơtùi pơgồp bal ală jơnau bơsram bơh pơgru, bơceh gơs uă jơnau tam ya mờ kung gơtùi bơto wơl ai ală oh dềt ơdŭ tơnơ̆ in. Bơh hơ̆ den tàm ală dơ̆ lơh chờ halà geh broă lơi tàm ƀòn, tàm sơnah ƀòn bơyai lơh den bol oh rơp pin dờn tamya tềng đap ală cau sền”.

Dùl broă lơh ndai kung gơ hòi gơ jà bơta tus bal bơh uă kơnòm dềt jơi bơtiàn dồ êt nă cau tàm Dăk Lăk pah dơ̆ rlô bơkang. Hơ̆ là “Sàl pơlam tàp bơceh cih sră niam chài” bơh Mpồl cih sră niam chài Dăk Lăk bơyai lơh. Nam do, broă lơh do geh mờr 40 nă kơnòm bơsram tus bal. Do là ală kơnòm bơsram geh rơ wah bơh ală dơ̆ pơrlòng kơnòm bơsram jak, pơrlòng cih sră pơyua ală lơgar (UPU), ală kơnòm bơsram geh bơta chài tàm 24 hìu bơsram kâp 2 mờ kâp 3 tàm càr.

Bal mờ broă geh ală cau cih sră, cau cih jơnau nrĭ, cau sềr rùp pơlam bơceh ală bơta jơnau cih sră, wac sềr rùp, ală oh gam geh lòt ngan ngồn mờ tìp mat lơh kwèng mờ ală cau ling sền gàr tiah nhàr lơgar; jòi git bè niam chài brê, niam chài rơ was tàm brê dà lơgar Yok Đôn; tìp mat lơh kwèng mờ kơnòm dềt tàm tiah nhàr lơgar; lòt sền ngan ngồn tàm Cơldŭ kảñ sát rơcang lài kơryan ồs sa, crùh ồs sa mờ dong kờl rềs àr, kwang àng càr Dăk Lăk… Bơh hơ̆, dong ală oh lơh geh nùs nhơm kơloi sơnơng, prap gàr sră nggal ai broă bơceh jơnau cih, jơnau crĭ mờ rềs rùp. Oh Bế Thị Thu Uyên (13 sơnam, kòn cau Tày) ơm tàm xã Ea Hđing, kơnhoàl Cư Mgar đơs, ală ngai tus bal tàm sàl pơlam tàp neh dong oh geh ală jơnau sền git pa ngan, bơh hơ̆ sơlơ ki ngàm mờ git ưn ngài ală bơta lơi mờ să tờm geh dờp: “Bol oh neh geh sền git uă ngan broă lơh, pơn yơu bè lòt sền Ƀảo tàng kơphe, Ƀảo tàng bèp H’Mai, tus tiah nhàr đah Việt Nam mờ Campuchia, Pôs đồng ling sền gàr tiah nhàr lơgar Bô Heng mờ uă ngan broă lơh ndai tai. Tàm hơ̆, oh gŏ niam ngan lau jơh là lòt tus Pôs đồng ling sền gàr tiah nhàr lơgar Bô Heng mờ geh ƀư tềng jrong nhàr lơgar đah Việt Nam mờ Campuchia. Do là dơ̆ sơn rờp oh geh tus tiah nhàr lơgar, geh ƀư tềng jrong nhàr lơgar den cèng wơl dùl bơta kơlôi sơnơng krơi ngan oh in”.

Mò Niê Thanh Mai, Củ tịc Mpồl cih sră niam chài càr Dăk Lăk đơs, bulah tơngai lòt sền git ờ huan jŏ mơya ală oh neh ai tơnggŏ bơta sền gròi, gơ kờñ ngan mờ tơl broă lơh. Bơh pah nam, broă lơh sùm geh bơta tam gơl, ờ lơh wơl nàng ală oh tus bal sàl pơlam tàp in sùm gŏ gơ kờñ, gŏ pa, kờp bal mờ ală oh neh geh tŭ tus bal: “Bol hi gŏ là, ală oh kờñ ngan tŭ iat ală wa, ală mơi yal bè bơhiàn niam chài ală jơi bơtiàn mờ bè jơnau kah yau dê, ală oh ndrờm cih wơl mờ sền gròi jơh nùs ngan. Sơn đờm bơh ală bơta dềt ngan rlau jơh bè ală dơ̆ lòt, ală dơ̆ tìp mat mờ cau ling, ală kảñ sát rơcang lài kơryan mờ crùh ồs sa, ală cau gam lời jơh rài kis mờ sơnam kơnòm să he dê nàng tă pơgồp ai ƀòn lơgar in”.

Ồng Mai Văn Chuyền, ơm tàm xã Ea Mdroh, kơnhoàl Cư Mgar geh kòn tus bal broă lơh đơs là, ală broă lơh do neh cèng wơl ală cồng nha niam ngan. Rê wơl tơnơ̆ tŭ tus bal ală broă lơh, ồng gŏ kòn ồng dê neh geh ală tam gơl loh làng, gơ gơs khin cha, pin dờn mờ lơht ờm tàm broă tơm bơh bơr mờ cau gùt dar uă rlau: “Tàm tơngai sau tus bal mờ tŭ rê wơl tàm hìu den gŏ sau gơ lòng sồr rlau, bơta chài tơm boh bơr, mờng kwèng tàm rài kis geh uă tam gơl niam. Sền bơta lơh bal mờ tơm boh bơr mờ mpồl bơyai lơh tàm tŭ tus bal tàm mpồl Zalo den gŏ là mpồl bơyai lơh mờ ală cau pơgru neh pơlam mùl màl ngan den tàng geh gơ rềng niam tus ală sau. Hơ̆ kung là dùl bơta sền git geh kuơ ngan ai sau in tàm tơngai rlô bơkang”.

Kàl rlô bơkang neh mờr jơh, mơya gơ wèt mờ ală oh dềt jơi bơtiàn dồ êt nă cau tàm Dăk Lăk, ală broă sền git niam chài neh pờ tơlik tŭ niam jòi git uă rlau tai bè ală bơta krơi is, bơta niam ală jơi bơtiàn dê. Bơh hơ̆, lơh gơlik tai ală oh in bơta kờñ gơboh mờ niam chài, pơlam tàp nùs nhơm, nàng dơ̆ ơm rlô bơkang sơlơ geh tai uă bơta niam, bơta kuơ.