Càr Gia Lai geh bơta pràn uă ngan nàng lơh uă li la ală broă lòt nhơl ƀòn brê bơnơm, niam chài, mpồl bơtiàn...Càr geh rài niam chài li la, ù tiah niam chài cing mồng, Tiah sền gàr tiah kis Kơh bơnơm Kon Hà Nừng, bal mờ rài lơh broă sa sươn sre li la mờ ală ñrùh dà, trồ tiah mrềt niam, uă mpồl tiah tềl lời wơl kah yau mờ tiah tềl lời wơl rài bơh sơnrờp tơngai ngui lŭ yau...

Jăt Broă rơndăp lơh bơtàu tơnguh lòt nhơl tơngai bơh nam 2021- 2025 bơh Ủy ƀan Ñân zân càr Gia Lai dê lơh ngan tus nam 2025, lòt nhơl gơ gơs là lơh sa tờm, bal mờ li la ală broă lơh, lơh broă mờng chài, niam. Tơngai do, càr ai rlau 500 tơmàn đong priă ai bơh priă bơcri dà lơgar dê nàng lơh 9 rơndăp broă lơh phan bơna lơh geh bơnàng jă nàng bơtàu tơnguh lòt nhơl. Pah nam, càr Gia Lai bơyai lơh uă broă lơh niam chài, tàp pràn să jan; sơlơ yal tơngĭt ală bơta pràn, bơta ƀươn bè lòt nhơl.

Bulah bè hơ̆, tŭ do, rơ̆p pa geh 3 tàm 9 rơndăp broă lơh bè phan bơna lơh gơs. Gia Lai ờ hềt gơhòi gơ jà geh mpồl lơh sa kă bro lơgar ndai, mpồl lơh sa kă bro lơh sa kă bro bal mờ lơgar ndai lơh bal bè lòt nhơl; bơta niam, phan bơna lòt nhơl ờ hềt ngan ngồn lơh gơkờñ cau, ờ hềt geh bơta lơh sir uă. Ồng Nguyễn Tấn Thành, Kwang ătbồ Ală mpồl lòt nhơl càr Gia Lai, geh jơnau đơs: Bol he pal sền swì wơl: Dà lơgar neh lơh geh tiah ơm kis bơcri priă niam, lơh gơkờñ lah ờ hềt, tơl pràn gơhòi gơ jà cau bơcri lah ờ taih. Bơta pràn bềng lìu mờ lơh gơkờñ, mơya nàng tam gơl gơ gơs phan bơna lòt nhơl den kờñ pal geh bơta bơcri priă niam, săc rwah. Tiah lơi ƀươn, geh bơta bơtàu tơnguh rlau den bơcri lài, jăt rơndăp tăp sèng, den năc hơ̆ sồng gĭt tus, làng bol hơ̆ sồng geh priă jền.

Tàm pơrjum, mò Nguyễn Thị Thanh Lịch, Phó Củ tịc Ủy ƀan Ñân zân càr Gia Lai sồr ală tiah, sở, gah lơh broă càr kờp sền wơl, pơn jăt tai lơh pràn lam lơh ală rơndăp broă lơh bơcri priă lơh phan bơna là bơnàng jă nàng bơtàu tơnguh lòt nhơl; kờp sền wơl ală phan bơna lòt nhơl nàng bơtàu tơnguh di broă di anih; lơh jăt tàm tơrbŏ bal gơl gùng, mpồl lòt nhơl; ală tiah mờ gah niam chài pơn jăt tai lam lơh ală broă lơh niam chài, dơ̆ lơh chờ, sơlơ yal tơngĭt mờ ai tơl bơta ƀươn nàng ai phan bơna lơh geh bơh sươn sre bơh làng bol dê tus mờ năc lòt nhơl. Mò Nguyễn Thị Thanh Lịch, tơngkah uă ngan bè broă bơtàu tơnguh lòt nhơl mpồl bơtiàn jăt gùng dà lơh broă mờng chài, kơ̆ kơl jăp jŏ jòng. Mò Nguyễn Thị Thanh Lịch, đơs: Jàu Sở Văn hoá Thể thao mờ Zu lịc in bơto pơlam broă lơh ờs mờng bè lòt nhơl mpồl bơtiàn. Tŭ lam lơh geh lòt nhơl mpồl bơtiàn, gơ jăt bal mờ lòt nhơl lơh broă sa sươn sre, den bơta do là kơ̆ kơl jăp jŏ jòng. Geh bơta lơh bal bơh mpồl bơtiàn dê, bơh do rơ̆p prăp gàr geh niam chài. Tài bơh lơh geh wơl broă lơh broă sa ai làng bol in den làng bol chờ hờp mờ sền gàr kơ̆ kơl jăp jŏ jòng.