Broă lơh do kung geh ai bơh bơta niam rơwas dê, do là phan kis lơh rùp rài càr Dăk Lăk dê. Mpồng đah măt tơngai mŭt ƀòn dờng Buôn Ma Thuột geh lơh tàm gùng càr sồ 01, rềp bal đah sơnah ƀòn Thành Nhất mờ xã Ea Ñuôl, kơnhoàl Buôn Đôn.

Bàr ñjrong mpồng là bàr nơm rơwas jù geh lơh mờ bê tông lòs tàm bơta ntào. Bồ rơwas mờ sơnròm rơwas pờ ñhoa, đơng mpồng geh lơh mờ lòs kò jòng 14 thơ̆k, ñhoa 8 thơ̆k nggùl. Mpồng hờ đah măt tơngai mŭt ƀòn dờng Buôn Ma Thuột geh crăp jơnau cih điện tử jơh bàr đah, ngui măi mok pa lơh đèng full led ntoat akhar. Kờp jơh priă lơh là rơlao 5 tơmàn 500 tơlăk đong. Jăt ồng Trần Đức Nhật, Phó Củ tịc Anih duh broă làng bol ƀòn dờng Buôn Ma Thuột pà git, mpồng đah măt tơngai mŭt ƀòn dờng ờ mìng geh ală jơnau kờñ bè bơta niam mờ kơl jăp, mờ gam dong kờl git đal bơta krơi is niam chài, ù tiah geh is mờ kòn bơnus tàm do dê, lam sồr prăp gàr ală bơta kwơ niam chài ờs mờng mờ prăp gàr rơwas. Do là broă lơh nàng tơnkah 120 nam crơng gơs càr Dăk Lăk mờ 120 nam ƀòn dờng Buôn Ma Thuột geh lơh gơs mờ bơtàu tơnguh.