Tây Nguyên là ù tiah geh uă phan kwơ bal mờ ù tiah niam lila mờ bơta niam chài ală tiah dê niam bơnĕ is ngan, tiah ơm kis bơh 47 jơi bơtiàn oh mi, cèng tàm nùs nhơm ală phan lời wơl dờng, bè: Ù tiah Niam chài cing mồng Tây Nguyên; Jơnau mblàng yal lời wơl mờ bơr mờ phan lời wơl niam chài ờ di phan bơna bơh kòn bơnus dê; ală dơ̆ lơh chờ tàm pơrlòng rơwas, dơ̆ sa bơthi ƀồc, dơ̆ lơh Yàng ñô lir bong... niam ngan jơh ală jơi bơtiàn dê. Mờ tơngume “Dùl dơ̆ lòt, uă anih tus”, gah Lòt nhơl ală càr: Gia Lai, Dăk Lăk mờ Kon Tum neh yal tus mờ ală mpồl lơh broă, mpồl lơh sa kă bro lam năc lòt nhơl tàm ƀòn dờng Hải Phòng in ală bơta ƀuơn, bơta pràn lòt nhơl bơh ală càr dê kung bè ală tiah tus tiơng pơn rơ, ală tour gơl gùng tàm tơrbŏ bal tàm gùng lòt jun pơndiang năc lòt sền gĭt Tây Nguyên niam bơnĕ ngan dê. Ồng Nguyễn Đức Hoàng, Phó Kwang atbồ Sở Văn hóa, Thể thao mờ Zu lịc càr Gia Lai, pà gĭt:“Mờ ală bơhiàn niam chài krơi is, phan sa krơi is đah Hải Phòng mờ ală càr tàm tiah Tây Nguyên, ngan là càr Gia Lai den añ pin dờn là năc bơh càr Gia Lai kung rơ̆p kờñ ngan tŭ tus lòt nhơl mờ ƀòn dờng Hải Phòng mờ sơlơ̆u wơl. Bol añ rơ̆p tàm tơrbŏ lơh bal đah ală mpồl lơh sa kă bro đah 2 càr, ƀòn dờng dê nàng lơh bè lơi lơh geh ală mpồl năc mờ tàm tơrbŏ bal, ờ gŏ di là ală tour mờ digơlan là ală mpồl cau kơnòm bơsram, kông ñân, cau ling yau... Añ kơlôi do là broă lơh geh kwơ ngan mờ geh cồng nha”.

Yal ală bơta ƀuơn, bơta pràn, bơta mờng chài pơn rơ ngan tàm broă bơtàu tơnguh lòt nhơl bơh ƀòn dờng Hải Phòng dê, ồng Vũ Huy Thưởng, Phó Kwang atbồ Sở Zu lịc ƀòn dờng Hải Phòng đơs là pơrjum lơh broă bal bơtàu tơnguh lòt nhơl do là broă lơh geh ngan nàng chồl tơnguh lơh broă bal bơtàu tơnguh ală tiah, hời rơ hời lơh mhar bơtàu tơnguh wơl, tơnguh mhar bơtàu tơnguh lòt nhơl geh cồng nha mờ kơ̆ kơl jăp. Ồng Vũ Huy Thưởng, đơs:“Ngai do, bol añ wă 3 càr tus gơ hòi gơ jà lòt nhơl mờ kung là dùl tŭ tơngai niam nàng yal tơngĭt ală phan bơna ală phan kwơ lòt nhơl niam ngan tus mờ năc lòt nhơl tus bơh ală càr tàm tiah Tây Nguyên dê. Do là dùl bơta ƀuơn ngan rlau jơh mờ broă lơh do rơ̆p geh lơh uă tàm tơngai tus, ờ mìng is mờ Tây Nguyên lơm mờ bal mờ ală tiah ndai tàm gùt lơgar dê tai, lơh geh ală tour gơl gùng, ală phan bơna lòt nhơl gơ kờñ ngan ai năc lòt nhơl in”.

Tàm pơrjum, kwang đơng lam bồ Sở Zu lịc ƀòn dờng Hải Phòng, kwang đơng lam bồ Sở Văn hóa, Thể thao mờ Zu lịc 3 càr tàm tiah Tây Nguyên neh kĭ hơ broă lơh lơh bal bơtàu tơnguh lòt nhơl mờ jơnau kờñ sơlơ tơnguh bơta pơgồp bal lơh broă bal pơgồp bơnah ngui geh cồng nha, chồl tơnguh lòt nhơl bơtàu tơnguh, bơt bơtàu phan bơna lòt nhơl pa. Bal mờ hơ̆ là lơh pràn broă lơh yal mờ yal tơngĭt, bơt bơtàu mat kă bro, tơnguh broă yal tơngĭt rùp hin lòt nhơl bơh 3 càr: Dăk Lăk, Gia Lai, Kon Tum tus mờ drà kă bro ƀòn dờng Hải Phòng dê mờ sơlơ̆u wơl.