Tàm ù tiah tơlir dờng ơnàng bơh brê Nâm Nung dê, sap dà hòr bơh ñrùh dà Leng Ôm Rveh mpong ntas tàm ù tiah brê bơnơm dờng ơnàng bè jơnau jà nac lòt nhơl tus sền git ù tiah bềng lìu bơta niam chài krơi is cau M’nông dê. Bi Y Krêu, Lam bồ Mpồl lòt sền ù tiah brê bơnơm bơh Jơnum lòt nhơl mpồl bơtiàn Yôk Nâm Nung, sàh Nâm Nung, càr Lâm Đồng yal:

“Jat jơnau cau kra dê yal wơl, rài yau tàm tiah do geh dùl nơm rơ was gơtìp gơ dùh tàm dà hơ̆ sồng chơt tàm do. Dùl tŭ tơngai tơnơ̆, rơ was chơt ƀô ồm den hơ̆ sồng làng bol git gŏ. Làng bol ƀòn lơgar ai jơnau yal hơ̆ nàng hòi ñrùh dà là Ôm Rveh. Tŭ yal mờ nac lòt nhơl, bol hi sùm mblàng bơsèl là “Ñrùh dà rơ was ồm” nàng nac in ƀuơn kah rlau. Nhai do lòt nhơl niam ngan, trồ tiah mrềt lơ ngờm, dà sàng, brê tơlir gam bè ờs den tàng uă nac kờñ ngan”.

Jơnau yal bơh tài geh hòi bè hơ̆ geh mblàng wơl bơh rài do tus rài ndai ờ mìng lơh dơ̆ lòt sền git sơlơ niam rlau mờ gam là broă nàng cau M’nông sền gàr jơnau kah kir ƀòn lơgar dê. Bơh ală bơta kuơ niam chài hơ̆, nam 2022, làng bol ală ƀòn Ja Răh, Yôk Ju mờ R’Cập neh bal mờ gơp tơng gơs Jơnum lòt nhơl mpồl bơtiàn Yôk Nâm Nung mờ bơta kơp kờñ ai bơta niam chài krơi is jơi bơtiàn tus rềp rlau mờ nac lòt nhơl. Tŭ do, geh rlau 40 nă cau tàm jơnum, tam pà gơs ală mpồl niam chài bơh yau, homestay, sền ù tiah brê bơnơm mờ phan sa. Tơl nă cau dờp kơnòl lơh dùl broă, bal mờ gơp lơh gơs ală phan lòt nhơl cèng bơta niam krơi is bơh rài kis cau M’nông dê.

Tus mờ Yôk Nâm Nung, nac lòt nhơl ờ mìng geh sền ală bă brê gam bè ờs, ală jjròh dà dờng niam mờ gam geh sền git rài kis ring lơngai ƀòn lơgar dê tai mờ jòi git bè bơhiàn kac màng tàm Tiah tềl kah yau dà lơgar Tiah pôs đồng B4 - Ală càr  4 Nâm Nung. Is ồn, tàm ală dơ̆ lơh chờ bè Tăm Blang M’Prang halà dơ̆ lơh yàng hòi mìu, nac lòt nhơl geh gơ rờm să jan tàm ù tiah niam chài cau M’nông bơh sap cing mồng, ală gùng đơs pơnđik, broă tàñ ồi kòn cau, tàñ phan gle đơr… Bal mờ hơ̆, nac lòt nhơl gan geh sa ală phan sa ờs mìng bè biap blơn bơtăng, biap pài gòl biap nse, iar buh rơnga, piang prùh tàm ding kơrla, biap nha bùm blàng chàng, ñô tơrnờm.

Mò H’Thương - Phó Lam bồ Mpồl Niam chài - mpồl bơtiàn Mpồl duh broă Làng bol sàh Nam Nung, Lam bồ Mpồl atbồ Jơnum lòt nhơl mpồl bơtiàn Yôk Nâm Nung pà git:

“Jơnum lòt nhơl mpồl bơtiàn bol hi dê pa do wă uă ngan mpồl nac bơh Italia, ƀòn dờng Hồ Chí Minh, Hà Nội tus. Is ồn, tàm dơ̆ lơh chờ, nac lòt nhơl tus sền gal ngan. Uă nac lòt nhơl lơgar ndai kờñ kis bal mờ làng bol nàng jòi git bè bơhiàn ờs mờng mờ rài kis pah ngai làng bol dê. Bol hi lơh lòt nhơl mpồl bơtiàn pơgồp bal mờ ƀòn Choah, sàh Nam Đà tai. Tàm hơ̆ geh uă tiah niam, ai mpồl hi den geh mpồl niam chài bơh yau mờng đơs pơnđik, dròng cing jañ mồng drơng nac lòt nhơl in. Bơdìh mờ wă nac tàm ƀòn lơgar, bol hi gam geh ală anih lòt nhơl bè Dray Sap jà lòt lơh ai ală mpồl nac lòt sền in”.

Mò Trần Kim Tuyền - Phó Lam bồ cơldŭ niam chài - mpồl bơtiàn sàh Nâm Nung pà git, ƀòn lơgar gam lơh ngan ngui bơta pràn bè ù tiah brê bơnơm, bơhiàn kac màng mờ niam chài krơi is nàng bơtàu tơnguh lòt nhơl mpồl bơtiàn. Mùl màl, Đảng ủy, gơnoar atbồ ƀòn lơgar gam pơn jat tai pơlam gùng bơtàu tơnguh lòt nhơl pơgồp bal mờ Tiah pôs đồng B4 - Ală càr 4 Nâm Nung, mờ kung tàm tơrbŏ bal mờ ală anih lòt nhơl mờ ală mpồl bơtiàn làng bol ơm kis rềp bal nàng lơh geh tai ală phan sền git niam krơi is:

“Tŭ do, Jơnum lòt nhơl mpồl bơtiàn Yôk Nâm Nung geh 42 nă cau. Sàh pơlam gùng bơtàu tơnguh lòt nhơl mpồl bơtiàn pơgồp bal mờ Tiah pôs đồng B4 - Ală càr 4 Nâm Nung là tiah tềl kah yau kâp dà lơgar. Uă bơyô kơnòm să ƀòn lơgar kung tus bal dong kờl, lam tơn nac lòt nhơl trekking tàm brê, sền ù tiah brê bơnơm, ñrùh dà mờ ală broă lơh sền git ngan ngồn. Bơdìh Jơnum Lòt nhơl mpồl bơtiàn Yôk Nâm Nung, sàh kung pơlam gùng bơtàu tơnguh lòt nhơl tàm thôn Quảng Hà bơh làng bol kòn cau Dao dê mờ lam lơh ală dơ̆ lơh drà phan sa nàng tàm tơrbŏ bal mờ broă lơh lòt nhơl mpồl bơtiàn ƀòn Ja Răh dê”.

Gàr bơta tàm pơn jat rài kis pa, cau M’nông tàm Yôk Nâm Nung, sàh Nâm Nung, càr Lâm Đồng kung gam kơ̆ dơn gàr sap cing mồng, sền gàr ală gùng đơs pơnđik, broă lơh bơh yau mờ bơta mờng kwèng rài kis ƀòn lơgar. Lòt nhơl mpồl bơtiàn ờ mìng lơh geh tŭ niam bơtàu tơnguh lơh sa mờ gam gơ gơs là rbàng tơrbŏ nàng ală bơta kuơ niam chài cau M’nông dê geh sền gàr, gơ rề uă.