Bơta tờm tàm broă bơyai lơh Niam chài cing mồng mờ tơngume “Sap mpong ngai tam bau” là lơh wơl bơhiàn rò bơr tơu tàm ñô bau ờs mờng cau Rơđê dê. Tàm ù tiah tơlir hơ đơm mƀur tờm chi dờng, ală cau chài ƀòn Tơng Jŭ, sơnah ƀòn Ea Kao lơh wơl wil tơl bơhiàn rò bơr tơu cau Rơđê dê. Tàm gùng lòt rò, bơr tơu pal sơrlèt gan ală bơta lòng cèng bơhiàn ờs mờng. Klau bơr tơu pal dơ̆ dùl dơ̆ tơn dò kòng lơngô mờ phan kơt bau ai cau pròc mhàm tờm, gơp bơyô 2 gah in lài mờ tŭ geh rò rê hìu pơ ùr lơh bơr tơu. Gơ wèt mờ cau Rơđê, kòng lơngô là rùp pơrya ai bơta jơh nùs, ai ală bơta lòng tàm gùng rò bơr tơu kờñ pơyua bơta kơp kờñ 2 nă ùr bơklau rơp dùl nùs bal sơrlèt gan kal ke nàng bơt bơtàu rài kis gơboh gơbài.

Cau chài ồng Y Djing Adrơng ơm tàm ƀòn Tơng Jŭ pà git, broă ai bơhiàn bơh yau nàng drơng nac lòt nhơl in mờ mìng pơgồp bơnah sền gàr bơta niam chài krơi is mờ gam lơh geh tai broă lơh bơh lòt nhơl mpồl bơtiàn:

“Añ pơn yờ să ngan geh tus bal lơh wơl bơhiàn rò bơr tơu, kah wơl bơhiàn ờs mờng, bơta niam chài krơi is cau Rơđê dê. Ƀòn Tơng Jŭ tŭ do lơh lòt nhơl mpồl bơtiàn, do là gùng dà niam ngan ai geh broă lơh làng bol in, mờ kung sền gàr bơta niam chài krơi is làng bol kòn cau dê bè tàñ ồi kòn cau, dròng cing mồng halà lơh wơl bơhiàn ờs mờng bè ngai do. Añ kơp kờñ bơta kuơ niam chài cau Rơđê dê geh gơ rề uă nàng uă cau tàm dunia in git tus mờ sền gàr sùm”.

Tơnơ̆ bơnah lơh wơl bơhiàn ờs mờng, cau sền pơn jat tai geh iat ală jơnau nhơl bơrlŭ bal cing mồng, cing gle, đòng lŭ, ală jơnau đơs crih cèng bơta niam is Tây Nguyên dê mờ sền niam chài ñô tơrnờm. Ală broă lơh neh lời wơl uă bơta kah kir gơ wèt mờ nac lòt nhơl tàm lơgar mờ ală lơgar. Ồng Steve tus bơh Scotland pà git, ală sap ntas cing mồng mờ broă mpồl bơtiàn ƀòn lơgar sền gàr niam chài lơh ồng kờñ ngan:

“Do là dơ̆ sơn rờp añ geh sền broă lơh mờ añ gŏ gơ niam ngan. Añ kờñ ngan gùng đơs crih cau Rơđê. Jat añ den ală bơta kuơ niam chài bè do kờñ pal geh yal tơnggit uă rlau tai tàm ală anih yal jơnau tơnggit nàng uă cau in git tus. Ngan là să tờm añ rơp tus tai ndo”.

Jat broă rơndap lơh, broă lơh lơh Niam chài cing mồng rơp pơn jat tai geh bơyai lơh pah nhai dùl dơ̆ tàm Anih prap ơn phan kuơ càr Dăk Lăk. Pah nhai, càr rơp yal tơnggit dùl bơhiàn lơh yàng lơh chờ ờs mờng bơh yau ală jơi bơtiàn tàm càr dê, pơgồp bơnah prap gàr phan lời wơl mờ lơh gơs tai phan lòt nhơl niam chài drơng nac lòt nhơl in.