Tàm dơ̆ lòt nhơl tàm ƀòn tàñ bềl sùt Phú Tân, sàh Ô Loan, càr Dăk Lăk, mò Nguyễn Huỳnh Phương, nac lòt nhơl tus bơh ƀòn dờng Cần Thơ dơ̆ sơn rờp geh koh is sùt, ìs sùt, trum dà, hơ̆ sồng nggui kềng bơrnơ̆ nàng lơh ală bơnah broă tàñ gơs bềl. Mò Phương yal, tơl bơnah broă ndrờm ai gŏ bơta bòl glar, jơh nùs bơh cau tàñ bềl dê:

“Nàng gơtùi lơh gơs dồ pang bềl bè do pal nền nòn ngan. Gŏ chờ hờp ngan, pa sơn rờp lơh den gŏ kal ke mơya tŭ neh mờng den ală bơnah broă tàm kơƀàng tàñ do kung mhar, ƀuơn sơl”.

Kờp bal pah ngai, ƀòn lơh broă Phú Tân wă rò git nđờ jơt nă nac tus sền, jòi git mờ lơh ngan ngồn ală bơnah broă tàñ bềl. Bơh broă mìng lơh tŭ ru, ală hìu bơnhă tàñ bềl sùt tŭ do gam geh tai broă pa là wă rò mờ pơlam nac lòt nhơl sền, lơh ngan ngồn broă tàñ bềl. Bi Lê Thị Bích Liêm ơm tàm thôn Phú Tân 1 đơs là, do ờ mìng là jơnau lơh gơlik priă jền mờ gam là broă nàng prap gàr phan lời wơl niam chài bơh ƀòn lơgar dê:

“Tàñ bềl den kờñ pal geh bơta jơh nùs, kơ̆ nùs. Tàm lơgar he kung geh uă càr, ƀòn dờng bè tiah đah mat tơngai mut halà tiah đah tô dà lơgar ndrờm geh ală ƀòn tàñ bềl lơm. Mơya tơl ƀòn lơh broă rơp geh ală bơta niam chài krơi is. Gơ wèt mờ ƀòn tàñ bềl sùt Phú Tân den kung geh bơta niam chài is ồn gơ dê, añ kung kơp kờñ tơl nă cau git tus bơta niam chài is ồn tàm ƀòn tàñ bềl sùt bơh yau, pơgồp bơnah dong kuơ ai rài kis làng bol tàm ƀòn lơh broă in geh tơnguh niam rlau”.

Nàng crăp rơcang wă nac, ală mpồl lơh broă bal tàm Phú Tân neh tàm tơrbŏ bal mờ mpồl lơh sa kă bro bơyai lơh lòt nhơl, pờ tour lòt sền, lơh ngan ngồn geh giă bơh 350 tus 600 rbô đong dùl nă cau. Nac lòt nhơl geh đì rơkì, nggui rơndeh lơ òr lòt sền ƀlàng sre tam sùt, dus tờm sùt, tàñ gơs rơkì sùt nàng hoài rê hờ rboàng dà, blah, trum dà sùt mờ tàñ bềl; mờ kung gơtùi bơsram tàñ phan mờ tê nàng lơh kir sơnrai. Ală phan lơh bơh sùt kung rơhời geh lơh li la, bơh ală phan kir sơnrai dềt, niam bè phan yồng khoă, quạt ià mờ tê, kơldung triau, tus ală phan ngui dờng bè kơldung triau, kơ nờl bồ… Ồng Nguyễn Anh Quân, Cau lam bồ Mpồl lơh broă bal An Cư tàm thôn Phú Tân 1 pà git:

“Mpồl lơh broă bal gam wèt tus rềp mềr mờ tiah ơm kis, gàr wơl jơh ală bơta niam bơh yau tus tŭ do bè ală phan trum dà sùt, blah sùt mờ tê ala mờ ngui măi mok tŭ do halà broă sền git, lơh ngan ngồn niam ngan bè nggui tềng rơkì sùt nàng nac lòt nhơl in git loh rlau tai”.

Jat mò Lê Thị Mai Thoa, Lam bồ thôn Phú Tân 1, broă tàñ bềl sùt tàm do neh geh bơh rlau 100 nam mờ geh dờp là ƀòn lơh broă bơh nam 2013. Tŭ do, geh rlau 540 hìu bơnhă tus bal, ờ mìng tàñ bềl mờ tê, mờ gam ngui măi tàñ nàng tơnguh khà phan lơh gơs tai. Bơdìh drà kă bro tac phan lơh gơs kơ̆ kơljap sùm tàm tiah đah jum tàm gùl lơgar mờ Tây Nguyên, khà nac lòt sền, lơh ngan ngồn ngai sơlơ uă neh dong làng bol geh tai priă jền lơh geh:

“Dilah tàm hìu geh dồ nă oh dềt mờ dồ nă cau dờng là gơtùi lơh, oh dềt kung git tàñ bềl sơl. Ngui cau lơh broă tàm hìu bơnhă tơn, gơtùi tàñ bềl ndang, lơh sre ndang, koh nhơt siam kơnrồ, lòt koh sùt nàng tàñ bềl tac drà kă bro in, lơh gơlik tai priă jền hìu bơnhă in. thôn kung lơh gơlik bơta niam nàng bơtàu tơnguh ƀòn lơh broă tài rơngòt dilah làng bol tac jơh sùt den rơp ờ gơtùi gàr ƀòn lơh broă mờ tê. Tŭ do, geh dùl mpồl lơh broă bal bơh bi Nguyễn Anh Quân dê gam lơh wơl ƀòn tàñ bềl mờ pơgồp bal mờ Kông ty lòt nhơl nàng yal tơnggit ƀòn tàñ bềl sùt”.

Mờ bơta ngac ngar tàm broă lơh, ƀòn tàñ bềl sùt Phú Tân gam rơhời jòi geh bơngă pa. Lòt nhơl sền git, lơh ngan ngồn ờ mìng cèng wơl priă jền mờ gam pơgồp bơnah prap gàr, lơh gơ rề niam chài bơh yau tàm ƀòn lơh broă rhiang nam do. Bơh do, bềl sùt mờ ală phan lơh bơh sùt rơp geh rài kis pa, lơh gơlik gùng lòt pa mờ kung gam gơtùi bè sùm huềng bơh yau tàm rài kis tam gơl pa dê.